INdaba 47: Isela Kwa-Israyeli
QALA bonyana indoda le yembela ini ngetendeni layo! Yembela ingubo ehle, irhawuda nesiliva. Izithathe edorobheni leJeriko. Kodwana yini egade kufuneka yenziwe ngezinto zeJeriko? Usakhumbula?
Gade kufuneka bona zitjhatjalaliswe begodu irhawuda nesiliva zinikelwe ezintweni eziligugu zetarbenakele lakaJehova. Ngalokho-ke abantwaba khenge balalele uZimu. Bebe izinto ezingezakaZimu. Ibizo lendonda le ngu-Akhani laba anabo mndenakhe. Akhe sibone bona kuzokwenzekani.
Ngemva kokobana u-Akhani ebe iintwezi, uJoshuwa wathumela amadoda bona ayokulwa nabantu bedorobheni le-Ayi. Kodwana bahluleka epini. Abanye babulawa abanye babaleka. UJoshuwa kwamdanisa khulu lokhu. Waguqa wathandaza kuJehova: ‘Kubayini uvumele lokhu bona kwenzeke kithi?’
UJehova waphendula wathi: ‘Sikima! U-Israyeli wonile. Uthathe izinto egade kufuneka zitjhatjalaliswe namtjhana okufuneka ziyiswe etarbanakele lakaJehova. Webe ingubo ehle wakufihla lokho. Ngeze ngakubusisa bekube kulapho uyitjhabalalisa, utjhabalalisa naloyo owebe iintwezo.’ UJehova wathi uzokubonisa uJoshuwa bona ngubani indoda engakalungi leyo.
Ngalokho uJoshuwa wabuthelela boke abantu begodu uJehova waveza indoda engakalungi leyo u-Akhani. U-Akhani wathi: ‘Ngonile. Ngibone ingubo ehle nerhawuda nesiliva. Bengizifuna khulu bengazithatha. Nizozifuma zembelwe ngaphakathi kwetende lami.’
Nasele iintwezi bazifumene baziletha kuJoshuwa, uJoshuwa wathi ku-Akhani: ‘Kubayini usilethele umraro? Njenganje uJehova uzokuletha umraro kuwe!’ Ngaso sona isikhatheso boke abantu babetha u-Akhani nomndenakhe ngamatje bebahlongakala. Lokhu kusibonisa bona akufuneki sithathe izinto ezingasizo zethu.
Ngemva kwalokho u-Israyeli wayokulwa nabantu be-Ayi godu. Nje uJehova wabarhelebha abantu bakhe bebathumba epini.
Joshuwa 7:1-26; 8:1-29.
Iimbuzo
- Nawu qala esithombenesi, ngubani indoda eyembela uburego ebuthathe eJeriko, begodu bobani abamrhelebhako?
- Kubayini isenzo saka-Akhani nomndenakhe besisimbi khulu?
- Wathini uJehova lokha uJoshuwa nekabuza bona ama-Israyeli kubayini abhalelwe epini e-Ayi?
- Ngemva kokobana u-Akhani nomndenakhe balethwa kuJoshuwa, kwenzekani kibo?
- Isahlulelo esatholwa ngu-Akhani sisifundisani thina?
Iimbuzo engezelelekileko
- Funda uJoshuwa 7:1-26.
Iimthandazo kaJoshuwa ivezani malungana nobuhlobo bakhe noMdali? (Josh. 7:7-9; AmaRh. 119:145; 1 Jwanisi 5:14)
Isibonelo saka-Akhani sitjengisani, begodu lokhu kusiyelelisa njani thina? (Josh. 7:11, 14, 15; Iziy. 15:3; 1 Thim. 5:24; Heb. 4:13)
- Funda uJoshuwa 8:1-29.
Ngimuphi umthwalo wefanelo omunye nomunye wethu anawo ebandleni lobuKrestu namhlanjesi? (Josh. 7:13; Lef. 5:1; Iziy. 28:13)
