INdaba 89: UJesu Uhlwengisa Itempeli
UJESU uqaleka asilingekile, akusinjalo? Uyazi bona Kubayini asilingekile? Kungombana amadoda la asetempeleni lakaZimu eJerusalema amarhamaru. Alinga ukwenza imali enengi ngabantu abazokukhulekela uZimu.
Uyazibona zoke iinkomo, izimvu namazuba? Amadoda la athengisa iinlwanezi la etempeleni. Uyazi bona bekubayini? Kungombana ama-Israyeli gade atlhoga iinlwana neenyoni ukwenzela uZimu isihlabelo.
Umthetho kaZimu bewuthi lokha um’Israyeli nakenze intwembi bekufuneka enze isihlabelo kuZimu. Begodu bekunezinye iinkhathi lapho bekufuneka khona bona ama-Israyeli enze umhlabelo. Kodwana ama-Israyeli bekazozifumana kuphi iinyoni neenlwana zokwenza umhlabelo kuZimu?
Amanye ama-Israyeli gade aneenyoni neenlwana. Ngalokho bekanganikela ngazo. Kodwana ama-Israyeli amanengi gade anganazo iinlwana namtjhana iinyoni. Abanye bebahlala kude neJerusalema bebangekhe bakwazi ukuza nezabo iinlwana etempeleni. Ngalokho abantu bebeza la ukuzothenga iinlwana namtjhana iinyoni abazitlhogako. Kodwana amadoda la bekababiza imali enengi khulu abantu. Gade badlelezela abantu. Ngaphandle kwalokho, bekungafuneki bona bathengisele etempeleni lakaZimu.
Lokho ngikho okwasilinga uJesu. Ngalokho wawisa amatafula wamadoda la anemali, iinthoro zemali zarhatjheka phasi. Godu wenza isibebhu ngeentambo waqotha zoke iinlwana egade zinge tempeleni. Walaya amadoda egade athengisa amazuba wathi: ‘Wakhupheni la! Lisani ukwenza indlu kababa indawo yokwenza imali enengi.’
Abanye babafundi bakaJesu gade banaye etempeleni eJerusalema. Barareka nebabona lokho uJesu agade akwenza. Bakhumbula lokho okutjhiwo yiBhayibhili nayithi ngeNdodana kaZimu: ‘Ithando ngendlu kaZimu lizokuvutha njengomlilo kuye.’
Lokha uJesu nekaseJerusalema emgidini wePhasika, wenza immangaliso ezinengi. Ngemva kwalokho, uJesu watjhiya iJudiya wathoma ikhambo lakhe elibuyela eGalile. Kodwana nakasendleleni, wadabula esifundeni seSamariya. Akhe sibone bonyana kwenzekani lapho.
Jwanisi 2:13-25; 4:3, 4.
Iimbuzo
- Kubayini gade kuthengiswa iinlwana etempelini?
- UJesu wasilingwa yini?
- Njengombana ubona esithombenesi khuyini uJesu ayenzako, begodu ngimuphi umlayo awunikela amadoda athengisa amazuba?
- Lokha abafundi bakaJesu nebabona akwenzako, khuyini abayikhumbulako?
- Ngisiphi isifunda uJesu adabula kiso nekabuyela emva eGalile?
umbuzo ongezelelekileko
- Funda uJwanisi 2:13-25.
Ukucabangela ukusilingeka kwakaJesu ngalabo egade batjhintjha iimali etempelini, ngimuphi umbono olungileko ngokwenza irhwebo eWolweni loMbuso? (Jwanisi 2:15, 16; 1 Kor. 10:24, 31-33)
Okhunye Ongakuthabela
UJESU—UYINDLELA NEQINISO NOKUPHILA
UJesu Utjhisakalela Ukulotjha Kweqiniso
UmThetho kaZimu uvumela abantu bona bathenge iinlwana eJerusalema benze umhlatjelo ngazo, alo-ke, kubayini uJesu asilingeka lokha nakabona abathengisi ethempelini?
