ISIFUNDO 12

Khuyini Ezokusiza Bona Uhlala Ufunda IBhayibheli?

IDLALE

Ukufunda iBhayibheli kuyazuzisa. Nanyana kunjalo, akusibulula ngaso soke isikhathi. Ngezinye iinkhathi, ungazibuza ukuthi uzokukghona na ukuhlala ufunda iBhayibheli. Kubayini kuzuzisa ukuragela phambili? Khuyini engakusiza bona ukghodlhelele nanyana uqalene nobudisi?

1. Kubayini kuqakathekile ukufunda iBhayibheli?

“Ilizwi lakaZimu liyaphila begodu linamandla.” (Hebheru 4:12) IBhayibheli liqakathekile ngombana liveza imicabango kaZimu nendlela azizwa ngayo ngawe. Likusiza ube nelwazi, ukuhlakanipha kwamambala nethemba. Okuqakatheke khulu, likusiza ube mngani kaJehova. Nawufunda iBhayibheli, uvumela amandlalo enze ukuphila kwakho kube ngcono.

2. Kubayini kuqakathekile ukubona amandla weqiniso leBhayibheli?

Amaqiniso aseBhayibhelini anjengamagugu akhethekileko. Kungebangelo iBhayibheli lisikhuthaza bona ‘sithenge iqiniso, singalithengisi.’ (IzAga 23:23) Nasihlala sicabanga ngokuqakatheka kweqiniso leBhayibheli sizokwenza koke okusemandlenethu ukuhlala silifunda ngitjho nanyana siqalene nobudisi.—Funda IzAga 2:4, 5.

3. UJehova angakusiza njani bona uragele phambili ufunda?

NjengoMdali onamandla noMngani, uJehova ufuna ukukusiza ufunde ngaye. Angakunikela “kokubili isifiso namandla wokusebenza.” (Funda kwebeFilipi 2:13.) Ngezinye iinkhathi nawutlhoga isikhuthazo esingeziweko sokufunda namkha sokusebenzisa okufundileko, angakusiza. Nangabe utlhoga amandla angeziweko bona uhlule iinqabo namkha ukuphikiswa, angakunikela wona. Hlala uthandaza, ubawe uJehova akusize uragele phambili nokufunda iBhayibheli.—1 Thesalonika 5:17.

FUNDA NGOKUNGENELELEKO

Zijayeze indlela ongahlala ufunda ngayo iBhayibheli nanyana umajadu namkha abanye bakuphikisa. Cabangisisa ngendlela uJehova angakusiza ngayo bona uragele phambili nokufunda.

4. Qiniseka bona isifundo sakho seBhayibheli siza qangi

Ngezinye iinkhathi siba majadu khulu kubonakale ngasuthi asinaso isikhathi esaneleko sokufunda iBhayibheli. Khuyini engasiza? Funda kwebeFilipi 1:10, bese nicoca ngemibuzo le:

Ucabanga ukuthi ngiziphi ezinye ‘zezinto eziqakatheke khulu’ ekuphileni?
Ungasenza njani isifundo sakho seBhayibheli size qangi?

Nangabe uzalisa ithunga ngehlabathi bese ulinga ukufaka amatje, amatje angekhe alingane
Nangabe uthoma ngokufaka amatje, uzokuba nendawo eyaneleko yokufaka ihlabathi. Ngokufanako, ‘nawuthoma ngezinto eziqakatheke khulu’ ekuphileni kwakho, uzokukghona ukuzenza bese wenza ezinye izinto

Ukufunda iBhayibheli kwanelisa isifiso sethu sokufunda nokulotjha uZimu. Funda uMatewu 5:3, bese nicoca ngombuzo lo:

Sizuza njani nasibeka isifundo seBhayibheli qangi?

5. Kghodlhelela nawuphikiswako

Ngezinye iinkhathi abanye bangalinga ukukulisisa ukufunda iBhayibheli. Qala isibonelo saka-Francesco. Dlala IVIDIYO, bese nicoca ngemibuzo elandelako.

IVIDIYO: Umvuzo Wokukghodlhelela (5:22)

Evidiyweni, abangani baka-Francesco nomndenakhe bazizwa njani nakabatjela ngalokho akufundako?
Ukukghodlhelela kumzuzise njani?

Funda yesi-2 kaThimothi 2:24, 25, bese nicoca ngemibuzo le:

Umndenakho nabangani bakho bazizwa njani ngalokho okufundako?
Ngokuya ngamavesi la, kufuze wenzeni lokha omunye nakungamthabisi ukuthi ufunda iBhayibheli begodu kubayini?

6. Thembela kuJehova bona akusize

Njengombana sitjhidela kuJehova, isifiso sethu sokumthabisa siyakhula. Nanyana kunjalo, singakufumana kubudisi ukwenza amatjhuguluko ekuphileni kwethu begodu siphile ngendlela uJehova ayifunako. Nangabe uzizwa njalo, ungapheli amandla. UJehova uzokusiza. Dlala IYIDIYO, bese nicoca ngemibuzo elandelako.

IVIDIYO: UJehova Uyasisiza Bona Senze Amatjhuguluko (3:56)

Evidiyweni, ngimaphi amatjhuguluko uJim awenzako bona athabise uJehova?
Khuyini oyithandako ngalokho akwenzako?

Funda amaHebheru 11:6, bese nicoca ngemibuzo le:

Khuyini uJehova azoyenzela labo “abamfuna ngetjiseko” okutjho abalinga ngamandla ukumazi nokumthabisa?
Lokhu kukufundisani ngendlela uJehova azizwa ngayo nakabona imizamwakho yokufunda iBhayibheli?

OMUNYE ANGABUZA: “Kubayini ufunda iBhayibheli?”

Ungaphendula njani?

ISIRHUNYEZO

Nanyana kungasibulula ngaso soke isikhathi ukufunda iBhayibheli, kungakusiza uthabele ukuphila ngokungapheliko. Ragela phambili uthembela kuJehova uzokubusisa.