Kghani wakhe wahlongakalelwa mumuntu omthandako? Nakufika isikhathi esibuhlungweso, ungazibuza: ‘Kwenzekani kithi nasihlongakalako? Likhona na ithemba lokuthi sizakhe sibabone godu?’ Esihlokwenesi nakesilandelako sizokufumana iimpendulo zeBhayibheli eziduduzako.

1. Kwenzekani kithi nasihlongakalako?

UJesu wafanisa ukufa nobuthongo obukhulu. Umuntu nakalele ubuthongo obukhulu akaboni ukuthi kwenzekani. Alo, ukufa kufana njani nokulala? Umuntu nasele ahlongakele akasabuzwa ubuhlungu. Akabi nesizungu, ngitjho nanyana bekabathanda kangangani abangani bakhe nomndenakhe. IBhayibheli lithi: “Abahlongakeleko abazi litho.”—Funda uMtjhumayeli 9:5.

2. Kusisiza ngani ukwazi iqiniso ngabahlongakeleko?

Abantu abanengi bayakusaba ukufa begodu basaba ngitjho nabantu abahlongakeleko. Lokho okutjhiwo liBhayibheli ngokufa kungakududuza. UJesu wathi: “Iqiniso lizonitjhaphulula.” (Jwanisi 8:32) Amanye amasondo afundisa ukuthi lokha umuntu nakahlongakalako kuba khona okusala kuphila kodwana iBhayibheli alikufundisi lokho. Nje-ke akekho umuntu ozwa ubuhlungu nasele ahlongakele. Njengombana abantu abahlongakeleko bangaboni litho, angeze basilimaza. Kungebangelo kungatlhogeki ukuthi silinge ukubathabisa namkha sibalotjhe begodu akutlhogeki nokuthi sibathandazele.

Abanye bathi bangakghona ukukhuluma nabantu abahlongakeleko. Yinto engeze yakghonakala leyo. Njengombana sifundile, abahlongakeleko “abazi litho.” Labo abacabanga ukuthi bakhuluma nabantu abahlongakeleko, kungenzeka bakhuluma namadimoni azenza abantu abahlongakeleko. Nje-ke, ukwazi iqiniso ngokufa kuyasivikela emadimonini. UJehova usiyelelisa ngokulinga ukukhuluma nabantu abahlongakeleko, ngombana uyazi ukuthi ukukhuluma namadimoni kuzosilimaza.—Funda uDuteronomi 18:10-12.

3. Funda ngobujamo babantu abahlongakeleko

Ephasini mazombe abantu baneenkolelo ezihlukahlukeneko ngokuthi kwenzekani kithi nasihlongakalako. Akusizo zoke iinkolelwezo eziliqiniso.

• Ngiziphi iinkolelo ezijayelekileko endaweni yangekhenu ezimalungana nobujamo babantu abahlongakeleko?

 4. Ukwazi iqiniso ngokufa kuyasisiza

Ukwazi iqiniso ngokufa kusitjhaphulula ekusabeni abantu abahlongakeleko. Funda uMtjhumayeli 9:10, bese nicoca ngombuzo lo:

• Kghani abantu abahlongakeleko bangasilimaza?

Ukwazi iqiniso eliseBhayibhelini ngabantu abahlongakeleko kusenza singasakholelwa amala wokuthi kufuze sibathabise namkha sibalotjhe. Funda u-Isaya 8:19 nesAmbulo 4:11, bese nicoca ngombuzo lo:

• Ucabanga ukuthi uJehova uzizwa njani ngomuntu olotjha namkha obawa isizo emuntwini ohlongakeleko?

5. Ukwazi iqiniso ngokufa kuyasiduduza

Abantu abanengi bafundiswa ukuthi nabahlongakalako bazokutlhoriswa ngebanga lezinto ezimbi abebazenza nabasaphilako. Kuyasiduduza ukwazi ukuthi akunamuntu otlhoriswako nasele ahlongakele, ngitjho nomuntu owenze izinto ezimbi khulu. Funda kwebeRoma 6:7, bese nicoca ngombuzo lo:

• IBhayibheli lithi umuntu nakahlongakalako uZimu uyazisula izono zakhe, alo ucabanga bona umuntu angatlhoriswa ngemitjhapho ayenzako nakasaphilako?

Nasazi uJehova sizokulemuka bona angekhe avumela ukuthi abantu abahlongakeleko batlhoriswe. Funda uDuteronomi 32:4; neyoku-1 kaJwanisi 4:8, bese nicoca ngemibuzo le:

• UZimu onobuntu obuhlathululwe emavesini la angavuma na bona abahlongakeleko batlhoriswe?

• Kghani kuyakududuza ukwazi iqiniso ngokufa? Kubayini?

 ISIRHUNYEZO

Umuntu nakahlongakalako, ukuphila kwakhe kuyaphela. Abantu abahlongakeleko abezwa ubuhlungu begodu angeze balimaza abaphilako.

Buyekeza

• Kwenzekani kithi nasihlongakalako?

• Ukwazi iqiniso ngokufa kusisiza njani?

• Ukwazi iqiniso ngokufa kusiduduza njani?