Bafowethu Nabodadwethu Abathandekako:

Ithando ngoZimu nangabantu lisenza ‘sikhambe siyokwenza abantu bazo zoke iintjhaba babe bafundi, sibabhabhadise.’ (Mat. 28:​19, 20; Mar. 12:​28-31) Ithando elingazicabangeli lona kwaphela, linamandla. Lingathinta iinhliziyo zalabo “abazimisele ukufumana ukuphila okungapheliko.”—IzE. 13:48.

Esikhathini esidlulileko, besidzimelele ekubambeni iintjumayelo ngehloko nekunikeleni abantu iincwadi. Nje, sitlhoga ukuthuthukisa indlela esikhuluma ngayo nabantu. Sifuna ukutjengisa ukuthi siyabathanda abantu ngokukhuluma ngeenhloko ezibathintako. Lokhu sikwenza ngokuzivumelanisa nobujamo nokuqalisisa izinto ezitshwenya umuntu ngamunye nezimkarako. Incwajana le izosisiza njani sikwenze lokhu?

Incwajana le ineemfundo ezili-12 ezisifundisa ngobuntu esibutlhogako nasizakutjengisa ithando besenze nabafundi. Isifundo ngasinye sidzimelele endabeni yeBhayibheli ekhuluma ngobuntu obatjengiswa nguJesu namkha maKrestu wokuthoma emsebenzini wokutjhumayela. Umnqopho akusikubamba iintjumayelo ngehloko kodwana kufuna iindlela esingatjengisa ngazo ukuthi siyabathanda abantu. Nanyana ubuntu ngabunye butlhogeka kizo zoke iingcenye zomsebenzethu wokutjhumayela, sizokucoca ngokuthi ubuntu obuthileko butlhogeka njani nawuzakuthoma ikulumiswano, wenze amabuyelo namkha urage iimfundo zeBhayibheli.

Njengombana ufunda isifundo ngasinye, cabangisisa ngendlela ongatjengisa ngayo ubuntobo nawukhuluma nabantu endaweni lapha uhlala khona. Lwela ukuqinisa ithando lakho ngoJehova nangabantu. Ithandwelo liqakatheke khulu ukudlula ikghono elithileko ngombana lizokusiza ukghone ukufikelela umnqophwakho wokwenza abafundi.

Silithabela khulu ilungelo lokulotjha nani ngobunye. (Zef. 3:9) Kwangathi uJehova anganibusisa khulu njengombana niragela phambili nithanda abantu nenza nabafundi!