Ngemkhuphukeleni ongepumalanga yeNtaba yama-Oliva, endaweni engaba makhilomitha amathathu ukusuka eJerusalema, kunesabelo seBhethani. (Jwanisi 11:18) UJesu uya lapho, ungena ngendlini yabantwana bomuntu ababili, uMarta noMariya. Bona nomfowabo uLazaru babangani bakaJesu begodu bamamukela ngethabo.

Ukuvakatjhelwa nguMesiya kuyinto ekhethekileko. UMarta uzimisele ukumtlhogomela kuhle khulu uJesu, nje-ke umajadu ngokupheka iinkhanakhana. Kodwana njengombana uMarta atinazela, udadwabo uMariya uzihlalele ngeenyaweni zakaJesu umlalele. Ngokukhamba kwesikhathi uMarta uthi kuJesu: “Kosi, akukutshwenyi na ukuthi udadwethu ungisukele ngedwa nezinto ezingaka ekufuze ngizenze? Ngibawa umtjele azongisiza.”—Lukasi 10:40.

Kunokuthi asole uMariya, uJesu ululeka uMarta ngokutshwenyeka khulu ngokudla, uthi: “Marta, Marta, utshwenyeka begodu uthikaziswa zizinto ezinengi. Kutlhogeka izinto ezimbalwa, namkha yinye tere. UMariya ukhethe ingcenye ezidlula zoke, begodu angekhe athathelwe yona.” (Lukasi 10:41, 42) Kwamambala, uJesu utjengisa ukuthi akutlhogeki sithathe isikhathi esinengi siphekana neenkhanakhana. Kwanele ukwenza ukudla okuphekeka lula.

Iinhloso zakaMarta zihle. Ufuna ukusiphatha kuhle isivakatjhi sakhe. Kodwana ukutshwenyeka khulu ngokudla kumenza aphundwe ziinqophiso eziqakathekileko ezivela eNdodaneni kaZimu. UJesu uthi uMariya ukhethe ngokuhlakanipha, begodu lokho akukhethileko kuzomzuzisa ukuphila kwakhe koke bekube sifundo kithi soke ekufuze sihlale sisikhumbula.

Kwesinye isenzakalo, uJesu ufundisa isifundo esihlukileko kodwana esiqakatheke njengalesi. Umfundi othileko uyambawa: “Kosi, sifundisa ukuthandaza, njengombana noJwanisi afundise abafundi bakhe.” (Lukasi 11:1) UJesu wabafundisa abafundi bakhe ukuthandaza esikhathini esingaba mnyaka nesiquntu esidlulileko eTjumayelwenakhe yeNtabeni. (Matewu 6:9-13) Nokho kungenzeka umfundi lo bekangekho lapho, nje-ke uJesu ubuyelela amaphuzu aqakathekileko. Ngemva kwalokho wenza umfanekiso otjengisa bona kutlhogeka siphikelele emthandazweni.

“Akhesithi omunye wenu unomngani bese uya kuye phakathi kobusuku athi, ‘Mngani, yewungiboleke izikwa ezintathu, ngombana ngifikelwe ngomunye umnganami ovela kude, abe anginalitho engingamupha lona.’ Kodwana loyo ongendlini wathi: ‘Lisa ukungitshwenya. Umnyango sewukhiyiwe, begodu mina nabantwabami silele. Angeze ngivuke ngikunikele litho.’ Ngiyanitjela, ngitjho nanyana bekangekhe avuke amnikele okuthileko ngombana amnganakhe, ngebanga lokuphikelela kwakhe uzokuvuka amnikele nanyana yini ayitlhogako.”—Lukasi 11:5-8.

UJesu akatjho ukuthi uJehova akanakareko yokusisiza nasimrabhelako, njengombana kwenza umngani lo. Kunalokho utjengisa ukuthi nangabe umngani onganakareko angagcina sekamsiza umnganakhe nakamrabhela ngokuphikelelako, ngokuqinisekileko uBabethu osezulwini osithandako uzozisiza iinsebenzi zakhe ezithembekileko nazimrabhela ngokusuka ehliziyweni! UJesu uyaraga: “Yeke ngithi kini, phikelelani nibawa, nizakuphiwa; phikelelani nifuna, nizakufumana; phikelelani nikokoda, nizakuvulelwa. Ngombana woke umuntu obawako uyaphiwa, woke umuntu ofunako uyafumana, nawo woke umuntu okokodako, uzokuvulelwa.”—Lukasi 11:9, 10.

Ngemva kwalokho uJesu ulenza likhanye iphuzu lakhe ngokumadanisa indlela kaBaba osezulwini nendlela abobaba ababaphatha ngayo abantwababo: “Ngimuphi ubaba kini, ongathi indodanakhe imbawa ihlambi, ayinikele inyoka esikhundleni sehlambi? Namkha nayibawa iqanda, ayinikele ufezela? Ngalokho, nangabe nina, ngitjho nanyana nibambi, nikwazi ukupha abantwabenu izipho ezihle, uBaba osezulwini uzobanikela kangangani-ke ummoya ocwengileko labo abawubawa kuye!” (Lukasi 11:11-13) Amezwi la asiqinisa idolo, asitjengisa ukuthi uBabethu uzimisele ukusilalela nokusisiza ngezinto esizitlhogako.