Bantu Abathandwa NguJehova:

Bekungomnyaka ka-1971. Labo ebebakhona emHlanganweni wesiGodi onesihloko esithi “Divine Name” bathaba khulu ukufumana iincwadi ezitjha, ezimbalwa. Iincwadezi zahlathululwa ngokuthi “zingaphezu kwalokho umuntu angakucabanga.” Malungana nenye yeencwadi ezatjhatjhululwako omunye umfowethu wathi: “Akhenge khesibe nencwadi ehlathulula kuhle kangaka izinto ezisezako!” Bekakhuluma ngani? Bekuyincwadi enesihloko esithi “The Nations Shall Know That I Am Jehovah”—How? Kodwana kubayini incwadi le beyithabisa abantu kangaka? Ngombana beyinehlathululo ebuyekeziweko yeemphorofido zencwadi yeBhayibheli kaHezekiyeli, iimphorofido ebezizokuthinta ingomuso labantu boke.

Solo incwadi le ethi ‘Know Jehovah’ yatjhatjhululwa, isibalo sabantu bakaZimu sakhula kusukela ku-1.5 miliyoni kufikela ngaphezu kwaka-8 miliyoni. (Isa. 60:22) Iingidezi zabantu bakaJehova zikhuluma amalimi angaphezu kwama-900. (Zak. 8:23) Abanengi akhenge babe nethuba lokufunda incwadi ehlathulula ngokungeneleleko iimphorofido eziphefumulelweko ezatlolwa mphorofidi uHezekiyeli.

Ngaphezu kwalokho, eminyakeni eminengi kusukela ngo-1971, ukuzwisisa kwethu amaqiniso weBhayibheli kuthuthukile njengombana umkhanyo uragela phambili ukhanya khudlwana. (IzA. 4:18) Ngo-1985 sathoma ukubona ngokukhanyako indlela “ezinye izimvu” kwathiwa zilungile njengombana zibangani bakaZimu. (Jwa. 10:16; Rom. 5:18; Jak. 2:23) Ngo-1995 sazwisisa kokuthoma bona ukwahlulelwa kwamaswaphela ‘kwezimvu’ ‘neembuzi’ bekuzokwenzeka phakathi “nesizi elikhulu.” (Mat. 24:21; 25:31, 32) Woke amatjhuguluko la abe nomthelela endleleni esizwisisa ngayo incwadi kaHezekiyeli.

Eminyakeni yamva nje, ukukhanya kwaragela phambili kukhanya. Cabanga ngeemfundo esizifunde emifanekisweni kaJesu. Ezinengi zeemfundwezo sesizizwisisa kuhle begodu zisithinta iinhliziyo. Eminengi yemifanekiso leyo iqalisele ezenzakalweni ezizokwenzeka ingasikade hlangana nesizi elikhulu elitjhidelako. Ngendlela efanako, indlela esizwisisa ngayo iimphorofido ezithileko ezisencwadini kaHezekiyeli sele ikhanyisiwe. Phakathi kwazo kuneemphorofido ezikhuluma ngoGogi wakaMagogi (isahluko sama-38 nesama-39), umsebenzi wendoda ephethe iphondo le-enke lakanobhala (isahluko se-9), umrhoba wamathambo omileko nokuhlanganiswa kweengodo ezimbili ngokomfanekiso (isahluko sama-37). Woke amatjhuguluko la athuthukisa lokho ebekutlolwe eminyakeni edlulileko encwadini ethi ‘Know Jehovah’.

Akurari ke, ukuthi abantu bakaJehova babuzile bona, “Sizoyifumana nini incwadi enehlathululo ethuthukisiweko yeemphorofido zakaHezekiyeli?” Incwadi leyo ngethi Ekugcineni UJehova Ulotjhwa Ngendlela Ayamukelako! Njengombana ufunda izahluko zayo ezima-22 begodu uzindla ngemifanekiso emihle efumaneka kiyo, izokukara indlela ekwenziwe ngayo irhubhululo nayilungiselelwako. Kwathandazwa kanengi bona kufunyanwe ihloso yokuthi kubayini uJehova asinikele incwadi yeBhayibheli kaHezekiyeli ekarisako. Kwacatjangwa khulu ngemibuzo enjengokuthi: Ngiziphi iimfundo ezifumaneka encwadini kaHezekiyeli ebezizokufundwa ngilabo ebebaphila ngesikhathi sakhe, nathi namhlanjesi? Ngiziphi iimphorofido ezikhuluma ngezenzakalo ezisazokwenzeka ngengomuso? Kghani kufuze siqale izenzakalo ezenzekileko namkha ezifanekisela okhunye okwenzekileko eemphorofidweni  zakaHezekiyeli? Iimpendulo zemibuzo le zisenza siyizwisise ngokukhanyako incwadi le yeBhayibheli esithabela ukuyifunda.

Njengombana ufunda incwadi kaHezekiyeli kusukela ekuthomeni kufikela ekugcineni, izokukara indlela ingcenye yehlangano kuJehova yezulwini esebenza ngayo. Siyaqiniseka bona ziyakukara iinkambiso zakaJehova eziphakemeko azibekele kokubili labo abasezulwini nabasephasini abafuna ukumlotjha ngendlela ayamukelako. Incwadi ethi Ukulotjha Okuhlwengileko izokusiza uthokoze khulu uJehova ngalokho esele akwenzele abantu bakhe nalokho asazobenzela khona kungasikade. Uzokulemuka ukuthi incwadi le igandelela iinhloko ezimbili ngokubuyelelweko. Kokuthoma, bona sithabise uJehova, kufuze sazi besivume ukuthi uMbusi Wendawo Yoke. Kwesibili, kufuze silotjhe uJehova ngendlela ayamukelako, besiphile ngeenkambiso zakhe eziphakemeko.

Kusifiso sethu bona incwadi le ikwenze uzimisele khulu ukulotjha uJehova ngendlela edumisa igama lakhe elikhulu nelicwengileko. Ngesikhathi esifanako, kwanga ingakukhuthaza uhlale ulinde isikhathi lapho zoke iintjhaba zizokwazi ukuthi unguJehova.—Hez. 36:23; 38:23.

Kwanga uBabethu onethando, uJehova, angayibusisa khulu imizamakho yokuzwisisa incwadi aphefumulela umphorofidi uHezekiyeli bona ayitlole.