Yoyamba yoluta kuli Akolinto 1:1-31
1 Newo Paulo, woitiwa kunkhala ntumwi wa Khilisitu Yesu mokatijana na chifunilo cha Mulungu, pamozi na Sositeni nkwasu,
2 nulembela mpingo wa Mulungu wamene uli ku Kolinto. Nulembela mwewo amene mwatuŵishiwa mwa Khilisitu Yesu, amene mwaitiwa kuti munkhale atuŵa, pamozi na onse ŵala ali kulikonse amene oita pa zina ya Ambuye wasu Yesu Khilisitu. Ambuye wawo komasoti wasu.
3 Kuwama ntima kukulu na ntendele vofumila kwa Mulungu Atata ŵasu na Yesu Khilisitu Ambuye wasu vinkhale namwe.
4 Nthawe zonse nutembeja Mulungu wangu chifukwa cha mwewo, powona kuwama ntima kukulu kwa Mulungu kwechikuwoneshani kupitila mwa Khilisitu Yesu.
5 Chifukwa chokatijana naye, nimwe olemela mu vinthu vonse, ndipo wakuyavyani kunkhala na luso yolaŵila komasoti kuziŵa vinthu vonse,
6 pakuti umboni unena za Khilisitu wankhazikika pakati panu.
7 Paliye mphaso yamupeleŵela pamuyembekezela mwachidwi kuululiwa kwa Ambuye wasu Yesu Khilisitu.
8 Komasoti Mulungu azakutang’isheni mpaka posilijila, kuti osati munkhale na chifukwa chokuyopejelani mu nsiku ya Ambuye wasu Yesu Khilisitu.
9 Mulungu wamene ekuitani kuti munkhale okatijana na Mwana wake Yesu Khilisitu, Ambuye wasu, ni wokhulupilika.
10 Lomba nukudandaulilani akwasu, mu zina ya Ambuye wasu Yesu Khilisitu, kuti monse mukolaŵila mokatijana ndipo pakati panu osati pankhale kuyaŵanika, koma munkhale okatijana ngako ponkhala na ntima umozi na maganizo amozi.
11 Chifukwa ŵanthu ayakine a m’banja ya Kulowe aniuja za mwewo, akwasu, kuti pakati panu pali kuyaŵanika.
12 Nutanthauza kuti, ayakine a mwewo onena kuti: “Newo nine wa Paulo,” ayakine onena kuti: “Newo nine wa Apolo,” ayakinesoti onena kuti: “Newo nine wa Kefa,”* pamene ayakine onena kuti, “Newo nine wa Khilisitu.”
13 Kansi Khilisitu wankhala woyaŵanika? Kansi Paulo epanyikiwa pa chimuti chotamanilapo* kuti mwewo mupulumushiwe? Olo kansi mwibatiziwa mu zina ya Paulo?
14 Nutembeja Mulungu kuti niliye batize aliyense wa mwewo kupatulapo Kilisipo na Gayo,
15 mwakuti paliye anganene kuti nibatiziwa mu zina yangu.
16 Nichendi kuti nibatizasoti ŵanthu a m’banja ya Sitefana. Koma awo ayakine nuziŵalini keno nibatizapo aliyense.
17 Khilisitu aliye nitume kuti nikobatiza ŵanthu, koma kuti nikolengeza uthenga uweme, osati na luso yolaŵila,* kuyopela kuti chimuti chotamanilapo* cha Khilisitu chingankhale chiliye ntchito.
18 Nkhani yokhuza chimuti chamene icho chotamanilapo* ni chinthu chopusa kuli ŵanthu amene akuya wonongewa, koma kuli sewo amene tupulumushiwa, yamene iyi ni mphamvu ya Mulungu.
19 Chifukwa Malemba onena kuti: “Nizasilije nzelu za ŵanthu ali na nzelu ndipo nizakane kuchenjela kwa ŵanthu ali na nzelu.”
20 Kansi wanzelu ali kuni? Mulembi* ali kuni? Kaswili oziŵa kushusha wa nthawe* ino ali kuni? Kansi Mulungu aliyepange nzelu za ichi chalo kunkhala zopusa?
21 Mwa nzelu zake, Mulungu aliyelole kuti chalo chikatishile ntchito nzelu zachili nazo pomuziŵa. Mmalo mwake, Mulungu ewona kuti vili luweme kupulumusha okhulupilila kupitila mu uthenga wamene ŵanthu ayakine ouwona monga ni wopusa.
22 Ayuda ofuna kuwona chizindikilo ndipo Agiliki osakila-sakila nzelu.
23 Koma sewo tulalikila za Khilisitu wamene epaiwa popanyikiwa pa chimuti chotamanilapo.* Ayuda owona kuti vamene ivi ni vokhumudwisha ndipo ŵanthu amitundu iyakine owona kuti n’vopusa.
24 Olo vili tetyo, Ayuda na Agiliki ŵala eitiwa owona kuti Khilisitu ni mphamvu ya Mulungu komasoti nzelu za Mulungu.
25 Chifukwa chinthu cha Mulungu chakuwona ŵanthu kuti ni chopusa, n’chanzelu kupambana ŵanthu. Ndipo chinthu cha Mulungu chakuwona ŵanthu kuti n’chofoka, n’champhamvu kupambana ŵanthu.
26 Muwona mwechikuitilani akwasu, kuti ni anyinjilini ŵakuwona ŵanthu kuti ni anzelu amene eitiwa, ni anyinjilini amphamvu amene eitiwa, ni anyinjilini a m’mabanja olemekezeka.
27 Koma Mulungu esankha vopusa va chalo kuti achitishe nsoni ŵanthu anzelu, ndipo Mulungu esankha vinthu vofoka va chalo kuti achitishe nsoni vinthu vamphamvu.
28 Mulungu esankhasoti vinthu vonyozeka va chalo na vinthu vakuwona ŵanthu kuti n’vatyala-tyala, vinthu vamene paliye, kuti achitishe vinthu vamene vilipo kunkhala viliye mphamvu.
29 Echita vamene ivi kuti osati papezeke munthu wolitumba pamenso pa Mulungu.
30 Koma mwewo nimwe okatijana na Khilisitu Yesu chifukwa cha Mulungu wamene uyo. Yesu wamene uyo otiwonesha nzelu za Mulungu komasoti chilungamo cha Mulungu. Kupitila mwa Yesu ŵanthu angakwanishe kutuŵishiwa, ndipo kupitila mu dipo* angakwanishe kumasuliwa,
31 kuti vikatijane na vakunena Malemba vakuti: “Wamene olitumba, alitumbe mwa Yehova.”
Malizu a m'nyansi
^ Oitiwasoti kuti Petulo.
^ Onani matanthauzo a mawu ayakine.
^ Olo kuti, “polaŵila mochenjela.”
^ Onani matanthauzo a mawu ayakine.
^ Onani matanthauzo a mawu ayakine.
^ Kutanthauza kaswili wa Chilamulo.
^ Onani matanthauzo a mawu ayakine.
^ Onani matanthauzo a mawu ayakine.
^ Onani matanthauzo a mawu ayakine.