Yoyamba yoluta kuli Akolinto 10:1-33
10 Lomba akwasu, nufuna muziŵe kuti makolo ŵasu akale, onse enze pansi pa mkumbi ndipo onse etauka nyanja.
2 Onse ebatiziwa mwa Mose, kupitila mu mkumbi na nyanja.
3 Onse enzekulya chakulya chauzimu cholingana.
4 Ndipo onse enzekumwa manzi auzimu olingana. Chifukwa enzekumwa pa mwala wauzimu wamene wenzeŵakonkhelela, ndipo mwala wamene uyo wenzepanamila* Khilisitu.
5 Olo venze tetyo, anyinji a ove Mulungu aliyekondwele nawo ndipo epaiwa m’chipululu.
6 Vinthu vamene ivi ni visanzo kuli sewo, kuti nasesoti osati tikokumbwila vinthu viipa monga ni mwechichitila ove.
7 Ndipo osati tikolambila mafano monga ni mwechichitila ayakine a ove, mokatijana na vakunena Malemba kuti: “Ŵanthu enkhala pansi ndipo echilya na kumwa. Pavuli pake epanama noyamba kusangalala.”
8 Komasoti osati tikochita chiwelewele,* monga ni mwechichitila ayakine a ove, nakufwa ŵanthu 23.000 nsiku imozi.
9 Osati tikomuyesasoti Yehova, monga ni mwechichitila ayakine a ove pomuyesa, nakufwa pechilumiwa na njoka.
10 Osati tinkhalesoti ŵanthu ong’ung’uzika monga ni mwechichitila ayakine a ove, nopaiwa na mngelo wowononga.
11 Vinthu viŵachitikila vamene ivi ni visanzo kuli sewo ndipo vilembewa kuti vichenjeje sewo amene tunkhala kumapeto a nthawe ino.
12 Tetyo wala oganiza kuti alipaname bwino-bwino asamale kuti osati awe.
13 Paliye mayeselo amwakumana nawo osiyana na ŵakukumana nawo ŵanthu ayakine. Koma Mulungu ni wokhulupilika ndipo alolelini kuti muyesewe kufwika pamungaleke kwanisha kupilila. Koma pamukumana na mayeselo amene awo, yove azapeleke njila yopulumukila kuti mukwanishe kuŵapilila.
14 Tetyo mwewo apa ntima pangu, pewani* kulambila mafano.
15 Nulaŵila namwe monga ŵanthu oziŵa vinthu. Weluzani mweka keno vanulaŵila vamene ivi n’vachendi.
16 Kansi kapu yamadaliso yatudalisa, yutanthauzalini kuyaŵana milopa ya Khilisitu? Kansi nkate watuyaŵa-yaŵa utanthauzalini kuyaŵana muŵili wa Khilisitu?
17 Pakuti pali nkate umozi, sewo olo kuti tilipo anyinji, nise muŵili umozi, chifukwa tonse tikulya nkate umozi wamene uyo.
18 Ganizilani vakuchita Aisilaeli:* Kansi ŵala akulya vinthu vupelekewa pa guwa ya nsembe niyelini kuti onkhala monga akulya na Mulungu?
19 Kansi mfundo yake ni yotyani? Kansi vinthu vupelekewa nsembe ku mafano olo mafano amene, vili na kanthu?
20 Yayi, koma nutanthauza kuti vinthu vakupeleka ŵanthu amitundu iyakine monga nsembe, ovipeleka ku viŵanda, osati kwa Mulungu. Ndipo nufunalini kuti mukochita chilichonse chukatijana na viŵanda.
21 Vingakwanishikelini kuti mukokumwa va m’kapu ya Yehova komasoti va m’kapu ya viŵanda. Vingakwanishikelinisoti kuti mukokulya “pa thebo ya Yehova” komasoti pa thebo ya viŵanda.
22 Olo ‘kansi tufuna kuti Yehova achite nsanje?’ Kansi mphamvu zasu zingapambane mphamvu zake?
23 Vinthu vonse ni vololeka, koma ni vonselini vili na pindu. Vinthu vonse ni vololeka, koma ni vonselini vulimbikisa.
24 Aliyense osati akokungofuna vopindulisha yove yeka mphela, koma vopindulishasoti ayakine.
25 Mukokulya chilichonse chugulisiwa pamaketi pogulisiwa nyama muli na chikumbuntima chiweme ndipo osakonsha makonsho.
26 Chifukwa “chalo na vonse vili mwamwene umo ni va Yehova.”
27 Keno munthu wosakhulupilila wakuitani ndipo mufuna luta, mukalye chilichonse chawakupasani muli na chikumbuntima chiweme ndipo osakonsha makonsho.
28 Koma muyakine akakuujani kuti: “Ivi vapelekewa nsembe,” osalya vamene ivo kuyopela wakuujani wamene uyo komasoti chikumbuntima.
29 Nunenalini chikumbuntima chako, koma cha munthu muyakine wamene uyo. Nufunalini kuti nikokatishila ntchito ufulu wangu pavuli pake noyamba kuweluziwa na chikumbuntima cha munthu muyakine.
30 Olo ningankhale na ufulu wakulya chakulya chamene icho notembeja Mulungu, kansi ni bwino kuchita vamene ivo keno vingachitishe kuti ŵanthu ayakine aninyoze?
31 Tetyo keno mukulya olo mukumwa, olo muchita chinthu chilichonse chiyakine, mukochita vinthu vonse kuti vilete ulemelelo kwa Mulungu.
32 Mukopewa kukhumudwisha Ayuda, Agiliki komasoti mpingo wa Mulungu.
33 Vamene ivi niye vanuyeja-yejasoti newo kuchita. Nuyeja-yeja kukondwelesha ŵanthu onse pa vonse vanuchita. Nufunalini vopindulisha newo neka, koma vopindulisha ŵanthu anyinji kuti apulumushiwe.
Malizu a m'nyansi
^ Olo kuti, “wenzetanthauza.”
^ Mu Chigiliki por·nei′a. Onani matanthauzo a mawu ayakine.
^ Olo kuti, “thaŵani.”
^ Olo kuti, “Aisilaeli akuthupi.”
