Yoyamba yoluta kuli Akolinto 11:1-34
11 Mukokonkheja newo, monga ni mwanuchitilasoti newo kukonkheja Khilisitu.
2 Nukutembejani chifukwa munikumbukila pa vinthu vonse ndipo musunga myambo monga ni mwiniipelekela kuli mwewo.
3 Koma nufuna muziŵe kuti mutu wa mwanalume aliyense ni Khilisitu. Mutu wa mwanakazi ni mwanalume ndipo mutu wa Khilisitu ni Mulungu.
4 Mwanalume aliyense wamene opemphela olo kulaŵililatu vakusogolo alivwale chinthu chiyakine ku mutu, ochitisha nsoni mutu wake.
5 Koma mwanakazi wamene opemphela olo kulaŵililatu vakusogolo aliyevwale kanthu ku mutu ochitisha nsoni mutu wake, pakuti ni chimozi-mozi na kugela mpala.
6 Chifukwa keno mwanakazi ovwalalini kanthu ku mutu ofunika kugela mpala. Koma pakuti kugela ngako sisi olo kugela mpala kuchitisha nsoni kuli mwanakazi, akovwala chakumutu.
7 Mwanalume ofunikalini kuvwala choziŵilija ku mutu, pakuti yove ni chifanizilo na ulemelelo wa Mulungu, koma mwanakazi ni ulemelelo wa mwanalume.
8 Chifukwa mwanalume aliyefumile kuli mwanakazi, koma mwanakazi efumila kuli mwanalume.
9 Komasoti mwanalume aliyepangiliwe mwanakazi, koma mwanakazi epangiliwa mwanalume.
10 Pa chifukwa chamene ichi komasoti chifukwa cha angelo, mwanakazi ofunika kuvwala chinthu chiyakine ku mutu powonesha kuti ali pansi pa ulamulilo.
11 Komasoti pakati pa ŵanthu okonkheja Ambuye, mwanakazi odalila mwanalume ndipo mwanalume odalila mwanakazi.
12 Chifukwa monga ni mwavilili kuti mwanakazi efumila kuli mwanalume, mwanalume naye ovyalika kufumila kuli mwanakazi. Koma vinthu vonse vufumila kwa Mulungu.
13 Weluzani mweka: Kansi n’voyenelela kuti mwanakazi akopemphela kwa Mulungu aliyevwale choziŵilija ku mutu?
14 Kansi chinkhalidwe chukuphunzisanilini kuti keno mwanalume ali na sisi itali, vunkhala vochitisha nsoni?
15 Koma keno mwanakazi ali na sisi itali unkhala ulemelelo kuli yove. Vili tetyo chifukwa epasiwa sisi yake yamene iyo mmalo mwa chovwala ku mutu.
16 Koma lomba, keno alipo muyakine wamene oshusha vamene ivi pofuna chinkhalidwe chiyakine, sewo komasoti mipingo ya Mulungu, tiliye chinkhalidwe chamene icho chiyakine.
17 Koma panupeleka malangizo amene aŵa, nikukutembejanilini, chifukwa vinthu vuchitika mukasonkhana ni viwemelini, koma ni viipa.
18 Choyamba, namvwa kuti mukasonkhana mu mpingo, ponkhala kuyaŵikana ndipo nikati niwone nuwona kuti ni vachendi.
19 Pofunikila chendi kunkhala magulu ampatuko pakati panu, kuti ŵanthu ovomelejeka kwa Mulungu aziŵike.
20 Mukasonkhana kuti mulye Chakulya cha Nchingulo cha Ambuye muchitalini vinthu mu njila yoyenelela.
21 Chifukwa nthawe yachakulya ikafwika, aliyense onkhala kuti walyelatu chakulya chake, tetyo muyakine onkhala na njala koma muyakine onkhala kuti alikolwe.
22 Kansi muliye mang’anda ŵamungalyelemo nomwelamo? Olo kansi munyoza mpingo wa Mulungu nochitisha nsoni ŵanthu amene aliye chilichonse? Kansi ninene chinji kuli mwewo? Nikutembejeni? Pali ivi veka nikutembejenilini.
23 Venichimvwa kuli Ambuye niyesoti vanukuphunzisani, kuti Ambuye Yesu, usiku wechipelekewa etola nkate,
24 ndipo pechipemphela eusuna-suna nonena kuti: “Nkate uyu upanamila muŵili wangu wamene ukuti upelekewe chifukwa cha mwewo. Mukochita vamene ivi ponikumbukila.”
25 Echitasoti chimozi-mozi na kapu pechilya chakulya cha nchingulo ndipo enena kuti: “Kapu iyi yupanamila pangano yanyowani yamene inkhazikishiwa pokatishila ntchito milopa yangu. Mukochita vamene ivi pamukumwa va m’kapu yamene iyi ponikumbukila.”
26 Chifukwa nthawe iliyonse yamukulya nkate wamene uyu na kumwa va m’kapu yamene iyi munkhala kuti mulengeza imfwa ya Ambuye, mpaka yove azawele.
27 Tetyo aliyense angalye nkate wamene uyu olo kumwa va m’kapu yamene iyi mosayenelela, azankhale na mulandu wokhuza muŵili na milopa ya Ambuye.
28 Munthu akolifufuza poyamba keno niwoyenelela kulya nkate wamene uyu na kumwa va m’kapu yamene iyi.
29 Chifukwa keno munthu akulya na kumwa asaziŵa kuti vupanamila muŵili wamene uyo, oliletela chilango.
30 N’chifukwa chake anyinji a mwewo ni ofoka komasoti olwala ndipo oŵelengeka afwa.*
31 Koma keno tingaziŵe mwatilili, tingaweluziwelini.
32 Koma olo n’tetyo, tikaweluziwa, niye kuti Yehova watiphunzisa kuti osati tilondele chilango pamozi na chalo.
33 Tetyo akwasu, mukasonkhana kuti mulye Chakulya cha Nchingulo cha Ambuye, mukoyembekezelana.
34 Keno muyakine ali na njala, alye ku ng’anda, kuti mukasonkhana osati muweluziwe. Koma nkhani ziyakine zasala nizaziwone nikazawela kwamene uko.
Malizu a m'nyansi
^ Vuwoneka kuti otanthauza kufwa mwauzimu.