Yoyamba yoluta kuli Akolinto 13:1-13
-
Chikondi—njila ikulu (1-13)
13 Keno nulaŵila vilaŵilo* va ŵanthu na va angelo koma niliye chikondi, nili monga ni belo ikungolila olo chigubu chusokosela.
2 Ndipo keno nili na mphaso yolaŵila vakusogolo, yomvwisha visinsi vonse vopatulika komasoti yoziŵa vinthu vonse, ndipo nili na chikhulupililo chotang’a mwakuti ningakwanishe kufutusha malupili, koma niliye chikondi, vanuchita viliye ntchito.
3 Keno ningapeleke vinthu vangu vonse kuti nilyeshe ayakine, ndipo keno ningapeleke muŵili wangu kuti nilitumbe, koma niliye chikondi, ningapindulelini kalikonse.
4 Chikondi n’choleza ntima komasoti n’chiweme ntima. Chikondi chuchitalini nsanje, chulitumbalini, chulikujalini,
5 chuchitalini vosayenela,* chusamalalini vofuna va chove cheka, chukalipalini ndipo chusungalini vifukwa.
6 Chukondwelalini na vinthu viliye chilungamo, koma chukondwela na choonadi.
7 Chufwichila vinthu vonse, chukhulupilila vinthu vonse, chuyembekezela vinthu vonse komasoti chupilila vinthu vonse.
8 Chikondi chusilalini. Koma keno pali mphaso zokwanisha kulaŵililatu vakusogolo, zizasile. Keno ni kulaŵila vilaŵilo vosiyana-siyana kuzasile. Olo mphaso yoziŵa vinthu, izasile.
9 Chifukwa tuziŵalini vinthu vonse ndipo tulaŵililatu vinthu vakusogolo mopeleŵela.
10 Koma tikazaziŵa vonse, vopeleŵela vamene ivi vizasile.
11 Penenze mwana, nenzelaŵila monga ni mwana, kuganiza monga ni mwana komasoti kuwona vinthu monga ni mwana. Koma lomba panakula, naleka vamasoŵela.
12 Palipano tukwanishalini kuwona bwino-bwino chifukwa tukatishila ntchito chilola chisawoneka bwino, koma pa nthawe yamene iyo tizayambe kuwona bwino-bwino. Palipano nuziŵalini vonse, koma pa nthawe yamene iyo nizaziŵe vinthu vonse monga ni mwakuniziŵila Mulungu newo.
13 Koma lomba vasala vitatu ivi: Chikhulupililo, chiyembekezo na chikondi. Koma chikulu ngako pa vonse vamene ivi ni chikondi.
