Yoyamba yoluta kuli Akolinto 14:1-40
14 Munkhale na chikondi koma mukoyeja-yejasoti kuti mulondele mphaso za mzimu utuŵa, maka-maka mphaso ya kulaŵila vinthu vakusogolo.
2 Chifukwa munthu olaŵila vilaŵilo olaŵilalini na ŵanthu, koma na Mulungu. Paliye akumvwa vakulaŵila, koma yove olaŵila visinsi vopatulika moyavyiwa na mzimu.
3 Koma olo n’tetyo, wala olaŵililatu vakusogolo oyavya ŵanthu ndipo oŵatang’isha komasoti kuŵatonthoja na mawu ŵake.
4 Munthu olaŵila vilaŵilo olitang’isha yeka, koma wala olaŵililatu vakusogolo otang’isha mpingo.
5 Sembe nakonda chendi kuti mwewo monse mukolaŵila vilaŵilo, koma nuwona kuti vingankhale luweme kuti mukolaŵililatu vakusogolo. Kulaŵila chendi wala olaŵililatu vakusogolo opambana olaŵila vilaŵilo, kuchosapo keno wamene uyo olaŵila vilaŵilo omasulila kuti atang’ishe mpingo.
6 Akwasu, kansi mungapindule chinji keno pa nthawe ino ningawele kuli mwewo nulaŵila vilaŵilo vamusaziŵa? Vingankhale voyavya keno ningawele na mawu ŵanalondela kufumila kwa Mulungu, olo mphaso yoziŵa vinthu, olo ulosi, olosoti chiphunziso.
7 Ni volingana na visulo voimbila monga chinonje olo zeze.* Keno kalilidwe kake kangankhale kamo na kamo osachinja-chinja, kansi n’vokwanishika kuziŵa nyimbo yuimbiwa na chinonje olo zeze wamene uyo?
8 Keno lipenga ingalekelila momvwika bwino, niŵani angakonzekele nkhondo?
9 N’chimozi-mozisoti keno mulaŵila visamvwika. Kansi munthu angaziŵe tyani vamulaŵila? Vizankhale monga mulaŵila na mphepo.
10 Pa chalo pali vilaŵilo vinyinji, koma paliye chiliye tanthauzo.
11 Keno nuziŵalini tanthauzo yachilaŵilo nunkhala mulwendo kuli wamene uyo olaŵila, ndipo wamene uyo olaŵila onkhala mulwendo kuli newo.
12 N’chimozi-mozisoti na mwewo. Pakuti mufunishisha mphaso za mzimu, yeja-yejani kunkhala na mphaso zingatang’ishe mpingo.
13 Tetyo wamene olaŵila vilaŵilo apemphele kuti akwanishe kumasulila.
14 Chifukwa keno nupemphela mu chilaŵilo chachilwendo,* mphaso yangu ya mzimu niye yupemphela, koma maganizo ŵangu ochitalini chilichonse.
15 Lomba chofunika n’chinji? Nufunika kupemphela na mphaso ya mzimu, koma nipemphelesoti na mawu omvwika. Niimbe nyimbo zotamanda na mphaso ya mzimu, koma niimbesoti na mawu omvwika.
16 Chifukwa keno moyavyiwa na mphaso ya mzimu mutamanda Mulungu, kansi munthu tyala anganene tyani kuti “Ame” pa pemphelo yanu yotembeja, pakuti oziŵalini vamulaŵila?
17 Ni chendi kuti mupeleka pemphelo yotembeja mu njila iweme, koma munthu muyakine wamene uyo otang’ishiwalini.
18 Nutembeja Mulungu kuti nulaŵila vilaŵilo vinyinji* kupambana mwewo monse.
19 Olo vili tetyo, vingankhale luweme kuti mu mpingo nilaŵile mawu 5 omvwika kuti niphunzise ŵanthu ayakine, kusiyana na kulaŵila mawu 10.000 mu chilaŵilo chachilwendo.*
20 Akwasu, osati munkhale ŵana atontho-atontho pa nkhani yomvwisha vinthu. Koma nkhalani ŵana pa vinthu viipa, ndipo pa nkhani yomvwisha vinthu nkhalani ŵanthu akulu-akulu.
21 M’Chilamulo muli mawu akuti: “‘Aŵa ŵanthu nizalaŵile nawo na mawu a ŵanthu achilwendo, ndipo nizalaŵile nawo na milomo ya ŵanthu achilwendo, koma ove azakane kunimvwila,’ wanena tetyo Yehova.”
22 Tetyo vilaŵilo ni chizindikilo cha osakhulupilila, osati okhulupilila, koma kulaŵililatu vakusogolo ni chizindikilo cha okhulupilila, osati osakhulupilila.
23 Lomba keno mpingo wonse wasonkhana ndipo onse olaŵila vilaŵilo pavuli pake mwaloŵa ŵanthu tyala olo osakhulupilila, kansi azanenelini kuti mitu yanu yuseŵenzalini?
24 Koma keno monse mulaŵililatu vakusogolo, pavuli pake mwaloŵa munthu wosakhulupilila olo munthu tyala, yove ozuzuliwa komasoti ofufuziwa mosamala na mwewo monse.
25 Oziŵa vinthu vofisika va muntima mwake, mwakuti azaŵelame nolambila Mulungu, nonena kuti: “Nichendi Mulungu ali pakati panu.”
26 Lomba vikonkhala tyani akwasu? Mukasonkhana pamozi, muyakine angankhale na salimo,* muyakine chiphunziso, muyakine mawu ŵalondela kufumila kwa Mulungu komasoti muyakine angalaŵile vilaŵilo muyakine n’kumasulila. Mukochita vonse vamene ivi kuti mutang’ishane.
27 Keno pali ŵanthu olaŵila vilaŵilo, osati apitilile aŵili olo atatu ndipo akopasana mpata ndipo muyakine akomasulila.
28 Koma keno paliye omasulila, olaŵila vilaŵilo wamene uyo ankhale chelele mumpingo ndipo akolaŵila na Mulungu chamuntima.
29 Aneneli aŵili olo atatu alaŵile, ndipo ayakine onse akoyeja-yeja kumvwisha tanthauzo ya vamene ivo vakulaŵila ove.
30 Koma keno mneneli muyakine wamene alinkhale pansi walondela mawu kufumila kwa Mulungu, wala woyamba ankhale chelele.
31 Monse mungalaŵililetu vakusogolo, koma mufunika kupasana mpata kuti onse aphunzile komasoti kutang’ishiwa.
32 Ndipo aneneli keno okatishila ntchito mphaso za mzimu ofunika kunkhala olilesha.
33 Chifukwa Mulungu ni Mulungulini wachisokonezo, koma wantendele.
Monga ni mwavilili mmipingo yonse ya atuŵa amene awo,
34 anakazi akonkhala chelele mmipingo, chifukwa n’vosaloleka kuti ove akolaŵila, koma akogonjela, monga ni mwachunenelasoti Chilamulo.
35 Keno pali viyakine vakufuna kumvwisha, akakonshe analume ŵawo ku ng’anda, pakuti n’vochitisha nsoni kuti mwanakazi akolaŵila mumpingo.
36 Kansi mawu a Mulungu efumila kuli mwewo, olo ni mwewo mweka mwiujiwa mawu amene awo?
37 Keno munthu oganiza kuti ni mneneli olo ali na mphaso ya mzimu, ofunika kuvomekeja kuti ivi vanakulembelani ni lamulo ya Ambuye.
38 Koma keno muyakine ovomekejalini vamene ivi, nayesoti azavomekejewelini.*
39 Tetyo akwasu, yeja-yejani kuti mukolaŵililatu vakusogolo, koma olo n’tetyo osalesha ŵala olaŵila vilaŵilo vosiyana-siyana.
40 Koma vinthu vonse vikochitika moyenelela komasoti mwadongosolo.
Malizu a m'nyansi
^ Olo kuti, “gita ya mu nthawe ya kuvuli.”
^ Mu Chigiliki, “mmalilimi.”
^ Mu Chigiliki, “malilimi.”
^ Mu Chigiliki, “mmalilimi.”
^ Olo kuti, “nyimbo zotamanda Mulungu.”
^ Mabaibolo ayakine onena kuti, “keno muyakine angankhale wosaziŵa, apitilije kunkhala wosaziŵa.”