Yoyamba yoluta kuli Akolinto 15:1-58
15 Lomba akwasu, nukukumbushani za uthenga uweme wenilalikila kuli mwewo, wamenesoti mwewo mwiulondela komasoti kuukhulupilila.
2 Mupulumushiwa keno mwakata mwamphamvu uthenga uweme wamene uyo wenilalikila. Koma keno muliye ukate mwamphamvu niye kuti kunkhala kwanu okhulupilila kuliye pindu.
3 Pa vinthu voyambilila venikuphunzisani, vamenesoti newo nivilondela, penze vonena kuti Khilisitu efwela machimo ŵasu, mokatijana na Malemba.
4 Komasoti kuti eikiwa mmanda pavuli pake eushiwa pa nsiku ya chitatu, mokatijana na Malemba.
5 Penzesoti vakuti ewonekela kuli Kefa,* pavuli pake kuli atumwi ŵala 12.
6 Pavuli pake ewonekelasoti kuli akwasu opitilila 500 pa nthawe imozi, ndipo anyinji a ove tikali nawo, koma ayakine eyona mu imfwa.
7 Pechichita tetyo ewonekela kwa Yakobo, pavuli pake kuli atumwi onse.
8 Koma posilijila ewonekela kuli newo, monga lucheche yovyalika masiku akaliye kwana.
9 Newo nine ntontho ngako pa atumwi onse ndipo ninelini woyenelela kuitiwa kuti ntumwi, chifukwa nitamanisha mpingo wa Mulungu.
10 Koma chifukwa cha kuwama ntima kukulu kwa Mulungu, nili tetino monga ni mwanilili. Ndipo kuwama ntima kukulu kwechiniwonesha kuliye pite pa tyala koma nikata ntchito mwakhama kupambana atumwi ayakine onse. Koma olo n’tetyo, niliye chite vamene ivi na mphamvu zangu zeka, koma chifukwa cha kuwama ntima kukulu kwa Mulungu.
11 Keno mwephunzisiwa na newo olo ove, uthenga watulalikila ni umozi na umozi wamene uyo, wamenesoti mweukhulupilila.
12 Lomba keno tulalikila kuti Khilisitu eushiwa, ndaŵa yanji ayakine a mwewo onena kuti akufwa azaushiwelini?
13 Chifukwa keno akufwa azaukelini, niye kuti Khilisitu naye aliye ushiwe.
14 Komasoti keno Khilisitu aliye ushiwe, kulalikila kwasu kuliye pindu, ndipo chikhulupililo chanu chiliyesoti pindu.
15 Komasoti niye kuti nise mboni za wenye za Mulungu, chifukwa keno akufwa azaukelini chendi, tapeleka umboni wotalijila wenye Mulungu kuti eusha Khilisitu koma aliye muushe.
16 Chifukwa keno akufwa azaushiwelini, Khilisitusoti aliye ushiwe.
17 Ndipo keno Khilisitu aliye ushiwe, chikhulupililo chanu chiliye ntchito ndipo machimo ŵanu aliye khululukiwe.
18 Niye kutisoti ophunzila a Khilisitu amene eyona mu imfwa, mphela pawo pepita.
19 Keno chiyembekezo chasu mwa Khilisitu ni cha moyo uno weka, niye kuti nise ŵanthu omvwisha chifundo kupambana ayakine onse.
20 Koma lomba Khilisitu eushiwa nonkhala monga ni chitwazi choyambilila cha ŵala aliyone mu imfwa.
21 Pakuti imfwa iwela kupitila muli munthu yumo, kuuka kwa akufwa kwiwelasoti kupitila muli munthu yumo.
22 Monga mwavilili kuti ŵanthu onse akufwa chifukwa cha Adamu, ŵanthu onse azapasiwesoti moyo kupitila mwa Khilisitu.
23 Koma aliyense pa nthawe yoyenelela: Choyamba Khilisitu wamene ni chitwazi choyambilila, pavuli pake ŵanthu a Khilisitu pa nthawe ya kunkhalapo* kwake.
24 Lomba posilijila pake azapeleke Ufumu kwa Mulungu wake na Atata ŵake, pavuli pakuti wasilija maboma onse, ulamulilo wonse na mphamvu zonse.
25 Chifukwa ofunika kunkhala mfumu nolamulila mpaka Mulungu azaike adani onse pansi pa ulamulilo wake.
26 Nayosoti imfwa yamene ni mdani wosilijila, izawonongewe.
27 Mulungu “eika vinthu vonse pansi pa ulamulilo wake.” Koma pakunena kuti ‘waika vinthu vonse pansi pa ulamulilo wake,’ n’voziŵikilatu kuti opamikijapolini Mulungu wamene uyo, wamene eika vinthu vonse vamene ivo pansi pa ulamulilo wake.
28 Koma vinthu vonse vikazankhala pansi pa ulamulilo wake, Mwana wamene uyosoti azawoneshe kuti ali pansi pa ulamulilo wa Mulungu, kuti Mulungu ankhale vinthu vonse kuli aliyense.
29 Apo yayi, kansi amene obatiziwa kuti ankhale akufwa azachite tyani? Keno akufwa azaushiwelini, ndaŵa yanji ŵanthu amene awo obatiziwa kuti ankhale akufwa?
30 Komasoti ndaŵa yanji sewo tuika moyo wasu pangozi nthawe zonse?
31 Nsiku iliyonse nunkhala pangozi yakuti ningafwe. Vamene ivi n’vachendi monga ni mwavilili vachendi kuti nukumekelani chifukwa cha ushamwali wanu na Khilisitu Yesu Ambuye wasu.
32 Keno niniyatana na vinyama ku Ifenso monga ni mwechichitilasoti ayakine,* nipindulapo chinji? Keno akufwa azaukelini, “tiyeni tilye na kumwa chifukwa mailo tizafwe.”
33 Osasemphewa* kukatijana na ŵanthu aipa kuwononga minkhalidwe iweme.
34 Yambani kuganiza mwanzelu nochita voyenela ndipo osati mukochita chimo. Ayakine a mwewo oziŵalini Mulungu. Nulaŵila vamene ivi kuti nikuchitisheni nsoni.
35 Koma lomba muyakine anganene kuti: “Kansi akufwa azaushiwe tyani? Ndipo azauke na muŵili wotyani?”
36 Wewo munthu usaganiza luweme! Ukakomola chinthu chunkhalalini na moyo peka-peka chikafwa poyamba.
37 Ndipo pokomola, ukomolalini mmela ukulu kale, koma mbewu tyala, keno niya tiligu olo iyakine iliyonse.
38 Koma Mulungu oikulisha mokatijana na kufuna kwake, ndipo mbewu iliyonse ikokula yulinganalini na iyake.
39 Vinthu vonse vili na muŵili wa nyama vunkhalalini volingana. Monga ŵanthu, vinyama, tunyoni komasoti nsomba vili na muŵili wa nyama, koma chilichonse n’chosiyana na chiyake.
40 Palisoti miŵili yakululu komasoti miŵili yapa chalo, koma ulemelelo wa miŵili yakululu niwosiyana na ulemelelo wa miŵili yapa chalo.
41 Ulemelelo wa zuŵa niwosiyana na ulemelelo wa mwezi olosoti wa nyenyezi. Ndipo ulemelelo wa nyenyezi iyakine usiyanasoti na wa nyenyezi iyakine.
42 Niyesoti mwavilili na kuuka. Muŵili wamene ufwichiliwa unkhala kuti ungawonongeke, koma wala uushiwa unkhala kuti ungawonongekelini.
43 Ufwichiliwa uli wonyozeka, koma uushiwa uli waulemelelo. Ufwichiliwa uli wofoka, koma uushiwa uli wamphamvu.
44 Ufwichiliwa uli muŵili wa nyama, koma uushiwa muŵili wauzimu. Keno pali muŵili wa nyama palisoti wauzimu.
45 Pala Malemba onena kuti: “Adamu, wamene enze munthu woyambilila, enkhala munthu wamoyo.” Adamu wosilijila enkhala mzimu wopasa moyo.
46 Koma lomba eyamba kuwela ni munthulini wamene uyo wauzimu. Munthu ali na muŵili wa nyama niye eyamba kuwela pavuli pake munthu wauzimu.
47 Munthu woyamba wamene uyo efumila pa chalo ndipo epangiwa na lito.* Wachiŵili wamene uyo efumila kululu.
48 Ŵanthu opangiwa na lito ali monga ni munthu woyamba wamene uyo wamene epangiwa na lito. Ndipo akululu ali monga ni wamene uyo efumila kululu.
49 Monga ni mwavilili kuti palipano tulingana na wala epangiwa na lito, tizalinganesoti na wamene uyo wakululu.
50 Koma akwasu, ziŵani kuti muŵili wa nyama na milopa vingaloŵelini mu Ufumu wa Mulungu. Komasoti chinthu chingawonongeke chingalondelelini kusawonongeka.
51 Tetekelani, nikuujeni chisinsi chopatulika. Ni tonselini tikuti tizayone mu imfwa, koma tonse tizachinje,
52 mu kanthawe katontho, monga ni kupoila kwa linso, pa kulila kwa lipenga yosilijila. Chifukwa lipenga izalile pavuli pake akufwa azaushiwe na miŵili yakuti ingawonongekelini ndipo tizachinje.
53 Chifukwa miŵili yamene iyi yakuti ingawonongeke izachinje nonkhala yakuti ingawonongekelini. Ndipo miŵili yamene iyi yakuti ingafwe izachinje nonkhala kuti ingafwelini.
54 Koma miŵili yamene iyi yakuti ingakwanishe kuwonongeka ikazankhala yakuti ingawonongekelini, komasoti miŵili yamene iyi yakuti ingafwe ikazachinja nonkhala yakuti ingafwelini, vakunena Malemba vizakwanilishiwe vakuti: “Imfwa yasila* mpaka kale-kale.”
55 “Wewo imfwa, kupambana kwako kuli kuni? Wewo imfwa wamene uleta ululu woyofya, kansi mphamvu yako ili kuni?”
56 Mphamvu yamene yuleta imfwa ni uchimo, koma Chilamulo niye chuwonesha mphamvu ya uchimo.
57 Koma tutembeja Mulungu chifukwa otiyavya kuti tipambane kupitila muli Ambuye wasu Yesu Khilisitu.
58 Tetyo akwasu apa ntima, nkhalani otang’a komasoti osanyang’anyika. Nthawe zonse mukonkhala na vochita vinyinji pa ntchito ya Ambuye, poziŵa kuti vonse vamuchita pa ntchito ya Ambuye vizapitelini pa tyala.
Malizu a m'nyansi
^ Oitiwasoti kuti Petulo.
^ Onani matanthauzo a mawu ayakine.
^ Mabaibolo ayakine onena kuti, “mokatijana na kuwona kwa ŵanthu.”
^ Olo kuti, “Osaluŵilishiwa.”
^ Mu Chigiliki, “lukungu.”
^ Olo kuti, “yachosewa.”
