Yoyamba yoluta kuli Akolinto 3:1-23
3 Tetyo akwasu, niliyekwanishe kulaŵila namwe monga ŵanthu auzimu, koma monga ŵanthu okonda vinthu va m’chalo ichi,* monga tuŵana mwa Khilisitu.
2 Nikupasani mkaka, osati chakulya chotamfunya, chifukwa mwenze mukaliye tang’a mokwanila. Ndipo mpaka lomba mukaliye tang’a mphela,
3 chifukwa mukaliganiza mphela monga ni ŵanthu a m’chalo ichi.* Lomba keno muchitilana nsanje komasoti kukangana mweka-mweka, kansi ivi vuwoneshalini kuti nimwe aku thupi ndipo muchita vinthu monga ni ŵanthu a m’chalo ichi?
4 Keno muyakine onena kuti: “Newo nine wa Paulo,” ndipo muyakine onena kuti: “Newo nine wa Apolo,” kansi ivi vuwoneshalini kuti mulingana na ŵanthu onse?
5 Kansi Apolo ni ŵani? Ndipo Paulo ni ŵani? Sewo tangonkhala tyala atumiki amene tikuyavyani kunkhala okhulupilila, mokatijana na ntchito yechitipasa Ambuye.
6 Newo nikomola, Apolo etilila, koma Mulungu niye ekulisha.
7 Tetyo wofunika ngako niwalalini ekomola olo wala etilila, koma Mulungu wamene okulisha.
8 Wokomola na wotilila okata ntchito ali na cholinga chimozi, koma aliyense azalondele mphoto mokatijana na ntchito yake.
9 Chifukwa nise a ntchito ayake a Mulungu. Mwewo nimwe munda wa Mulungu wamene ulimiwa, ng’anda ya Mulungu.
10 Mokatijana na kuwama ntima kukulu kwechiniwonesha Mulungu, nimanga fandeshoni monga ni mwakuchitila munthu waluso pa ntchito ya vomanga-manga. Koma omanga pa fandeshoni yamene iyo ni munthu muyakine. Tetyo aliyense asamale na mwakumangilapo.
11 Chifukwa paliye munthu muyakine angayambe fandeshoni iyakine kufumyapo iyambiwa kale yamene ni Yesu Khilisitu.
12 Lomba keno munthu omanga pa fandeshoni yamene iyo na golide, siliva, myala yodula ngako, vimiti, uzu, na vimphesi,*
13 ntchito ya aliyense izaziŵike kuti ni yotyani. Nsiku iyakine ntchito yamene iyo izaziŵike mwailili, chifukwa mulilo niye ukuti uzawoneshe vamene ivo patuŵa. Mulilo wamene uyo uzawoneshe kuti ntchito ya munthu aliyense ni yotyani.
14 Keno vawamanga munthu pa fandeshoni yamene iyo vizapitilije kunkhalapo, yove azalondele mphoto.
15 Keno vawamanga vizapye na mulilo, niye kuti vake valuzika, koma yove azapulumuke. Koma olo n’tetyo azankhale monga wapulumuka pamulilo.
16 Kansi mwewo muziŵalini kuti nimwe kachisi wa Mulungu ndipo mzimu wa Mulungu unkhala nkati mwanu?
17 Keno munthu muyakine wawononga kachisi wa Mulungu, Mulungu azamuwononge munthu wamene uyo, chifukwa kachisi wa Mulungu ni ntuŵa, ndipo kachisi wamene uyo ni mwewo.
18 Munthu osati akolitalija wenye. Keno aliyense wa mwewo oganiza kuti ni wanzelu pali ino nthawe,* ankhale wopusa kuti ankhale wanzelu.
19 Kwa Mulungu nzelu za muli ichi chalo n’zopusa, chifukwa Malemba onena kuti: “Yove ochitisha kuti anzelu aponele mmaukuka ŵawo.”
20 Onenasoti kuti: “Yehova oziŵa kuti maganizo a ŵanthu anzelu ni atyala-tyala.”
21 Tetyo osati pankhale munthu wolitumba chifukwa cha ŵanthu, pakuti vinthu vonse ni vanu,
22 keno ni Paulo, Apolo, Kefa,* chalo, moyo, imfwa, vinthu vilipo, olo vinthu vikuza, vonse ni vanu.
23 Mwewo nimwe a Khilisitu ndipo Khilisitu ni wa Mulungu.
Malizu a m'nyansi
^ Mu Chigiliki, “ŵanthu akuthupi.”
^ Mu Chigiliki “ŵanthu akuthupi.”
^ Ayakine onena kuti, “vimpheti.”
^ Onani matanthauzo, a mawu ayakine.
^ Oitiwasoti kuti Petulo.