Yoyamba yoluta kuli Akolinto 4:1-21
4 Ŵanthu akokwanisha kuwona kuti nise atumiki a Khilisitu komasoti atumiki a visinsi vopatulika va Mulungu.
2 Pa nkhani yamene iyi, chofunika kuli atumiki ni kunkhala okhulupilika.
3 Zakuti niweluziwe na mwewo olo na Khoti* iliyonse ya ŵanthu ni nkhanilini kuli newo. Ndipo olo newo nuliweluzalini neka.
4 Mu ntima mwangu nulishushalini pa nkhani iliyonse. Koma vamene ivi vutanthauzalini kuti mphela nine wolungama, chifukwa Yehova niye onifufuza.
5 Tetyo osaweluza chilichonse nthawe ikaliye kwana, mpaka Ambuye azafwike. Yove azachitishe kuti visinsi vamu mfinzi viwonekele komasoti azawoneshe patuŵa vili mu ntima. Pavuli pake aliyense payeka azatembejewe na Mulungu.
6 Lomba akwasu, nalaŵila vinthu vamene ivi vokhuza newo na Apolo kuti mumvwishe mfundo yake na cholinga chakuti muphunzile kuli sewo lamulo yakuti: “Osapitilila vinthu vili lembewe.” Tufunalini kuti aliyense wa mwewo ankhale wolikuja nochita vinthu mokondela.
7 Kansi okuchitisha kunkhala wosiyana na ayakine ni ŵani? Ndipo uli na chinji chauliyechite londela? Lomba keno wichita londela vinthu vamene ivo, lomba ndaŵa yanji ulitumba monga kuti uliyechite londela?
8 Kansi mwakuta kale? Mwalemela kale ayi? Kansi mwayamba kale kulamulila monga ni mafumu paliye sewo? Sembe nakonda chendi kuti mwenze mwayamba kulamulila monga ni mafumu, kuti nasesoti tikolamulila namwe pamozi monga ni mafumu.
9 Nuwona monga Mulungu waika sewo atumwi kumapeto pa sewelo monga ŵanthu akuya paiwa, chifukwa vili monga tili mu gilaundi yochitila sewelo ndipo tuwoneshewa ku chalo, kuli angelo komasoti kuli ŵanthu.
10 Tankhala opusa chifukwa cha Khilisitu, koma mwewo mwankhala ochenjela mwa Khilisitu. Sewo nise ofoka, mwewo nimwe amphamvu. Mwewo mulemekezewa, koma sewo tunyozewa.
11 Mpaka palipano tikali anjala, anjota komasoti awamba. Tikali niyatiwa mphela, tikalisoŵa mphela ponkhala
12 ndipo tikali kata mphela ntchito mwakhama na manja ŵasu. Akotilaŵilila viipa, tudalisa ndipo akotitamanisha tupilila moleza ntima.
13 Akotilaŵilila viipa, tuyankha mofasa. Mpaka palipano, tuwonewa monga ni vinyaswa komasoti vinthu viipa va chalo chonse.
14 Nulembalini vinthu vamene ivi kuti nikuchitisheni nsoni, koma kuti nikulangizeni monga ŵana ŵangu apa ntima.
15 Olo mungankhale na ŵanthu okulolelani 10.000 mwa Khilisitu, muliye azitata anyinji. Newo nine atata ŵanu mwa Khilisitu Yesu chifukwa nikuletelani uthenga uweme.
16 Tetyo nukulimbikisani kuti mukokonkheja newo.
17 N’chifukwa chake nukutumijilani Timoteyo, pakuti yove ni mwana wangu wapantima komasoti wokhulupilika mwa Ambuye. Yove azakukumbusheni mwanuchitila vinthu potumikila Khilisitu Yesu komasoti mwanuphunzisila kulikonse, mumpingo uliwonse.
18 Ayakine olikuja monga kuti nizawelelini kwamene uko kwanu.
19 Koma Yehova akalola niwele kwalombapano, ndipo nizafunelini kumvwa mawu ŵawo olikuja amene awo, koma nizafune kuwona mphamvu zawo.
20 Chifukwa Ufumu wa Mulungu ni nkhanilini ya mawu, koma mphamvu.
21 Kansi mungasankhe chinji? Niwele kuli mwewo na nshamu, olo niwele mwachikondi komasoti mofasa?
Malizu a m'nyansi
^ Olo kuti, “bwalo.”
