Yoyamba yoluta kuli Akolinto 6:1-20
6 Kansi muyakine wa mwewo akankhala na mulandu na muyake, otang’a ntima kuluta ku khoti kuli ŵanthu osalungama, osati kuli atuŵa amene awo?
2 Kansi muziŵalini kuti atuŵa amene awo azaweluze chalo? Ndipo keno muzaweluze chalo, kansi mungakwanishelini kutonga milandu itontho ngako monga ni yamene iyo?
3 Kansi muziŵalini kuti tizaweluze angelo? Kansi tingakangiwe tyani kuweluza nkhani za mmoyo uno?
4 Tetyo keno muli na nkhani za mmoyo uno zofunika kuweluza, kansi mupeleka udindo woweluza kuli ŵanthu amene mpingo ungaŵadalilelini?
5 Nulaŵila vamene ivi kuti nikuchitisheni nsoni. Kansi pakati panu paliye wanzelu olo yumo wamene angaweluze milandu ya akwake?
6 Kansi nkwasu angopeleka nkwake ku khoti, kuli ŵanthu osakhulupilila?
7 Kulaŵila chendi, keno mupelekana ku khoti niye kuti mwakangiliwatu. Tyani kungolola kuphoniyelewa? Tyani kungolola kuiŵiliwa?
8 Mmalo mwake mwewo muchita vinthu viliye chilungamo komasoti muiŵila ayakine ndipo muchitila vamene ivi akwanu.
9 Kansi n’chendi kuti mwewo muziŵalini kuti ŵanthu osalungama azaloŵelini mu Ufumu wa Mulungu? Osasemphewa. Ŵanthu achiwelewele,* olambila mafano, achigololo, analume amene ovomela kuyonewa na analume ayawo, analume oyona analume ayawo,
10 akawalala, adyela, achakolwa, amatafu olo olonda vinthu ayawo, onse amene awo azaloŵelini mu Ufumu wa Mulungu.
11 Ndipo ayakine amwewo mwenze tetyo. Koma mwasambikiwa kunkhala atuŵa, mwankhala apadela, muwonewa monga olungama mu zina ya Ambuye wasu Yesu Khilisitu, komasoti na mzimu wa Mulungu wasu.
12 Vinthu vonse ni vololeka kuli newo, koma ni vonselini vili na pindu. Vinthu vonse ni vololeka kuli newo, koma nilolelini kuti chinthu chiyakine chikonilamulila.
13 Chakulya ni cha luvumo, ndipo luvumo ni yachakulya, koma Mulungu azawononge luvumo pamozi na chakulya. Muŵili niwochitilalini chiwelewele,* koma ni wa Ambuye ndipo Ambuye niye opeleka vofunika mmuŵili.
14 Koma Mulungu eusha Ambuye ndipo azaushesoti sewo ku imfwa pokatishila ntchito mphamvu zake.
15 Kansi muziŵalini kuti miŵili yanu ni vizo va Khilisitu? Lomba kansi newo nitole vizo va Khilisitu novichitisha kunkhala vizo va hule? N’vosakwanishika vamene ivo!
16 Kansi mwewo muziŵalini kuti wamene wayonana na hule onkhala muŵili umo na hule yamene iyo? Chifukwa enena kuti, “Aŵili amene awo azankhale muŵili umo.”
17 Koma wamene wakatijana na Ambuye onkhala naye pamozi mu mzimu.
18 Thaŵani chiwelewele.* Chimo iliyonse yangachite munthu ni yakunja kwa muŵili wake, koma wamene wachita chiwelewele ochimwila muŵili wake.
19 Kansi mwewo muziŵalini kuti muŵili wanu ni kachisi wa mzimu utuŵa uli muli mwewo, wemwipasiwa na Mulungu? Komasoti munecho wa mwewo ni mwewolini,
20 chifukwa mwiguliwa modula ngako. Mulimonse mwavingankhalile, lemekezani Mulungu na miŵili yanu.
Malizu a m'nyansi
^ Mu Chigiliki por·nei′a. Onani matanthauzo a mawu ayakine.
^ Mu Chigiliki por·nei′a. Onani matanthauzo a mawu ayakine.
^ Mu Chigiliki por·nei′a. Onani matanthauzo a mawu ayakine.
