Yoyamba yoluta kuli Akolinto 8:1-13
8 Lomba polaŵila za vakulya vakuti vapelekewa ku mafano, tuziŵa kuti tonse nise oziŵa vinthu. Kuziŵa vinthu kuchitisha munthu kunkhala wolikuja, koma chikondi chulimbikisa.
2 Keno muyakine oganiza kuti oziŵa vinthu viyakine, niye kuti akaliye viziŵa mphela mokwanila.
3 Koma keno munthu okonda Mulungu, wamene uyo niye kuti oziŵika kwa Mulungu.
4 Lomba pa nkhani yakulya vakulya vapelekewa ku mafano, tuziŵa kuti fano nikanthulini komasoti kuti kuliye Mulungu muyakine koma mmozi yeka.
5 Ŵanthu anyinji onena kuti, kuli milungu inyinji, kululu olo pano pa chalo. Tetyo kuli ŵanthu amene awo pali chendi milungu inyinji na ambuye anyinji.
6 Koma kuli sewo Mulungu alipo mmozi yeka, wamene ni Atata. Vinthu vonse vifumila kuli yove, ndipo sewo nise ŵake. Palisoti Ambuye mmozi, Yesu Khilisitu, wamene vinthu vonse vinkhalapo kupitila muli yove, ndipo sewo kupitila muli yove.
7 Koma olo n’tetyo ni onselini oziŵa vamene ivi. Ayakine, chifukwa chakuti poyamba enzelambila mafano, akokulya chakulya chapelekewa ku mafano, ochiwona monga ni chopelekewa chendi ku mafano. Pavuli pake chikumbuntima chawo chuŵavutisha pakuti n’chofoka.
8 Koma chakulya chingatiyavyelini kuvwendela kwa Mulungu. Keno tiliye ulye chakulya chamene icho, tiliye phoniye, ndipo keno talya, niyelini kuti nise aweme ngako kuli yove.
9 Koma mukosamala kuti ufulu wanu wamene uyo wosankha osati unkhale chokhumudwisha kuli ŵanthu ofoka.
10 Keno muyakine angawone wewo uziŵa vinthu ukulya chakulya m’kachisi* wa mafano, kansi chikumbuntima cha munthu wofoka wamene uyo chimulimbikiselini kulya vakulya vapelekewa kuli mafano?
11 Tetyo kuziŵa vinthu kwako kwamene uko kungachitishe kuti uwononge munthu wofoka wamene uyo, nkwako wamene Khilisitu emufwila.
12 Koma mwewo mukophoniyela akwanu teti nowononga chikumbuntima chawo chofoka chamene icho, muchimwila Khilisitu.
13 Tetyo keno chakulya chukhumudwisha nkwangu, nizalyelinisoti nyama olo patontho, kuti osati nikhumudwishe nkwangu.
Malizu a m'nyansi
^ Olo kuti, “m’ng’anda.”