Yoyamba yoluta kuli Akolinto 9:1-27
9 Kansi niliye ufulu wochita vanufuna? Kansi ninelini ntumwi? Kansi niliyewone Yesu Ambuye wasu? Kansi mwewo nimwelini ntchito ya manja ŵangu mwa Ambuye?
2 Keno ninelini ntumwi kuli ayakine, mosachita kaikila nine ntumwi kuli mwewo, chifukwa nimwe chidindo chosimikijila kuti nine ntumwi mwa Ambuye.
3 Yankho yangu kuli onikaikila ni iyi:
4 Kansi tiliye ufulu wa kulya komasoti kumwa?
5 Kansi tiliye ufulu woyenda pamozi na anakazi ŵasu okhulupilila monga ni mwakuchitila atumwi ayakine onse, akwawo ŵa Ambuye komasoti Kefa?*
6 Payakine kansi ninewo neka na Balanaba amene tiliye ufulu woleka kukata ntchito kuti tikofwana vofunika pa moyo?
7 Kansi alipo nsodja wamene otumikila, koma nolilipila yeka? Ni ŵani olima munda wa mpesa koma osalya vitwazi vake? Payakine ni ŵani oteka vifuwo koma osamwa nkaka wa vifuwo vamene ivo?
8 Kansi vamene ivi vanulaŵila ni maganizo tyala a ŵanthu? Kansi Chilamulo chulaŵilalinisoti vamene ivi?
9 Chilamulo cha Mose chunena kuti: “Osati ukomanga ng’ombe kukamwa pa nthawe yayubula mbewu.” Kansi Mulungu angodela nkhaŵa ng’ombe zeka?
10 Payakine kansi enena mawu amene aŵa poganizila sewo? Mawu amene aŵa eŵalemba chendi poganizila sewo, chifukwa munthu olima komasoti obula mbewu ofunika kukata ntchito ali na chiyembekezo chakuti alondele kanthu kayakine.
11 Keno nikupasani vinthu vauzimu,* kansi n’kuphoniya kulondela* vinthu vofunika pa moyo kufumila kuli mwewo?
12 Keno ŵanthu ayakine oyembekezela kuti muŵachitile vamene ivi, lomba kuli tyani na sewo? Koma sewo tiliye ukatishile ntchito ufulu wamene uyo. Koma tupilila vinthu vonse kuti osati tikangishe ayakine kumvwa uthenga uweme unena za Khilisitu.
13 Kansi muziŵalini kuti ŵanthu amene okata ntchito zopatulika akulya vinthu va m’kachisi, ndipo ŵala otumikila ku guwa ya nsembe nthawe zonse olondela viyakine mwa vinthu vupelekewa pa guwa ya nsembe yamene iyo?
14 Komasoti Ambuye elamula kuti ŵanthu olalikila uthenga uweme akofwana vofunika pa moyo kupitila mu uthenga uweme.
15 Koma newo niliye ukatishileko ntchito ufulu wamene uyu. Komasoti niliye lembe vamene ivi kuti niyambe kukatishila ntchito ufulu wamene uyu, chifukwa vingankhale luweme kuti newo nifwe kusiyana nakuti . . . paliye munthu anganilonde vifukwa vuchitisha kuti nilitumbe!
16 Keno nulalikila uthenga uweme, chamene icho ni chifukwalini chakuti nilitumbe, chifukwa nilamuliwa kuchita vamene ivi. Soka kuli newo keno nulalikilalini uthenga uweme.
17 Nikochita vamene ivi mwakufuna kwangu, nizalondele mphoto. Koma olo ningachite mokakamijika, nine mphela wololela mokatijana na udindo wenipasiwa.
18 Lomba kansi mphoto yangu ni yotyani? Niyakuti panulalikila uthenga uweme nikoulalikila mwamahala, kuti osati nikatishile ntchito mophoniyeka ufulu wangu pa vinthu vokhuza uthenga uweme.
19 Olo kuti nili na ufulu, nalichitisha kunkhala kapolo wa ŵanthu onse, kuti niyavye ŵanthu anyinji.
20 Kuli Ayuda ninkhala monga ni Muyuda, kuti niyavye Ayuda. Kuli ŵanthu okonkheja Chilamulo ninkhala monga okonkheja Chilamulo kuti niyavye ŵanthu okonkheja Chilamulo, olo kuti nukonkhejalini Chilamulo.
21 Kuli ŵanthu aliye Chilamulo ninkhala monga ni munthu aliye Chilamulo, kuti niyavye ŵanthu aliye Chilamulo. Nichita vamene ivi olo kuti nukonkheja malamulo a Mulungu komasoti lamulo ya Khilisitu.
22 Kuli ofoka ninkhala wofoka, kuti niyavye ofoka. Nankhala vinthu vonse kuli ŵanthu osiyana-siyana, kuti niyeje-yeje mwaningakwanishile kupulumusha ayakine.
23 Nuchita vinthu vonse chifukwa cha uthenga uweme, kuti nilalikile uthenga wamene uyu kuli ŵanthu ayakine.
24 Kansi muziŵalini kuti ochita mpikishano woutuka outuka onse, koma wamene akuyalondela mphoto ni mmozi tyala? Mukoutuka mu njila yakuti mukalondele mphoto yamene iyo.
25 Munthu aliyense ochita mpikishano onkhala wolilesha pa vinthu vonse. Ŵanthu ochita vamene ivo kuti akalondele nkhata yakumutu yamene yuwonongeka, koma sewo kuti tikafwane nkhata yakumutu yamene ingawonongekelini.
26 Tetyo nikungolini utuka osaziŵa kwanikuya. Mwanuthusila vibaka vangu, nikungoniyatalini mphepo yayi.
27 Koma nuniyata* muŵili wangu nouchitisha kunkhala monga ni kapolo, kuti pavuli pakuti nalalikila kuli ayakine, newo osati ninkhale wosayenelela mu njila iyakine.
Malizu a m'nyansi
^ Oitiwasoti kuti Petulo.
^ Olo kuti, “tikomola vinthu vauzimu muli mwewo.”
^ Mu Chigiliki, “kuweja.”
^ Olo kuti, “kulanga, kukhaulisha.”
