Yoyamba yoluta kuli Atesalonika 1:1-10
1 Newo Paulo nili pamozi na Silivano* komasoti Timoteyo ndipo nulembela mpingo wa Atesalonika, wamene ni wokatijana na Mulungu Atata komasoti Ambuye Yesu Khilisitu kuti:
Kuwama ntima kukulu na ntendele vinkhale na mwewo.
2 Nthawe zonse tutembeja Mulungu tikokutomolani mwewo monse mmapemphelo ŵasu.
3 Tuchita vamene ivi chifukwa nthawe zonse tukumbukila ntchito zanu zachikhulupililo, ntchito zanu zachikondi komasoti kupilila kwanu chifukwa cha chiyembekezo chamuli nacho mwa Ambuye wasu Yesu Khilisitu, pamenso pa Mulungu wamene ni Atata ŵasu.
4 Chifukwa tuziŵa, kuti mwewo akwasu okondewa na Mulungu, yove niye ekusankhani.
5 Tulaŵila tetyo, chifukwa petenzelalikila uthenga uweme kuli mwewo, tenzengolaŵilalini tyala, koma uthenga wamene uyo wenze wamphamvu, wiwela na mzimu utuŵa komasoti tiulalikila na ntima wonse. Namwesoti muziŵa vetikuchitilani pofuna kukuyavyani.
6 Mwilondela mawu amene awo na chisangalalo chaupeleka mzimu utuŵa olo kuti mwenze pamavuto akulu. Pamene apa mwikonkheja sewo komasoti mwikonkheja Ambuye,
7 mwakuti mwinkhala chisanzo kuli okhulupilila onse ku Makedoniya na ku Akaya.
8 Sikuti mawu a Yehova ofumila kuli mwewo amvwika tyala ku Makedoniya na ku Akaya, koma kuyakine kulikonse chikhulupililo chanu mwa Mulungu chafalikila mwakuti sewo tufunikilalini kulaŵilapo kanthu.
9 Chifukwa ove olaŵila mphela za mwetikumanilana na mwewo koyamba komasoti mwemwisiila mafano ŵanu nochinja kuwela kwa Mulungu, kuti mukotumikila Mulungu wamoyo na wachendi.
10 Mwechinjasoti nowela kwa Mulungu kuti mukoyembekezela Mwana wake kufumila kululu, wamene emuusha kwa akufwa. Mwana wamene uyo ni Yesu, wamene etipulumusha ku ukali ukuza.
Malizu a m'nyansi
^ Wamene enzeziŵikasoti kuti Sila.
