Yoyamba yoluta kuli Atesalonika 2:1-20
2 Kulaŵila chendi, mwewo muziŵa akwasu, kuti ulwendo wasu wowela kuli mwewo wenzelini uliye pindu.
2 Chifukwa olo kuti poyamba titamana komasoti kuchitiliwa vinthu viipa ku Filipi, monga ni mwamuziŵila titang’a ntima moyavyiwa na Mulungu wasu kuti tikuujeni uthenga uweme wa Mulungu pa nthawe yamene ŵanthu enzetishusha ngako.*
3 Vatukulimbikisani kuti muchite, vufumilalini mmaganizo ophoniyeka olo oipishiwa ndipo tuvilaŵilalini mwachinyengo.
4 Koma Mulungu wavomekeja kuti tipasiwe ntchito yolalikila uthenga uweme. Tetyo tulaŵilalini na cholinga chokondwelesha ŵanthu, koma Mulungu wamene ofufuza mitima yasu.
5 Ndipo muziŵa kuti tikaliye laŵilapo mawu otembeja mwachinyengo, olo kuchita vinthu vachinyengo na volinga vadyela. Mulungu ni mboni yasu.
6 Komasoti tenzefunalini ulemelelo wofumila kuli ŵanthu, keno kufumila kuli mwewo olo kuli ŵanthu ayakine, olo kuti monga atumwi a Khilisitu sembe tikwanisha kusenga kuti mutilipilile vinthu viyakine kuti mutiyavye.
7 Mmalo mwake tikuwoneshani chikondi komasoti kuwama ntima monga ni mwakuchitila mwanakazi onyonsha posamalila ŵana ŵake mwachikondi.
8 Tetyo pakuti tukukondani ngako, tenzefunishisha* kukuujani uthenga uweme wa Mulungu komasoti kupeleka miyoyo yasu ngayo-ngayo kuti tikuyavyeni.
9 Kulaŵila chendi akwasu, mukumbukila kuti tiyeja-yeja kukata ntchito mwakhama na mphamvu zasu zonse. Tenzekata ntchito usiku na nzuŵa kuti aliyense wa mwewo osati atilipilile kanthu kalikonse pofuna kutiyavya petenze lalikila uthenga uweme wa Mulungu kuli mwewo.
10 Petenze na mwewo okhulupilila, tenze okhulupilika, tenzechita vinthu vachilungamo komasoti tenzeve chifukwa chotiyopejela. Mwewo komasoti Mulungu nimwe mboni zasu.
11 Mwewo muziŵa luweme kuti aliyense wa mwewo tenzemudandaulila, kumutang’isha komasoti kumulangiza monga ni mwakuchitila tata na ŵana ŵake.
12 Tenzechita vamene ivi na cholinga chakuti mupitilije kuyenda mu njila yakufuna Mulungu. Yove niye ekuitani kuti muloŵe mu Ufumu wake nolondela ulemelelo.
13 Kulaŵila chendi, n’chifukwa chake nasesoti tutembeja Mulungu nthawe zonse, chifukwa pemwilondela mawu a Mulungu ŵemwichimvwa kuli sewo, muliye ŵalondele monga ni mawu a ŵanthu koma mwalili chendi monga ni mawu a Mulungu. Mawu amene aŵa okatasoti ntchito muli mwewo okhulupilila.
14 Chifukwa mwewo akwasu mwikonkheja mipingo ya Mulungu yokatijana na Khilisitu Yesu yamene ili ku Yudeya. Tulaŵila tetyo chifukwa mwiyamba kutamanishiwa na ŵanthu akwanu, monga ni mwakutamanishiliwasoti ove na Ayuda.
15 Ove mpaka epaya Ambuye Yesu komasoti aneneli ndipo sewo etitamanisha. Kuyangijila pamene apo, ove okondweleshalini Mulungu, koma ochita vinthu vamene vingapindulishelini ŵanthu onse.
16 Ove ochita vamene ivi pakuyeja kutilesha kulalikila kuli ŵanthu amitundu iyakine vinthu vangachite kuti azapulumuke. Pochita vamene ivi, nthawe zonse oyangijila machimo ŵawo. Koma lomba ukali wake waŵafwana.
17 Koma petikakamijika nosiyana na mwewo akwasu kwa nthawe itontho (pamenso na pamenso osati mu ntima mwasu), tiyeja-yeja ngako kuti tikuwoneni pamenso na pamenso* chifukwa niye vetenzefunishisha ngako.
18 Tetyo tenzefuna kuwela kuli mwewo ndipo newo Paulo niyeja-yeja kuti niwele, osati tyala kamozi koma kaŵili, koma Satana echingilija njila yasu.
19 Kansi chiyembekezo chasu olo chisangalalo chasu n’chinji? Kansi mphoto* yati tizamekele pamenso pa Ambuye wasu Yesu, pa nthawe yakunkhalapo kwake n’chinji? Kansi ni mwewolini?
20 Kulaŵila chendi, mwewo nimwe ulemelelo wasu komasoti chisangalalo chasu.
Malizu a m'nyansi
^ Mabaibolo ayakine onena kuti, “nthawe yetenzevutika ngako.”
^ Olo kuti, “tenze okondwela.”
^ Mu Chigiliki, “tiwone vinso vanu.”
^ Mu Chigiliki, “chisote cha nsimbi chuwoneka monga ni nkhata.”
