Yoyamba yoluta kuli Atesalonika 3:1-13
3 Tetyo petikangiwasoti kupilila, tiwona kuti vili luweme kuti tipitilije kunkhala ku Atene.
2 Lomba titumija Timoteyo nkwasu wamene ni ntumiki wa Mulungu* wamene olalikila uthenga uweme unena za Khilisitu. Timutumija kuti azakutang’isheni nokutonthojani na cholinga chakuti chikhulupililo chanu chinkhale chotang’a.
3 Tichita vamene ivi kuti osati papezeke aliyense wamene chikhulupililo chake chafoka* na masauso amene aŵa. Chifukwa mwewosoti muziŵa kuti tingapewelini kukumana na mavuto monga ni amene aŵa.*
4 Chifukwa petenze namwe pamozi, tenzekuujilantuni kuti tizakumane na mavuto ndipo monga ni mwamuziŵila, vamene ivo vetenzekuujani niye vachitika chendi.
5 N’chifukwa chake penikangiwasoti kupilila, nituma Timoteyo kuli mwewo kuti niziŵe za kukhulupilika kwanu. Nenzedela nkhaŵa kuti payakine Mdyelekezi ekuyesani ndipo nenzeganiza kuti ntchito yetikata mwakhama ichingopita patyala.
6 Koma Timoteyo wafwika lombapano kuno kufumila kwamene uko ndipo watiuja nkhani iweme yokhuza kukhulupilika kwanu komasoti chikondi chanu. Watiuja kuti mupitilija kutikumbukila ndipo mutikonda komasoti wanena kuti mufunishisha kutiwona monga ni mwatufunishishilasoti sewo kukuwonani.
7 N’chifukwa chake akwasu, mmavuto ŵasu onse* komasoti mmasauso ŵasu onse tatonthojewa chifukwa cha mwewo komasoti chifukwa cha kukhulupilika kwamuwonesha.
8 Chifukwa sewo tufwana mphamvu* mwewo mukankhala otang’a mwa Ambuye.
9 Kansi tingamuwejele chinji Mulungu powonesha kutembeja chifukwa cha chisangalalo chikulu chatili nacho pamenso pa Mulungu wasu chifukwa cha mwewo?
10 Usiku na nzuŵa tupemphela mopapatila kufumila pansi pa ntima kuti tizakuwoneni pamenso na pamenso* nokupasani vinthu vamufunikila kuti chikhulupililo chanu chinkhale chotang’a.
11 Tetyo Mulungu wamenesoti ni Atata ŵasu komasoti Ambuye wasu Yesu atiyavye kuti tikwanishe kuwela kuli mwewo.
12 Kuyangijila pamene apa, Ambuye akuyavyeni kuti mukokondana ngako komasoti kuti mukokonda ŵanthu ayakine monga ni mwatukukondelani sewo.
13 Achite vamene ivi kuti atang’ishe mitima yanu kuti munkhale muliye chophoniya komasoti atuŵa pamenso pa Mulungu wamene ni Atata ŵasu, pa nthawe ya kunkhalapo kwa Ambuye wasu Yesu, pamozi na atuŵa ŵake onse.
Malizu a m'nyansi
^ Mabaibolo ayakine onena kuti, “wamene ni wantchito muyake wa Mulungu.”
^ Mu Chigiliki, “wamene waluŵila.”
^ Olo kuti, “muziŵa kuti tufunikila kukumana na vamene ivi.”
^ Mu Chigiliki, “pa vosoŵa vasu vonse.”
^ Mu Chigiliki, “tunkhala na moyo.”
^ Mu Chigiliki, “kuti tizawone vinso vanu.”
