Yoyamba ya Petulo 1:1-25
1 Newo Petulo ntumwi wa Yesu Khilisitu, nulembela mwewo osankhiwa na Mulungu, amene nimwe alwendo muli ichi chalo amene muli mwajikane ku Ponto, ku Galantiya, ku Kapadokiya, ku Asia na ku Bituniya.
2 Nulembela mwewo amene Mulungu Atata eziŵilatu za mwewo. Yove ekupasani mzimu wake kuti munkhale atuŵa. Echita vamene ivi kuti munkhale omvwila komasoti kuti akutuŵisheni na milopa ya Yesu Khilisitu.
Nusenga Mulungu kuti akuwonesheni chifundo chake chikulu komasoti kuti munkhale na ntendele.
3 Atamandike Mulungu wa Ambuye wasu Yesu Khilisitu, wamenesoti ni Atata ŵake. Mulungu etiwonesha chifundo chikulu pechichitisha kuti tivyalikesoti mwanyowani nonkhala na chiyembekezo chodalilika. Vamene ivi vikwanishika chifukwa cha kuushiwa kwa Yesu Khilisitu.
4 Echitisha kuti tivyalikesoti mwanyowani kuti tinkhale na chuma chisawonongeka, chosaipishiwa komasoti chosasila. Chuma chamene ichi ekusungilani kululu.
5 Esungila mwewo amene Mulungu okutetezani na mphamvu zake chifukwa muli na chikhulupililo. Mulungu okutetezani kuti muzalondele chipulumuso, ndipo chipulumuso chamene ichi chizawonekele mu nthawe yamapeto.
6 Pa chifukwa chamene ichi, musangalala ngako palipano olo kuti n’vofunikila kuti mutamane kwa nthawe itontho chifukwa cha mayeselo osiyana-siyana ŵamukumana nawo.
7 Vamene ivi vukuchitikilani kuti chikhulupililo chanu chizachitishe kuti mutamandiwe komasoti kulondela ulemelelo na ulemu, Yesu Khilisitu akazawonekela.* Chikhulupililo chamene icho chayesewa ndipo ni chantengo wapatali kupambana golide wamene uwonongeka mphela olo kuti wepitishiwa pa mulilo.
8 Olo kuti Khilisitu wamene uyo muliye muwonepo, mumukonda. Ndipo olo kuti mumuwonalini pali pano, mumukhulupilila ndipo mukondwela na chisangalalo chikulu ngako,
9 pakuti nimwe osimikija kuti chikhulupililo chanu chizakuchitisheni kuti muzapulumuke.
10 Aneneli elosela za kuwama ntima kukulu kwechikuwoneshani Mulungu, efufuza za chipulumuso chamene ichi mwakhama komasoti mosamala ngako.
11 Mzimu utuŵa winenelatu kuti Khilisitu azatamane ndipo pavuli pake azalondele ulemelelo. Aneneli enzesakila-sakila vizindikilo vechiwoneshewa na mzimu utuŵa* vokhuza nthawe ngayo-ngayo komasoti nyengo yati vizachitike vamene ivi.
12 Mulungu euja aneneli amene awo kuti enzelitumikilalini ŵeka, koma enzetumikila mwewo. Tetyo vinthu vamene ivi vaululiwa na ŵanthu amene olengeza uthenga uweme kuli mwewo moyavyiwa na mzimu utuŵa wofumila kululu. Angelo ofunishisha kumvwisha vinthu vamene ivi.
13 Tetyo konzekeleshani maganizo ŵanu kuti mukate ntchito mwamphamvu. Munkhale mphela oganiza luweme ndipo mukoyembekezela na ntima wonse kuwama ntima kukulu kwakuti azakuwonesheni, Yesu Khilisitu akazawonekela.*
14 Monga ŵana omvwila, lekani kuchita vinthu vemwenzekumbwila mukaliyeziŵa Mulungu.
15 Koma molingana na ntuŵa wamene ekuitani, namwesoti munkhale atuŵa mminkhalidwe yanu yonse,
16 chifukwa Malemba onena kuti: “Munkhale atuŵa, chifukwa newo nine ntuŵa.”
17 Chifukwa keno musenga vinthu kwa Atata, amene aliye sankho poweluza mokatijana na vakuchita aliyense, mukochita vinthu vuwonesha kuti muyopa Mulungu pamunkhala alwendo muli ichi chalo.
18 Mwewo muziŵa kuti vinthu vikumasulani* ku moyo uliye pindu wemwitolela kufumila kuli makolo ŵanu, venzelini vinthu vokwanishika kuwonongeka monga siliva olo golide.
19 Koma mwemasuliwa na milopa ya ntengo wapatali ya Khilisitu, yamene yulingana na milopa ya mbelele iliye kalema komasoti iliye maŵala.
20 N’chendi, Mulungu esankhilatu Khilisitu, ŵanthu akaliye yamba kuvyalana pano pa chalo, ndipo ewonekela pa nthawe ya mapeto chifukwa cha mwewo.
21 Kupitila muli yove, mwewo mukhulupilila Mulungu wamene emuusha kwa akufwa nomupasa ulemelelo, na cholinga chakuti chikhulupililo komasoti chiyembekezo chanu vinkhale mwa Mulungu.
22 Pakuti mwalituŵisha ponkhala omvwila choonadi cha m’Mawu a Mulungu ndipo lomba mukonda akwasu paliye chinyengo, mukokondana ngako kufumila mu ntima.
23 Mwewo mwavyalikasoti mwanyowani kupitila m’Mawu a Mulungu wamoyo na wosasila. Muliyevyalike kufumila mu mbewu yamene ingakwanishike kuwonongeka, koma mu mbewu yamene ingawonongekelini.
24 Pakuti “ŵanthu onse ali monga ni uzu, ndipo ulemelelo wawo wonse uli monga ni maluŵa akusanga. Uzu ufota ndipo maluŵa ombwela,
25 koma mawu a Yehova azankhalepo mpaka kale-kale.” “Mawu” amene aŵa ni uthenga uweme wamene wilengezewa kuli mwewo.
Malizu a m'nyansi
^ Mu Chigiliki, “akezeululika.”
^ Olo kuti, “mzimu utuŵa wamene wenze muli ove.”
^ Onani mawu amnyansi pa vesi 7.
^ Mu Chigiliki, “vikuwombolani.”
