Yoyamba yoluta kuli Timoteyo 1:1-20
1 Nine Paulo, ntumwi wa Khilisitu Yesu molamuliwa na Mulungu wamene ni Mpulumusi wasu komasoti molamuliwa na Khilisitu Yesu, wamene ni chiyembekezo chasu.
2 Nulembela wewo Timoteyo,* mwana wangu ngaye-ngaye mu chikhulupililo:
Mulungu Atata ŵasu na Khilisitu Yesu Ambuye wasu akupase kuwama ntima kukulu, chifundo na ntendele.
3 Penisala patontho kuluta ku Makedoniya, nikusenga kuti unkhale mphela ku Ifenso. Nukusengasoti kuti unkhale mphela kwamene uko na cholinga chakuti uleshe ŵanthu ayakine kuti osati akophunzisa vosiyana na vatuphunzisa sewo,
4 komasoti kuti osati akomvwila nkhani za wenye nofufuzana mibadwo ya makolo. Vamene ivi ni vosayavya, koma vuyambisha tyala nkhani ziliye umboni ndipo vuphunzisalini ŵanthu chilichonse chofumila kwa Mulungu chokhuza chikhulupililo.
5 Cholinga cha malangizo amene aŵa n’chakuti tinkhale na chikondi chofumila muntima utuŵa, mu chikumbuntima chiweme komasoti mu chikhulupililo chiliye chinyengo.
6 Ŵanthu ayakine akana kukonkheja vamene ivi ndipo aluŵilishiwa noyamba kukonkheja nkhani zatyala-tyala.
7 Ŵanthu amene aŵa ofuna kunkhala aphunzisi a chilamulo koma omwishalini vakunena olo mfundo zakuyumilila.
8 Tuziŵa kuti Chilamulo n’chiweme keno munthu ochikatishila ntchito moyenelela.
9 Ndipo lamulo yuikiwalini chifukwa cha munthu wolungama. Koma yuikiwa chifukwa cha ŵanthu asamvwila malamulo, oukila ayawo, asayopa Mulungu, ochimwa, asakhulupilika, onyoza vinthu vopatulika, opaya atata ŵawo, amayi ŵawo komasoti ŵanthu ayakine,
10 achiwelewele,* analume amene oyonana na analume ayawo, oiŵa ŵanthu, awenye, olumbila mwawenye komasoti ochita chilichonse chisakatijana na mfundo za chilungamo zakuphunzisa Mulungu.
11 Mfundo zamene izi zukatijana na uthenga uweme waulemelelo wofumila kwa Mulungu wachisangalalo wamene euika mmanja mwangu.
12 Nutembeja Khilisitu Yesu Ambuye wasu, wamene enipasa mphamvu nonipasasoti utumiki chifukwa ewona kuti nine wokhulupilika.
13 Echita tetyo olo kuti kale nenzenyoza Mulungu, nenzetamanisha ŵanthu ŵake komasoti nenzechita vinthu mosoŵa ulemu. Koma olo n’tetyo enichitila chifundo chifukwa nenzechita vinthu mosaziŵa komasoti nenzeve chikhulupililo.
14 Koma nilondela kuwama ntima kukulu kwa Mulungu Ambuye ŵasu. Nilondelasoti chikhulupililo na chikondi cha Khilisitu Yesu.
15 Mawu akuti Khilisitu Yesu ewela m’chalo kuzapulumusha ochimwa, ni mawu achendi komasoti oyenelela kuŵavomekeja na ntima wonse. Pa ochimwa amene aŵa, newo niye wochimwa ngako.
16 Koma olo n’tetyo, nichitiliwa chifundo kuti Khilisitu Yesu awoneshe kuleza ntima kwake konse kupitila muli newo wochimwa ngako, kuti chinkhale chisanzo kuli ŵala amene akuti azamukhulupilile na cholinga chakuti azafwane moyo wosasila.
17 Kwa Mulungu yeka wamene ni Mfumu yosasila, wamene akufwalini komasoti asawoneka, kunkhale ulemu na ulemelelo mpaka kale-kale. Ame.
18 Mwana wangu Timoteyo, nukulangiza kuchita vamene ivi mokatijana na maulosi amene enenelatu vokhuza wewo, kuti mokatijana na maulosi amene awo upitilije kuniyata nkhondo iweme.
19 Unkhale na chikhulupililo komasoti chikumbuntima chiweme chamene ŵanthu ayakine aleka kuchikonkheja, mwakuti chikhulupililo chawo chafwaika monga ni bote.
20 Ayakine mwa ŵanthu amene aŵa ni Hemenayo na Alekizanda, ndipo naŵapeleka kwa Satana kuti akalangiwa aphunzilepo kanthu noleka kunyoza Mulungu.