Yoyamba yoluta kuli Timoteyo 3:1-16
3 Mawu aŵa ni achendi: Keno munthu oyeja-yeja kuti ankhale wololela ofuna ntchito iweme.
2 Tetyo wololela ofunika kunkhala aliye chifukwa chomulaŵilila vinthu viipa, mwanalume wamene ali na mwanakazi mmozi, asachita vinthu mopitilila malile, woganiza luweme, wochita vinthu mwadongosolo, wolondela luweme alwendo komasoti woziŵa kuphunzisa.
3 Osati ankhale munthu wamene akumwa walwa mwauchakolwa, olo wankhanza* koma wololela. Osati ankhalesoti wokonda kukangana, olo wokonda ndalama.
4 Ankhale mwanalume osogolela luweme banja yake komasoti wamene ŵana ŵake omumvwila na ntima wonse.
5 (Keno munthu oziŵalini kusamalila banja yake, lomba kansi mpingo wa Mulungu angausamalile tyani?)
6 Osati ankhale munthu wamene wangobatiziwa kwalombapano* kuchitila kuti angayambe kulitumba chifukwa cha kumeka nolondela chiweluzo cholingana na chechilondela Mdyelekezi.
7 Ankhalesoti na mbili iweme kuli ŵanthu asakhulupilila* kuti osati anyozewe na ŵanthu komasoti kukashiwa na ukuka wa Mdyelekezi.
8 Nawosoti atumiki oyavya ankhale aliye masoŵela, asalaŵila mwachinyengo,* asamwa ngako vinyu komasoti asakonda kufwana pindu mwachinyengo.
9 Ankhale osunga chisinsi chopatulika cha chikhulupililo, ali na chikumbuntima chituŵa.
10 Komasoti amene aŵa ayesewe poyamba kuti keno ni oyenelela, ndipo keno aliye chifukwa choŵalaŵilila vinthu viipa angankhale atumiki oyavya.
11 Nawosoti anakazi ankhale aliye masoŵela, ochita vinthu mosapitilila malile, okhulupilika pa vinthu vonse ndipo osati ankhale atonjo.
12 Atumiki oyavya ankhale analume amene ali na mwanakazi mmozi, ololela luweme ŵana ŵawo na mabanja ŵawo.
13 Chifukwa analume amene otumikila luweme onkhala na mbili iweme na ufulu ukulu wolaŵila za chikhulupililo chamene chili mwa Khilisitu Yesu.
14 Nukhulupilila kuti niwele kwalombapano, koma nukulembela vamene ivi
15 kuti keno ningachelwe, uziŵe vaufunikila kuchita m’ng’anda ya Mulungu, yamene ni mpingo wa Mulungu wamoyo. Mpingo wamene uyo niye ulimbikisa noteteza choonadi.
16 Kulaŵila chendi, chisinsi chopatulika chokhuza kunkhala olipeleka kwa Mulungu kwamene uku ni chikulu: ‘Yove ewonekela monga munthu, ewonewa kuti ni wolungama pa nthawe yamene enze mzimu, ewonekela kwa angelo, elalikiliwa ku mitundu ya ŵanthu, ŵanthu pano pachalo emukhulupilila komasoti elondelewa kululu mu ulemelelo.’
Malizu a m'nyansi
^ Olo kuti, “wandewo; wachiwawa.”
^ Mu Chigiliki, “wamene wachinja kwalombapano.”
^ Amene aŵa ni ŵanthu amene alilini mu mpingo wa Chikhilisitu.
^ Olo kuti, “asalaŵila paŵili.”
