Yoyamba yoluta kuli Timoteyo 5:1-25
5 Mwanalume wachikulile osati ukomuzuzula mokalipa, koma ukolaŵila naye mowama ntima monga ni atata ŵako. Analume achilumbwana ukolaŵila nawo monga ni enekwako
2 ndipo anakazi achikulile ukolaŵila nawo monga ni amayi ŵako. Anakazi achisimbi ukolaŵila nawo monga ni azilongosi ŵako, ndipo pochita vamene ivi osati ukonkhala na maganizo aliwonse aipa.
3 Ukoganizila* anakazi amasiye amene ni amasiye chendi.*
4 Koma keno mwanakazi wamasiye ali na ŵana olo azizikulu, ove ofunikila kunkhala oyamba kusamalila ŵanthu a m’banja yawo powonesha kuti ni olipeleka kwa Mulungu. Akojoshela kuli makolo ŵawo komasoti ambuya ŵawo na asikulu ŵawo vakufunikila chifukwa vamene ivi vukondwelesha Mulungu.
5 Mwanakazi wamene ni wamasiye chendi, wamene aliye angamusamalile, odalila Mulungu ndipo opitilija kupemphela nomupapatila usiku na nzuŵa.
6 Koma wamene ongochita tyala vinthu pokonkheja vilakolako vake, ni wakufwa olo kuti ali na moyo.
7 Tetyo, upitilije kuŵapasa malangizo* amene aŵa kuti osati ankhale na chifukwa choŵalaŵilila viipa.
8 Kulaŵila chendi, keno munthu osamalilalini ŵanthu amene ni udindo wake kuŵasamalila, maka-maka a m’banja yake, wakana chikhulupililo ndipo ni muipa kupambana munthu asakhulupilila.
9 Mwanakazi wamasiye wamene angalembewe pa ndandanda ya anakazi amasiye, ofunikila kunkhala wa vyaka vupitilila 60. Ankhalesoti wamene anze wokhulupilika kuli mwanalume wake,*
10 oziŵika kuti ekata ntchito ziweme, elela luweme ŵana ŵake enzelondela luweme alwendo, esambika mendo ŵa atuŵa, eyavya ŵanthu amene enze pa mavuto komasoti enzekata ntchito iliyonse iweme molipeleka.
11 Koma osati uike anakazi amasiye achisimbi pa ndandanda yamene iyi, chifukwa keno akopeka na chilakolako chofuna mwanalume mmalo motumikila Khilisitu, osankha kulunguliwa.
12 Vikachitika tetyo, owoneka kunkhala ophoniya chifukwa aliye sunge lonjezo yawo.*
13 Komasoti paliye chilichonse chakuchita, ndipo onkhalila tyala kuyenda-yenda m’mang’anda mwa ayawo. Kuyangijila pa kungonkhala osachita chilichonse, okondasoti tonjo, kuloŵelela nkhani za anecho, komasoti kulaŵila vinthu vamene ofunikilalini kuvilaŵila.
14 Tetyo ningakonde kuti anakazi achisimbi amene ni amasiye akolunguliwa, kuvyala ŵana, komasoti kusamalila banja na cholinga chakuti ŵala oshusha osati atifwane na chifukwa.
15 Ndipo ayakine aluŵilishiwa kale mwakuti ayamba kukonkheja Satana.
16 Keno mwanakazi aliyense wokhulupilila ali na enekwake amene ni anakazi amasiye, yove akoŵayavya, kuti anakazi amasiye amene awo osati akochitisha kuti mpingo ukopanikijika. Vikankhala tetyo, mpingo wamene uyo ungakwanishe kuyavya anakazi amene ni amasiye chendi.*
17 Akulu amene osogolela luweme akolemekezewa ngako, maka-maka amene ochita khama polaŵila mawu a Mulungu komasoti kuphunzisa.
18 Pala Mawu a Mulungu onena kuti: “Osati ukomanga ng’ombe pakamwa payubula* mbewu.” Komasoti onena kuti: “Wantchito ofunikila kulondela malipilo ŵake.”
19 Osavomekeja mulandu wolaŵilila mwanalume wachikulile* vinthu viipa, kupatulapo keno pali mboni ziŵili olo zitatu.
20 Ŵanthu amene ali na chiyoloŵezi chochita chimo, ukoŵazuzula pamenso pa ŵanthu onse kuti ayakine ankhale na wowa.*
21 Nukulamula mwamphanvu, pamenso pa Mulungu na Khilisitu Yesu komasoti angelo ochita sankhiwa, kuti ukokonkheja malangizo amene aŵa paliye kuchita sankho olo kukondela.
22 Osakulumija kuika munthu aliyense pa udindo,* olo kuyaŵana na ŵanthu ayakine machimo ŵawo. Pitilija kunkhala na nkhalidwe ituŵa.
23 Osati ukokumwasoti manzi,* koma ukokumwa vinyu patontho, chifukwa cha vuto yako yala ya mmala komasoti kulwala-lwala kwako.
24 Machimo a ŵanthu ayakine oziŵika kuli ŵanthu, ndipo oweluziwa nthawe yamene iyo. Koma machimo a ŵanthu ayakine akuzawonekela pakapita nthawe.
25 Nazosoti ntchito ziweme zuziŵika kuli ŵanthu, ndipo zala zisaziŵika zingafisikelini mpaka kale-kale.
Malizu a m'nyansi
^ Mu Chigiliki, “Ukolemekeza.”
^ Olo kuti, “anakazi amasiye amene osoŵa chendi vinthu”; kutanthauza kuti aliye angaŵayavye.
^ Olo kuti, “malamulo.”
^ Mu Chigiliki, “mwanakazi wamene enze na mwanalume mmozi.”
^ Mu Chigiliki, “chikhulupililo choyamba.”
^ Olo kuti, “anakazi amasiye amene osoŵa chendi vinthu”; kutanthauza kuti aliye angaŵayavye.
^ Onani matanthauzo a mawu ayakine.
^ Olo kuti, “nkulu.”
^ Olo kuti, “inkhale chenjezo kuli ayakine onse.”
^ Mu Chigiliki, “kuika manja ŵako pamutu.”
^ Olo kuti, “Uleke kumwa manzi ŵeka.”