Yoyamba yoluta kuli Timoteyo 6:1-21
6 Ŵanthu onse amene ni akapolo akowona kuti mabwana ŵawo owamila kulemekezewa na ntima wonse, kuti zina ya Mulungu komasoti vakutiphunzisa osati vinyozewe.
2 Komasoti akapolo amene mabwana ŵawo ni Akhilisitu osati akoŵachitila vinthu mosoŵa ulemu powona kuti ni akwasu. Mmalo mwake, akokata ntchito mwakhama ngako, chifukwa ntchito yawo iweme yamene iyo yuyavya Akhilisitu ayawo amene oŵakonda.
Pitilija kuphunzisa vinthu vamene ivi komasoti kulimbikisa ŵanthu kuti akochita vamene ivi.
3 Keno munthu ophunzisa vinthu vawenye, ndipo ovomekejalini malangizo aweme ofumila kuli Ambuye wasu Yesu Khilisitu, komasoti vinthu vatuphunzila vamene vukatijana na kulipeleka kwasu kwa Mulungu,
4 munthu wamene uyo ni wolitumba komasoti womeka ndipo omvwishalini kalikonse. Mmalo mwake, okonda kukangana komasoti kushushana pa mawu. Vamene ivi vuyambisha nsanje, mikangano, kulaŵililana mawu aipa komasoti kuganizilana vinthu viipa.
5 Vuchitishasoti kuti ŵanthu obenda maganizo komasoti asaziŵa choonadi, akokangana pa vinthu vitontho-vitontho poganiza kuti kunkhala wolipeleka kwa Mulungu ni njila yofwanila pindu.
6 Ni chendi kuti kunkhala wolipeleka kwa Mulungu komasoti kunkhala wokhutila na vatili navo, ni njila yofwanila pindu ikulu.
7 Pala tiliye wele na kanthu m’chalo ndipo tingafumemolini na kanthu.
8 Tetyo, keno tili na chakulya, vovwala, na poyona, tikonkhala okhutila na vinthu vamene ivi.
9 Koma ŵanthu ofunishisha kulemela okumana na mayeselo komasoti okashiwa na ukuka. Ove okumbwa vinthu vamene vingaŵaike pangozi komasoti ochita vinthu mosoŵa nzelu. Vamene ivi vuŵawononga komasoti kuŵaletela mavuto.
10 Chifukwa kukonda ndalama kuyambisha* mavuto a ntundu uliwonse, ndipo chifukwa chokopeka na chikondi chamene ichi, ayakine aleka kunkhala na chikhulupililo ndipo aliletela mavuto anyinji pa muŵili wawo.
11 Koma wewo munthu wa Mulungu, thaŵa vinthu vamene ivi. Mmalo mwake yeja-yeja kunkhala wachilungamo, wolipeleka kwa Mulungu, wachikhulupililo, wachikondi, wopilila komasoti wofasa.
12 Niyata nkhondo iweme ya chikhulupililo. Kata mwamphamvu moyo wosasila wechikuitila. Pala wilengeza momvwika luweme vokhuza moyo wamene uyu pamenso pa mboni zinyinji.
13 Pamenso pa Mulungu, wamene oyavya kuti vinthu vonse vinkhale mphela na moyo komasoti pamenso pa Khilisitu Yesu, wamene epeleka umboni uweme ngako pamenso pa Pontiyo Pilato, nukulamula
14 kuti ukosunga malamulo. Ukoŵasunga uli ntuŵa komasoti uliye chifukwa chokulaŵilila viipa mpaka pakuti azawonekele Ambuye wasu Yesu Khilisitu.
15 Yove ni wachisangalalo, ni Wamphamvu komasoti ni Mfumu ya mafumu na Mbuye wa ambuye, ndipo azawonekele pa nthawe yake.
16 Yove ali na moyo wakuti ungafwelini ndipo onkhala pa malo ongweleŵela ngako mwakuti paliye munthu angafwikepo. Paliyesoti munthu wamene emuwonapo olo wamene angamuwone. Yove apasiwe ulemu ndipo mphamvu zake zinkhalepo mphela mpaka kale-kale. Ame.
17 Ulangize* ŵanthu achuma m’chalo ichi* kuti osati ankhale olikuja, komasoti kuti osati akodalila chuma chosadalilika, koma akodalila Mulungu, wamene otipasa na ntima wonse vinthu vonse vatusangalala navo.
18 Uŵauje kuti akochita viweme, ankhale olemela pa ntchito ziweme, opasa komasoti okonzeka kuyaŵila ayakine
19 kuti asunge luweme chuma chofumila kwa Mulungu chamene ni fandeshoni iweme ya sogolo yawo na cholinga chakuti akate mwamphamvu moyo ngawo-ngawo.
20 Timoteyo, usunge luweme vinthu vewilondela kwa Mulungu. Ukopewa nkhani za tyala-tyala zamene zuipisha vinthu vituŵa. Ukopewasoti kushushana pa vinthu vawenye vakunena ayakine kuti ni “kuziŵa vinthu.”
21 Chifukwa choliwoneshela na kuziŵa vinthu kwamene uku, ayakine aleka kunkhala na chikhulupililo.
Kuwama ntima kukulu kunkhale namwe.
Malizu a m'nyansi
^ Mu Chigiliki, “ni muju wa.”
^ Olo kuti, “Ulamule.”
^ Olo kuti, “a m’nthawe ino.” Onani matanthauzo a mawu ayakine.
