Yoyamba ya Yohani 1:1-10
1 Tukulembelani vokhuza wamene enzepo kufumila pachiyambi, wamene oleta mawu opasa moyo, wamene timumvwa komasoti kumuwona na menso ŵasu, wamene tamuloleshesha modabwa komasoti kumukumya na manja ŵasu.
2 (Sewo tawona ndipo tuchitila umboni nokuujani za moyo wosasila wamene wefumila kwa Atata ndipo wiwoneshewa kuli sewo.)
3 Tukuujani vatawona komasoti kuvimvwa, kuti namwesoti mukatijane na sewo. Ndipo nise okatijana na Atata komasoti Mwana wake Yesu Khilisitu.
4 Tetyo tulemba vamene ivi kuti tinkhale okondwela ngako.
5 Sewo tamvwa uthenga kufumila kuli yove ndipo tuulalikila kuli mwewo. Uthenga wake ni wakuti, Mulungu niye kungweleŵela ndipo kuli yove kuliye mfinzi olo patontho.
6 Keno tunena kuti, “Nise okatijana naye,” koma tupitilija kuyenda mu mfinzi, niye kuti tutala wenye ndipo tuchitalini vinthu mokatijana na choonadi.
7 Koma keno tuyenda mu kungweleŵela molingana na mwalilisoti yove, niye kuti nise okatijana ndipo milopa ya Yesu wamene ni Mwana wake, yutituŵisha ku machimo onse.
8 Keno tunena kuti, “Tiliye uchimo,” niye kuti tulitalija wenye ndipo mu ntima mwasu muliye choonadi.
9 Mulungu ni wokhulupilika komasoti wolungama, tetyo tikavomekeja machimo ŵasu azatikhululukile komasoti kutituŵisha ku ntchito zonse ziipa.
10 Keno tunena kuti, “Tiliye chimwe,” vunkhala monga tulaŵila kuti Mulungu ni wa wenye, ndipo mu ntima mwasu muliye mawu ŵake.
