Yoyamba ya Yohani 5:1-21
5 Aliyense wamene okhulupilila kuti Yesu ni Khilisitu, ni mwana wa Mulungu. Ndipo onse amene okonda Atata okondasoti mwana wawo.
2 Tukonda Mulungu komasoti kukonkheja malamulo ŵake. Keno tuchita vamene ivi tuziŵa kuti tukondasoti ŵana a Mulungu.
3 Kukonda Mulungu kutanthauza kukonkheja malamulo ŵake, ndipo malamulo ŵake amene awo ni osavuta kuŵakonkheja.
4 Aliyense wamene ni mwana wa Mulungu ogonjesa chalo. Ndipo chikhulupililo chasu chatiyavya kugonjesa chalo.
5 Kansi niŵani wamene angagonjese chalo? Kansi ni walalini okhulupilila kuti Yesu ni Mwana wa Mulungu?
6 Pa nthawe yenzewela Yesu Khilisitu penze manzi komasoti milopa. Osati penze manzi ŵeka, koma penzesoti milopa. Ndipo mzimu utuŵa uchitila umboni vamene ivi, chifukwa mzimu wamene uyo uleta choonadi patuŵa.
7 Pali vinthu vitatu vamene vutiyavya kumuziŵa luweme Yesu Khilisitu.
8 Vinthu vake ni mzimu, manzi komasoti milopa, ndipo umboni wa vinthu vamene ivi vitatu niwokatijana.
9 N’chendi kuti tukhulupilila umboni wakupeleka ŵanthu, koma lomba umboni wakupeleka Mulungu upambana umboni wamene uyo. Tetyo tukhulupilila umboni wakupeleka Mulungu wokhuza Mwana wake.
10 Munthu wamene okhulupilila Mwana wa Mulungu ovomekeja mu ntima mwake umboni wechipasiwa na Mulungu. Munthu wamene okhulupililalini Mulungu omuchitisha kuwoneka monga ni wawenye, chifukwa okhulupililalini umboni wechipeleka Mulungu wokhuza Mwana wake.
11 Umboni wechipeleka Mulungu ni wakuti, yove etipasa moyo wosasila kupitila muli Mwana wake.
12 Munthu wamene ovomekeja Mwana niyekuti ali na moyo wamene uyu. Ndipo wamene aliye vomekeje Mwana wa Mulungu aliye moyo wamene uyu.
13 Nukulembelani vamene ivi pokuziŵishani kuti mwewo amene mukhulupilila Mwana wa Mulungu* muzafwane moyo wosasila.
14 Ndipo sewo tukaikilalini kuti chilichonse chatingamusenge mokatijana na vakufuna, otimvwila.
15 Komasoti, pakuti tuziŵa kuti otimvwila tikasenga chilichonse, tunkhala na chikhulupililo kuti tilondele vinthu vamene ivo vatamusenga.
16 Keno muyakine wawona nkwake ochita chimo yamene ingaletelini imfwa amupemphelele ndipo Mulungu azamupase moyo. Pamene apa nunena za ŵanthu amene achita chimo yamene ingaletelini imfwa. Koma lomba pali chimo yamene yuleta imfwa ndipo nufunalini kuti apemphelele munthu wamene wachita chimo monga ni yamene iyi.
17 Kuchita chilichonse chosalungama ni chimo. Koma olo n’tetyo, pali chimo yamene ingaletelini imfwa.
18 Tuziŵa kuti munthu aliyense wamene ni mwana wa Mulungu aliye chiyoloŵezi chochita chimo, koma mwana* wa Mulungu omulolela ndipo Satana angamukate-katelini.
19 Tuziŵa kuti nise ŵanthu a Mulungu, koma chalo chonse chili mmanja mwa Satana.
20 Koma olo n’tetyo, tuziŵa kuti Mwana wa Mulungu ewela pano pa chalo ndipo etipasa nzelu kuti tiziŵe Mulungu wachendi. Kupitila muli Mwana wake Yesu Khilisitu, nise okatijana naye. Yove ni Mulungu wachendi ndipo opeleka moyo wosasila.
21 Ŵana ŵangu apantima, mukopewa mafano.
Malizu a m'nyansi
^ Mu Chigiliki, “mukhulupilila zina ya mwana wa Mulungu.”
^ “Mwana” wamene uyu ni Yesu Khilisitu.”
