Yachiŵili yoluta kuli Akolinto 1:1-24
1 Newo Paulo, ntumwi wa Khilisitu Yesu mwakufuna kwa Mulungu, pamozi na Timoteyo nkwasu, nulembela mpingo wa Mulungu waku Kolinto komasoti atuŵa onse amene ali ku madela onse ku Akaya:
2 Munkhale na kuwama ntima kukulu komasoti ntendele, vofumila kwa Mulungu Atata ŵasu komasoti Ambuye Yesu Khilisitu.
3 Atamandike Mulungu komasoti Atata ŵa Ambuye wasu Yesu Khilisitu, Tata wachifundo chikulu komasoti Mulungu wamene otitonthoja pa vuto iliyonse,
4 wamene otitonthojasoti* pa mayeselo* ŵasu onse, kuti tikwanishe kutonthoja ŵala okumana na mayeselo* a ntundu uliwonse, chifukwa nasesoti tatonthojewa na Mulungu.
5 Pakuti tukumana na mavuto anyinji chifukwa cha Khilisitu, tutonthojewasoti ngako kupitila mwa Khilisitu.
6 Sewo tikakumana na mayeselo,* mwewo mutonthojewa komasoti kupulumushiwa. Tikatonthojewa, namwesoti mutonthojewa ndipo vamene ivi vukuyavyani kuti mupilile mavuto ŵatukumana nawosoti sewo.
7 Chiyembekezo chasu pali mwewo ni champhamvu, chifukwa tuziŵa kuti pakuti mukumana na mavuto olingana na ŵatukumana nawo sewo, namwesoti mutonthojewe.
8 Akwasu, tufuna mukoziŵa za mavuto ŵetikumana nawo mu chigawo cha Asia. Tikumana na mavuto akulu kupambana mphamvu zasu, mwakuti tenzeve chiyembekezo chakuti tinkhale na moyo.
9 Ndipo tenzekumvwa monga kuti taweluziwa kuti tipaiwe. Ivi venze tetyo kuti osati tikolidalila koma mmalo mwake tikodalila Mulungu wamene ousha ŵanthu akufwa.
10 Yove etipulumusha ku vinthu vamene ivo vamene sembe vitipaya ndipo azatipulumushesoti. Tukhulupilila kuti yove apitilije kutipulumusha.
11 Namwesoti mungayavyeko potipemphelela mopapatila, na cholinga chakuti pankhale ŵanthu anyinji otipelekela mapemphelo otembeja Mulungu chifukwa cha thandizo yakutipasa poyankha mapemphelo a ŵanthu anyinji.
12 Sewo tili na chifukwa cholitamandila, ndipo chikumbuntima chasu chutichitilasoti umboni, kuti muli chino chalo, maka-maka pakati panu, tachita vinthu vituŵa komasoti mokatijana na chilungamo chofumila kwa Mulungu. Tachita vamene ivi osati modalila nzelu za muli chino chalo, koma modalila kuwama ntima kukulu kwa Mulungu.
13 Chifukwa vamene ivi vatukulembelani ni vinthu vakuti mungakwanishe kuviŵelenga* komasoti kuvimvwisha. Ndipo nukhulupilila kuti mupitilije kuvimvwisha luweme* vinthu vamene ivi.
14 Mwewo muziŵa kale kuti sewo nise chifukwa chakuti mwewo mulitamandile, monga ni mwamukuti muzankhalilesoti mwewo kuli sewo, muzankhale chifukwa chakuti tizalitamandile pa nsiku ya Ambuye wasu Yesu.
15 Pakuti nukaikilalini za vamene ivi, nenze na cholinga chakuti poyamba niwele kwamene uko kwanu, kuti muzankhalesoti na mwayi uyakine wosangalala.*
16 Chifukwa nenzefuna kuti poluta ku Makedoniya nizapitile na kwamene uko kwanu nizakunyungileni, ndipo nikazafuma ku Makedoniya nizawelesoti kwamene uko kwanu pavuli pake muzanipelekeje poluta ku Yudeya.
17 Kansi penenze na cholinga chamene ichi, nkhani yamene iyi nenzeiwona mopepuka? Olo payakine nenze na volinga vadyela kuti nikanena kuti “Eye, eye” kulonjeza kuti nichite chinthu chiyakine nthawe yamene iyo nichinje ninene kuti “Yayi, yayi”?
18 Koma khulupililani Mulungu kuti vetikuujani n’vachendi. Chifukwa tingakuujenilini kuti Eye, pavuli pake nonena kuti Yayi.
19 Pakuti Mwana wa Mulungu, Yesu Khilisitu, wala wetilalikila za yove kuli mwewo, kutanthauza newo, Silivano* na Timoteyo ochitalini akanena chinthu pakapita nthawe nochinja nonenasoti chiyakine, yove ochitalini vosiyana na vala vawalaŵila.
20 Komasoti malonjezo a Mulungu, olo ankhale anyinji tyani, onkhala “eye” kupitila muli yove. Tetyo kupitilasoti muli yove, “Ame” onenewa kwa Mulungu ndipo Mulungu olondela ulemelelo kupitila muli sewo.
21 Koma Mulungu niye otisimikijila kuti mwewo na sewo nise ŵake a Khilisitu komasoti Mulungu wamene uyo niye etizoza.
22 Yove watidinda chidindo chake. Chidindo chamene ichi ni mzimu utuŵa wamene uli mmitima yasu ndipo uli monga ni madaliso akusogolo.
23 Mulungu ni mboni yangu kuti chifukwa chaniliye welele uko ku Kolinto mpaka pano, n’chakuti niliyefune kuzayangijila chisoni chanu.
24 Sewo niselini olamulila chikhulupililo chanu, koma nise antchito ayanu kuti mukosangalala, pakuti nimwe onkhazikika chifukwa cha chikhulupililo chanu.
Malizu a m'nyansi
^ Olo kuti, “otitang’isha.”
^ Olo kuti, “mmasauso.”
^ Olo kuti, “masauso.”
^ Olo kuti, “masauso.”
^ Mabaibolo ayakine onena kuti, “muviziŵa kale.”
^ Mu Chigiliki, “mupitilije kuvimvwisha mpaka pamapeto.”
^ Mabaibolo ayakine onena kuti, “kuti muzapindule kaŵili.”
^ Oitiwasoti kuti Sila.
