Yachiŵili yoluta kuli Akolinto 10:1-18
10 Lomba newo Paulo, nukudandaulilani mokonkheja Khilisitu wamene ni wofasa komasoti muweme ntima, olo kuti nuwoneka wofoka nikankhala pakati panu, koma wotang’a ntima nikolaŵila namwe nikankhala kuyakine.
2 Sembe nakonda kuti nikazawela kwamene uko osati nizachite vinthu vikulu vanuyembekezela kuzachita poshushana na ŵanthu ayakine amene owona kuti sewo tichita vinthu monga ni ŵanthu am’chalo ichi.*
3 Olo kuti moyo wasu ni wolingana na wa ŵanthu ayakine onse, tuniyatalini nkhondo mokonkheja maganizo am’chalo ichi.
4 Visulo vatuniyatila nkhondo yamene iyi ni vaumulini m’chalo, koma ni visulo vamphamvu vawatipasa Mulungu ndipo vukwanisha kuponesha vinthu votang’a vili jikiwe.
5 Chifukwa tuchosa maganizo komasoti chochingilija chilichonse chushushana na kuziŵa Mulungu ndipo tugonjesa maganizo aliwonse noŵamanga monga ni wadjeli kuti akomvwila Khilisitu.
6 Komasoti nise okonzeka kupeleka chilango kuli munthu aliyense asamvwila, mwewo mukazawonesha kuti nimwe omvwila pa chilichonse.
7 Mwewo muwona vinthu powona tyala mawonekedwe akunja. Keno aliyense okhulupilila mu ntima mwake kuti okonkheja Khilisitu, aganizilesoti kuti: Monga mwakuchitila yove kukonkheja Khilisitu, sewo nase tukonkheja Khilisitu.
8 Ambuye etipasa ulamulilo kuti tikutang’isheni, osati kukufokeshani. Ndipo kuti nifune kulitamandila mopitililako malile vokhuza ulamulilo wamene uyu, ningachitelini nsoni.
9 Chifukwa nufunalini kuti munkhale na maganizo akuti cholinga cha makalata ŵangu nikukuyofyani.
10 Pakuti ayakine onena kuti: “Makalata ŵake onkhala na uthenga wamphamvu, koma yove akawela owoneka wofoka ndipo vakulaŵila vukatalini ntima.”
11 Ŵanthu amene awo ofunika kuziŵa kuti vatulaŵila mmakalata ŵasu tikankhala kuyakine tizachitesoti vamene ivo tikazawela.
12 Tuliwonalini monga nise olingana na ŵanthu amene olikuja komasoti tulilinganijalini na ŵanthu amene awo. Koma ŵanthu amene awo akoyesana ŵeka-ŵeka pokatishila ntchito mfundo zawo, nolilinganija ŵeka-ŵeka, omvwishalini chilichonse.
13 Koma sewo tizalitamandilelini pa vinthu vamene vili kunja kwa malile ŵatapasiwa. Tizalitamandile pa vinthu vamene vili nkati mwa malile a gawo yawatipimila Mulungu, yamene ifwika mpaka kwamene uko kwanu.
14 Tetyo tupitililalini malile a gawo yasu, monga kuti gawo yamene iyo yufwikalini kwanu kwamene uko. Chifukwa tiyamba ni sewo kufwika kwamene uko polengeza uthenga uweme unena za Khilisitu.
15 Ndipo tulitamandilalinisoti kunja kwa malile a gawo yetipasiwa chifukwa cha ntchito ya munthu muyakine. Koma tukhulupilila kuti chikhulupililo chanu chikazayangijilika ntchito yasusoti izakule mu gawo yasu. Tetyo tizankhale na ntchito zinyinji
16 na cholinga chakuti tilengeze uthenga uweme ku vyalo vakutali kupitilila kwanu kwamene uko, kuti osati tilitamande pa ntchito yakatiwa kale mu gawo ya munthu muyakine.
17 “Koma wamene olitumba, alitumbe mwa Yehova.”
18 Chifukwa wala olikuja yeka ovomekejewalini, koma wala wavomekejewa na Yehova.
Malizu a m'nyansi
^ Mu Chigiliki, “akuthupi.”
