Yachiŵili yoluta kuli Akolinto 11:1-33
11 Sembe nakonda kuti munivomeje nilikujeko patontho. Ndipo vuwonekelatu kuti mwanivomeja kale.
2 Nukuchitilani nsanje monga ni yakukuchitilani Mulungu pakuti ni newo nichitisha kuti mulonjezewe ukwati na mwanalume mmozi Khilisitu, ndipo nufuna kukupelekani monga ndola ituŵa kuli yove.
3 Molingana na mweichitila njoka kutalija wenye Hava na chinyengo chake, nkhaŵa yanili nayo niyakuti payakine maganizo ŵanusoti angasokonezewe mwakuti mungankhalelinisoti ŵanthu achilungamo komasoti atuŵa. Koma munthu wa Khilisitu ofunikila kunkhala wachilungamo komasoti ntuŵa.
4 Chifukwa muyakine akawela kuli mwewo nolalikila za Yesu wosiyana na wetilalikila sewo, olo akaleta mzimu wosiyana na wemwilondela kale olo uthenga uweme wosiyana na wemwilondela, mwewo mukungomulondela munthu wamene uyo.
5 Koma newo nuwona kuti nuchepalini mwanjila iliyonse polinganija na atumwi ŵanu amene awo apalulu.
6 Keno niliye luso yolaŵila vutanthauzalini kuti nuziŵalinisoti vinthu, ndipo tikuwoneshani vamene ivi mu njila iliyonse komasoti pa vinthu vonse.
7 Olo kansi niphoniya penilichefya kuti mwewo mukwejewe pala penilalikila mosangalala uthenga uweme wa Mulungu kuli mwewo paliye malipilo aliwonse?
8 Nilondela thandizo kufumila ku mipingo iyakine ndipo venze monga kuti nuŵaiŵila na cholinga chakuti nitumikile mwewo.
9 Koma penisoŵa vinthu viyakine venenzefunikila penenze kwamene uko kwanu, niliye vutishe munthu aliyense, pakuti akwasu amene efumila ku Makedoniya enipasa vinthu vonse venenzefunikila. Kulaŵila chendi, niyeja-yeja kuti osati nikuvutisheni mu njila iliyonse, ndipo nipitilije mphela kuchita tetyo.
10 Nulaŵila choonadi cha Khilisitu, tetyo nizalekelini kulitamandila mmadela aku Akaya.
11 Kansi ndaŵa yanji nuchita vamene ivi? Chifukwa chakuti nukukondanilini? Mulungu oziŵa kuti nukukondani.
12 Nipitilije kuchita vanuchita, kuti nikangishe ŵala ŵanthu amene oyeja-yeja kuti afwane chifukwa changalaŵilile kuti olingana na sewo pa vinthu vakulitamandila.
13 Ŵanthu amene aŵa ni atumwi awenye, antchito achinyengo ndipo olichitisha kuwoneka monga ni atumwi a Khilisitu.
14 Vamene ivi n’vosadabwisha, chifukwa olo Satana olichitisha kuwoneka monga ni mngelo wa kungweleŵela.
15 Tetyo ni vosadabwisha keno nawosoti atumiki ŵake olichitisha kunkhala monga ni atumiki a chilungamo. Koma mapeto ŵawo azankhale okatijana na ntchito zawo.
16 Nuwelejasoti kunena kuti, munthu aliyense osati aniwone monga niliye nzelu. Koma keno muniwona monga niliye nzelu, vomekejani tyala kuti niye mwanilili, kuti nanesoti nilitumbeko patontho.
17 Vamene ivi vanulaŵila, nulaŵilalini monga ni munthu okonkheja chisanzo cha Ambuye. Koma monga ni munthu aliye nzelu komasoti wolitumba na wolidalila ngako.
18 Pakuti ŵanthu anyinji olitumba pa vinthu vam’chalo ichi, nanesoti nilitumbe.
19 Muvutikalini kuchita vinthu na ŵanthu aliye nzelu pakuti muliwona kuti nimwe anzelu ngako.
20 Ndipo mupilila kuli aliyense okuchitishani kunkhala akapolo, otola vinthu vanu, olonda vamuli navo, oliwona kuti niwapalulu kupambana mwewo komasoti aliyense okuniyatani mbama.
21 Nulaŵila vamene ivi molinyoza seka, pakuti tuwoneka monga tachita vinthu mofoka.
Koma keno ŵanthu ayakine ochita vinthu motang’a ntima nulaŵila monga ni munthu aliye nzelu, nanesoti nuchita vinthu motang’a ntima.
22 Kansi ove ni Ahebeli? Nanesoti n’chimozi-mozi. Kansi ni Aisilaeli? Nanesoti. Olo kansi ni mbadwa* za Abulahamu? Nanesoti n’chimozi-mozi.
23 Olo kansi ove ni atumiki a Khilisitu? Nuyankha monga ni silu, newo niye ntumiki wa Khilisitu wopambana ove. Nachita vinyinji kupambana ove, nimangiwa moweleja-weleja, niniyatiwa maulwendo anyinji, ndipo nipulumukila nkamwa mwa mbuzi moweleja-weleja.
24 Maulwendo 5 Ayuda enikwapula mishamu 39.
25 Eniniyata na ndodo katatu. Enitema na myala kamozi. Bote inifwaikilapo katatu. Ninkhala pa nyanja usiku na nzuŵa monse kamozi.
26 Niyenda maulwendo anyinji, nikumana na voyofya mmimana komasoti nikumana na vigaŵenga pa nsewu. Nikumanasoti na voyofya kufumila kuli ŵanthu a ntundu wangu, ŵanthu amitundu iyakine, m’tauni, m’chipululu, panyanja na pakati pa akwasu achinyengo.
27 Nenzekata ntchito zoŵaŵa komasoti zochitisha chiŵe. Nthawe zinyinji usiku nenzeyonalini, nenzenkhala na njala komasoti njota, ndipo nthawe zinyinji nenzekulyalini, kutamana na mphepo komasoti nenzeve vovwala vokwanila.*
28 Kuyangijila pa vinthu vamene ivi, palisoti chinthu chiyakine chamene palipano chunivutisha maganizo nsiku iliyonse. Nudela nkhaŵa mipingo yonse.
29 Niŵani angafoke, nanesoti osafoka? Niŵani angakhumudwishiwe, newo osakalipa navo?
30 Keno nufunikila kulitumba, nizalitumbe pa vinthu vamene vuwonesha vofoka vangu.
31 Mulungu wamenesoti ni Atata wa Ambuye Yesu, wamene ni woyenelela kutamandiwa mpaka kale-kale, oziŵa kuti nutalalini wenye.
32 Ku Damasiko, gavana wa mfumu Aleta eika akamalonda mmagedi a tauni ya Damasiko kuti anikate.
33 Koma ŵanthu eniika m’chitundu noniselushila pa windo ya mpanda wa tauni yamene iyo ndipo nipulumuka mmanja mwake.