Yachiŵili yoluta kuli Akolinto 12:1-21
12 Nufunikila kulitumba, tetyo nilaŵile nkhani yokhuza mensomphenya na mauthenga ofumila kwa Ambuye olo kuti kulitumba kuliye pindu.
2 Pali munthu muyakine wanuziŵa wamene okatijana na Khilisitu. Vyaka 14 vapita, munthu wamene uyo etolewa noluta naye kululu kwachitatu. Keno etolewa ali na muŵili wake ngawo-ngawo olo yayi, nuziŵalini. Mulungu niye oziŵa.
3 Kulaŵila chendi, munthu wamene uyo numuziŵa. Keno etolewa ali na muŵili wake ngawo-ngawo olo yayi, nuziŵalini. Mulungu niye oziŵa.
4 Yove etolewa noluta naye m’paladaiso, ndipo ali m’paladaiso mwamene umo echimvwa mawu amene munthu angaŵatomolelini komasoti n’vosaloleka kuŵalaŵila.
5 Nilitumbe pa nkhani yokhuza munthu wamene uyo, koma nilitumbelini pa nkhani yokhuza newo, kupatulapo tyala pa vofoka vangu.
6 Koma olo ningafune kulitumba, vutanthauzalini kuti nulikuja, chifukwa ninkhale kuti nulaŵila vachendi. Koma nichitelini vamene ivo, pakuti nufunalini kuti muyakine anitamande ngako kupambana pa vinthu vakuwona olo kumvwa kuli newo,
7 chifukwa chakuti niwoneshewa mensomphenya apadela.
Koma kuti osati nilikuje mopitilila malile, nipasiwa minga* mmuŵili mwangu yamene yunilasa, yunkhala monga ni mngelo wa Satana ndipo yuchitisha kuti nikokumvwa kuŵaŵa nthawe zonse, na cholinga chakuti osati nilikuje mopitilila malile.
8 Nipapatila Ambuye maulwendo atatu onse za nkhani yamene iyi kuti minga yamene iyi ichoke muli newo.
9 Koma eniuja kuti: “Kuwama ntima kukulu kwanakuwonesha ni kokwanila, chifukwa mphamvu zangu zuwonekela luweme ngako wewo ukankhala wofoka.” Tetyo nizalitumbe mosangalala ngako pa vofoka vangu, kuti mphamvu za Khilisitu zinkhale mphela pamutu pangu monga ni tenti.
10 Tetyo nusangalala na kufoka, kunyozewa, kusoŵa vinthu vofunikila pa moyo, kutamanishiwa komasoti mavuto ayakine chifukwa cha Khilisitu. Chifukwa panili wofoka, niye panunkhala wamphamvu.
11 Lomba nankhala munthu wolikuja. Koma ni mwewo mwanikakamija kuchita vamene ivi, chifukwa mwenzefunikila kunitembeja pa vinthu viweme vanachita. Newo nuchepalini mwa njila iliyonse polinganija na atumwi ŵanu amene awo apalulu olo kuti muniwona monga nine watyala-tyala.
12 Kulaŵila chendi, mwewo mwiwona umboni wakuti nine ntumwi. Mwiwona kuti nipilila ngako, nichita vizindikilo, vinthu vodabwisa komasoti ntchito zamphamvu.
13 Newo niliye nkhale ntolo wolema kuli mwewo, vamene ivi vachitisha kuti munkhale osiyana na mipingo iyakine yonse, keno vili tetyo nusenga kuti munikhululukile.
14 Nine wokonzeka kuwela kuli mwewo ndipo kano ni kachitatu kunkhala wokonzeka. Koma nizankhalelini ntolo wolema chifukwa nufunalini vinthu vanu, koma mwewo. Pala ni udindolini wa ŵana kusunga chuma kuti chizayavye makolo ŵawo, koma makolo niye ofunikila kusungila chuma ŵana ŵawo.
15 Koma newo nizakatishile ntchito vinthu vangu vonse komasoti nizalipeleke na ntima wangu wonse chifukwa cha mwewo, ndipo nizachite vamene ivi mosangalala. Keno newo nukukondani ngako teti, kansi mwewo mufunikila kunikonda patontho?
16 Koma mulimonse mwavingankhalile, newo niliye kuvutisheni. Koma olo n’tetyo mwewo munena kuti, nikusemphani komasoti nichita vachinyengo.
17 Koma mwewosoti muziŵa kuti niliye kujeleleni kupitila muli aliyense wa ŵanthu ŵenituma kuli mwewo.
18 Nilimbikisa Tito kuti awele kwamene uko ndipo nimutumija pamozi na nkwasu muyakine. Tito wamene uyo aliye kujeleleni olo patontho. Tiyenda mu mzimu umozi ndipo tichita vinthu molingana. N’tetyolini?
19 Kansi mwankhala muganiza kuti tuliikila kuvuli pamenso panu? Tulaŵila pamenso pa Mulungu mokatijana na Khilisitu. Koma lomba akwasu apa ntima, tuchita vonse vamene ivi kuti tikutang’isheni.
20 Nuyopa kuti nikazafwika, payakine nizakufwanenilini mwanufunila ndipo payakine nanesoti nizankhalelini mwamufunila, mmalo mwake payakine pangazankhala ndewo, nsanje, kukalipijana, mikangano, tonjo, kuŵeleŵeshana, kulitumba komasoti chisokonezo.
21 Payakine nikazawelasoti, Mulungu wangu azalole kuti nichite nsoni pamenso panu. Ndipo payakine nizalilile ŵanthu anyinji amene echimwa koma aliye lape pa nkhalidwe yawo iipa, chiwelewele* komasoti nkhalidwe yawo iliye nsoni* yamene ankhala oichita.
Malizu a m'nyansi
^ Apa onena minga imozi. Ayakine onena kuti, “munga.”
^ Mu Chigiliki por·nei′a. Onani matanthauzo a mawu ayakine.
^ Mu Chigiliki a·sel′gei·a. Onani matanthauzo a mawu ayakine.
