Yachiŵili yoluta kuli Akolinto 3:1-18
3 Kansi tuyambasoti kulichitila seka umboni? Olo kansi n’pofunika kuti nasesoti, molingana na ŵanthu ayakine, tinkhale na makalata otichitila umboni ofuma kuno kuwela kuli mwewo olo ofumila kwamene uko kuwela kuno?
2 Mwewo nimwe kalata yasu, yolembewa mmitima yasu, yoziŵika komasoti yoŵelengewa na ŵanthu onse.
3 Chifukwa vuwonekelatu kuti nimwe kalata yofumila kwa Khilisitu yolembewa na sewo atumiki a Mulungu. Kalata yamene iyo iliye lembewe na inki koma na mzimu wa Mulungu wamoyo. Iliye lembewe pa volembapo va myala koma mmitima.*
4 Kupitila mwa Khilisitu, tingakwanishe kulaŵila vamene ivi motang’a ntima pamenso pa Mulungu.
5 Tingalaŵilelini kuti nise oyenelela kukata ntchito yamene iyi chifukwa cha mphamvu zasu, koma nise oyenelela kukata ntchito yamene iyi chifukwa cha Mulungu,
6 ndipo yove etiwona kuti nise oyenelela kunkhala atumiki a pangano yanyowani, osati kupitila mmalamulo olembewa, koma kupitila mu mzimu. Malamulo olembewa oweluza munthu kuti afwe, koma mzimu upasa munthu moyo.
7 Malamulo amene ochitisha kuti munthu afwe, amenesoti elembewa pa myala, ewela na ulemelelo ukulu ngako mwakuti Aisilaeli aliye kwanishe kuloleshesha chinso cha Mose chifukwa chenzeyetima na ulemelelo wamene wisila papita nthawe.
8 Lomba kansi mzimu ufunikilalini kupelekewa na ulemelelo ukulu kupambana pamene apa?
9 Keno malamulo amene oweluza ŵanthu kuti alangiwe epelekewa na ulemelelo, niye kuti chilungamo chufunikila kupelekewa na ulemelelo wopambana pamene apo.
10 Nawosoti malamulo olembewa amene epasiwa ulemelelo, echosewa ulemelelo wamene uyo chifukwa ulemelelo wamene wawela pavuli pake ni ukulu kupambana wamene uyo woyamba.
11 Keno malamulo olembewa amene esila papita nthawe, epelekewa na ulemelelo, niye kuti malamulo amene akuti azalekesila azankhale na ulemelelo ukulu kupambana pamene apo.
12 Pakuti tili na chiyembekezo chamene ichi, tili na ufulu ukulu wolaŵila,
13 osati monga ni Mose wamene enzevala chinso chake na nyula, kuti Aisilaeli osati awone kusila kwa ulemelelo wamene uyo wosankhalisha.
14 Ndipo maganizo ŵawo aliyekwanishe kuziŵa. Mpaka lelo nyula yamene iyo yuchingilija mphela pangano yakale ikoŵelengewa, chifukwa yuchosewa kupitila mwa Khilisitu mphela.
15 Ndipo mpaka pano, vechilemba Mose vikoŵelengewa, mitima yawo yunkhala mphela yochingilijiwa.
16 Koma keno munthu wachinja noyamba kulambila Yehova, chochingilija chamene icho chuchosewa.
17 Yehova ni mzimu ndipo pali mzimu wa Yehova pali ufulu.
18 Tonse tili na vinso vosachingilijiwa ndipo tili monga ni magilasi* amene owonesha ulemelelo wa Yehova. Tikowonesha ulemelelo wamene uyu, tuchinja nonkhala monga ni chifanizilo chake ndipo tuwonesha ulemelelo woyangijilika-yangijilika* molingana ndendende na mwawatichinjila Yehova wamene ni Mzimu.
Malizu a m'nyansi
^ Mu Chigiliki, “volembapo va nyomfu, mmitima.”
^ Olo kuti, “magogosi.”
^ Mabaibolo ayakine onena kuti “mwa mzimu wa Yehova.”
