Yachiŵili yoluta kuli Akolinto 4:1-18
4 Tetyo, pakuti tili na utumiki wamene uyu mokatijana na chifundo chetiwoneshewa, tutayalini ntima.
2 Koma taleka vinthu vochitisha nsoni vamene vuchitika mofisa, ndipo tuyendalini mwachinyengo olo kubendesha mawu a Mulungu. Koma pochitisha kuti choonadi chiziŵike, tankhala chisanzo chiweme kuli munthu* aliyense pamenso pa Mulungu.
3 Keno uthenga uweme watulalikila ulifisike, niye kuti ni wofisika kuli ŵanthu amene akuyawonongewa,
4 ŵanthu asakhulupilila amene mulungu wa nthawe* ino wachitisha ng’ala maganizo ŵawo kuti osati awone kungweleŵela kwa uthenga uweme waulemelelo unena za Khilisitu, wamene ni chifanizilo cha Mulungu.
5 Chifukwa tulalikilalini za sewo koma za Yesu Khilisitu, kuti yove ni Ambuye ndipo sewo nise akapolo ŵanu chifukwa cha Yesu wamene uyo.
6 Pakuti Mulungu niye enena kuti: “Kungweleŵele kufumila mu mfinzi, ndipo pokatishila ntchito chinso cha Khilisitu yove wasanika mitima yasu kuti ingweleŵele na ulemelelo wokhuza kuziŵa Mulungu.
7 Koma olo n’tetyo, tili na chuma chamene ichi mu viya va lito, kuti mphamvu yopambana yovyalika nayo ifumile kwa Mulungu, osati kuli sewo.
8 Tupanikijiwa mu njila zosiyana-siyana, koma osati mpaka kukangiwa kunyang’anya. Tusiliwa nzelu koma osati mpaka kusoŵelatu kothaŵila.*
9 Tutamanishiwa, koma Mulungu otisiyalini. Tuponeshewa pansi, koma tuwonongekalini.
10 Nthawe zonse tupilila tikotamanishiwa monga ni mwechichitila Yesu ndipo tuchita vamene ivi kuti moyo wa Yesu uwonekelesoti muli sewo.*
11 Sewo a moyo nthawe zonse tunkhala pa ngozi yakuti tingapaiwe chifukwa cha Yesu, kuti moyo wa Yesu uwonekelesoti mmiŵili yasu yamene ingafwe.
12 Tetyo olo kuti moyo wasu unkhala pa ngozi, vamene ivi vuleta moyo kuli mwewo.
13 Sewo tili na ntima wachikhulupililo wolingana na vilembewa kuti: “Nenze na chikhulupililo ndipo nilaŵila.” Tetyo nase tili na chikhulupililo, ndipo tulaŵila,
14 poziŵa kuti wamene eusha Yesu azaushesoti sewo monga ni mwechiushila Yesu, ndipo azatipeleke kwa Yesu wamene uyo pamozi na mwewo.
15 Chifukwa vonse vamene ivi vachitika kuti vikuyavyeni. Komasoti vachitika kuti kuwama ntima kukulu kwamene kwiyangijilika kupitilije kuyangijilika chifukwa ŵanthu anyinji opeleka mapemphelo otembeja ndipo vamene ivi vuchitisha kuti Mulungu alondele ulemelelo.
16 Tetyo tutayalini ntima. Koma olo kuti munthu wasu wakunja usila, munthu wasu wa nkati uchitishiwa kunkhala wanyowani nsiku iliyonse.
17 Chifukwa olo kuti mavuto* ŵatukumana nawo ni osankhalisha komasoti ni atontho, otichitisha kuti tilondele ulemelelo wamene ukulila-kulila komasoti wamene ni wosasila,
18 patuganizila ngako vinthu visawoneka, osati vuwoneka. Chifukwa vuwoneka vunkhalishalini, koma visawoneka vusilalini.
Malizu a m'nyansi
^ Mu Chigiliki, “chikumbuntima cha munthu.”
^ Onani matanthauzo a mawu ayakine.
^ Olo kuti, “kusoŵelatu pokata.”
^ Mu Chigiliki, “mmiŵili yasu.”
^ Olo kuti, “mayeselo.”
