Yachiŵili yoluta kuli Akolinto 5:1-21
5 Tuziŵa kuti ng’anda yasu ya pano pa chalo olo kuti tenti ino ikazapasuka, tizalondele ng’anda yofumila kwa Mulungu. Yamene iyo izankhalelini ng’anda yomangiwa na manja, koma yosasila ndipo izankhale kululu.
2 Chifukwa m’ng’anda yamene iyi yatunkhala tumimila ndipo tufunishisha kuvwala ng’anda yasu yakululu,
3 mwakuti tikazaivwala, tizankhalelini chinthaku.
4 Ndipo sewo amene tili mu tenti ino tumimila komasoti tulemewa, osati chifukwa chofuna kuivula, koma kuti tivwale ng’anda iyakine yamene iyo, na cholinga chakuti muŵili wamene uyu wamene ungakwanishe kufwa uloŵewe mmalo na moyo.
5 Mulungu niye etikonzekelesha kuti tilondele vamene ivi. Yove niyesoti etipasa mzimu kuti unkhale monga ni chizindikilo cha vinthu vakusogolo.
6 Tetyo nthawe zonse tunkhala otang’a ntima ndipo tuziŵa kuti ng’anda yasu paikali muŵili wamene uyu tili kutali na Ambuye.
7 Chifukwa tuyenda mosogolelewa na chikhulupililo, osati mosogolelewa na vinthu vuwoneka na menso.
8 Koma tutang’a ntima ndipo nise osangalala kuyankhala na Ambuye, mmalo monkhala mmuŵili wamene uyu.
9 Tetyo keno tingankhale naye pafupi olo kutali, cholinga chasu n’chakuti tinkhale ovomelejeka kuli yove.
10 Chifukwa aliyense wa sewo azawonekele ku mpando wotongela milandu wa Khilisitu, kuti alondele mphoto yake mokatijana na vechichita akali mmuŵili, keno viweme olo viipa.
11 Tetyo pakuti tuyopa Ambuye, tupitilija kuphunzisa ŵanthu ndipo Mulungu oziŵa luweme volinga vasu. Koma tukhulupilila kuti mwewosoti chikumbuntima chanu chuziŵa luweme volinga vasu.
12 Sikuti tayambasoti kulichitila seka umboni kuli mwewo, koma tukupasani chifukwa cholitamandila chifukwa cha sewo, kuti muyankhe amene olitumba powona tyala mawonekedwe akunja, osati vili mu ntima.
13 Keno tichita usilu, tichitila Mulungu. Koma keno tili bwino-bwino niye kuti ni voyavya kuli mwewo.
14 Chikondi chali nacho Khilisitu chutikakamija, chifukwa tasimikijila kuti munthu mmozi efwila ŵanthu onse, chifukwa onse amene awo enze echifwa kale.
15 Yove efwila ŵanthu onse kuti amene ali na moyo osati ankhale na moyo wolikondwelesha ŵeka, koma ankhale na moyo wokondwelesha wamene eŵafwila noushiwa.
16 Kufumila palipano tuwonalini munthu mwakuthupi. Olo vingankhale kuti Khilisitu timuwonapo mwakuthupi, lomba tumuwonalinisoti tetyo.
17 Tetyo keno aliyense ni wokatijana na Khilisitu, niye kuti yove ni cholengewa chanyowani. Vinthu vakale visila, ndipo pali vanyowani.
18 Koma vinthu vonse n’vofumila kwa Mulungu, wamene etiyavya kuti tikatijane naye kupitila mwa Khilisitu, ndipo etipasa utumiki wamene uyavya ŵanthu kuti akatijanesoti na Mulungu.
19 Utumiki wake ni wakuti tilalikile kuti Mulungu enzekatanija chalo na yove kupitila mwa Khilisitu, mwakuti aliye ganizile vophoniya va ŵanthu amene awo, ndipo watipasa ntchito yolalikila uthenga woyavya ŵanthu kuti akatijanesoti na Mulungu.
20 Tetyo nise ambasada* mmalo mwa Khilisitu, vili monga kuti Mulungu opapatila ŵanthu kupitila muli sewo. Sewo monga ŵanthu amene okata ntchito mmalo mwa Khilisitu tusenga kuti: “Mukatijanesoti na Mulungu.”
21 Wala wamene enzeve uchimo, Mulungu emuchitisha kunkhala nsembe yamachimo chifukwa cha sewo, kuti kupitila muli yove Mulungu akotiwona kuti nise olungama.
Malizu a m'nyansi
^ Mbasada ni munthu wamene onkhala mu chalo chiyakine koma opanamila chalo cha kwawo. Tetyo oloŵelelalini mu ndale za mu chalo chamene icho chakunkhala.
