Yachiŵili yoluta kuli Akolinto 6:1-18
6 Patukata naye ntchito pamozi, tukulimbikisani kuti osati mulondele tyala kuwama ntima kukulu kwa Mulungu noluza cholinga cha kuwama ntima kwamene uko.
2 Chifukwa yove enena kuti: “Pa nthawe yovomelejeka nikumvwila, ndipo pa nsiku yachipulumuso nikuyavya.” Kulaŵila chendi, ino ni nthawe ngayo-ngayo yovomelejeka. Lelo ni nsiku yachipulumuso.
3 Tuchitalini chilichonse chokhumudwisa, kuti osati ŵanthu apezelepo chifukwa pa utumiki wasu.
4 Koma tuwonesha mu njila iliyonse kuti nise atumiki a Mulungu. Tuchita vamene ivi patupilila vinthu vinyinji, patukumana na mavuto, patunkhala tiliye vinthu vatufunikila, patukumana na vinthu vovuta,
5 patuniyatiwa, kuikiwa mu djeli, patusokonezewa, patukata ntchito mwakhama, osayona tulo komasoti kunkhala na njala.
6 Tuwoneshasoti vamene ivi patunkhala atuŵa, oziŵa vinthu, oleza ntima, aweme ntima, patusogolelewa na mzimu utuŵa, patuwonesha chikondi chiliye chinyengo,
7 patulaŵila vachendi komasoti patunkhala na mphamvu ya Mulungu. Komasoti tuchita vamene ivi patunyamula visulo va chilungamo ku kwanja ngayo* na ku kwanja yamanjele,*
8 patupasiwa ulemelelo nonyozewa komasoti patulaŵililiwa viipa na viweme. Tuwonewa monga nise achinyengo koma nise achilungamo,
9 monga osaziŵika koma nise oziŵika luweme, monga tasala patontho kufwa koma tikali mphela na moyo, monga opasiwa chilango koma osapelekewa kuti tikapaiwe,
10 monga achisoni koma osangalala nthawe zonse, monga osauka koma olemelesha ŵanthu anyinji komasoti monga aliye chilichonse koma onkhala na vinthu vonse.
11 Mwewo Akolinto tankhala tulaŵila namwe ndipo sewo tasegula ngako ntima wasu.
12 Sewo tuchitalini kaso pa nkhani yokuwoneshani chikondi, koma mwewo niye mutikonda mwakaso.
13 Tetyo nulaŵila namwe monga ŵana ŵangu, namwesoti mukochita vamene ivo, segulani ngako mitima yanu.
14 Osati mumangiwe mu djoko pamozi na asakhulupilila, chifukwa nimwe osiyana. Kansi pali kukatijana kotyani pakati pa chilungamo na kusamvwila malamulo? Olo pali kukatijana kotyani pakati pa kungweleŵela na mfinzi?
15 Komasoti pali kukatijana kotyani pakati pa Khilisitu na Beliyali?* Ndipo kansi munthu asakhulupilila na wokhulupilila* angalingane pa vinthu votyani?
16 Kansi pali kukatijana kotyani pakati pa kachisi wa Mulungu na mafano? Chifukwa sewo nise kachisi wa Mulungu wa moyo, monga ni mwechinenela Mulungu kuti: “Nizankhale pakati pawo komasoti nizayende pakati pawo. Nizankhale Mulungu wawo ndipo ove azankhale ŵanthu ŵangu.”
17 “‘Tetyo fumani pakati pawo ndipo mutaikane nawo,’ wanena tetyo Yehova. ‘Osati mukumye chinthu choipishiwa,’” “‘ndipo nizakulondeleni.’”
18 “‘Nizankhale atata ŵanu ndipo mwewo muzankhale ŵana ŵangu analume na anakazi,’ wanena tetyo Yehova Wamphamvuzonse.”
Malizu a m'nyansi
^ Payakine ni vokatishila ntchito polimbana na mdani.
^ Payakine ni volitetezela.
^ Kufumila ku mawu a Chihebeli otanthauza, “Watyala-tyala,” ndipo onena za Satana.
^ Olo kuti, “wokhulupilika.”