Yachiŵili yoluta kuli Akolinto 7:1-16
7 Mwewo apa ntima, pakuti talonjezewa vinthu vamene ivi, tiyeni tilituŵishe ndipo tichose chilichonse chuifya muŵili na mzimu, kuti tinkhale atuŵa patuyopa Mulungu.
2 Tisegulileni mitima yanu.* Sewo tiliye phoniyele aliyense, tiliye ipishe aliyense ndipo tiliye jelele aliyense.
3 Polaŵila vamene ivi sikuti nukupasani mulandu. Pala nanena kale kuti mwewo muli mmitima yasu, kuti tifwile pamozi olo tinkhale na moyo pamozi.
4 Nulaŵila namwe momasuka ngako komasoti nukumekelani ngako. Nalimbikisiwa ngako ndipo nukondwela ngako pa mavuto onse ŵatukumana nawo.
5 Petifwika ku Makedoniya tiliye pumule koma tipitilija kukumana na mavuto osiyana-siyana. Ŵanthu ayakine enzetishusha ndipo tenzedela nkhaŵa mipingo.
6 Koma olo n’tetyo, Mulungu wamene otang’isha ŵanthu amene ali na nkhaŵa, etitang’isha Tito pechiwela kuli sewo.
7 Koma osati tyala chifukwa chakuti tenze na Tito koma chifukwasoti cha vemwichita pomutang’isha. Yove etiletelasoti uthenga wakuti mufunishisha kuniwona, mukumvwa chisoni ngako komasoti munidela nkhaŵa. Penichimvwa vamene ivi nikondwelasoti ngako.
8 Tetyo olo kuti nikuchitishani kumvwa chisoni na kalata yangu, nudandaulalini. (Nuwona kuti kalata yamene iyo ikuchitishani kumvwa chisoni, koma kwa nthawe itontho.) Tetyo olo kuti poyamba nidandaula,
9 lomba nusangalala. Osati nusangalala chifukwa chakuti mwichimvwa chisoni, koma chifukwa chakuti chisoni chamene icho chikuchitishani kulapa. Pakuti mwichimvwa chisoni mokatijana na chifunilo cha Mulungu, vetilemba viliye kuwonongeni.
10 Kumvwa chisoni mokatijana na chifunilo cha Mulungu kuchitisha kuti munthu alape nopulumuka ndipo paliye angadandaule navo. Koma kumvwa chisoni monga ni ŵanthu ali muli ichi chalo kuleta imfwa.
11 Ndipo onani mwachakuyavyilani chisoni chamene ichi chukatijana na vakufuna Mulungu. Chakuyavyani kunkhala akhama ngako, chakuchitishani kulituŵisha, kunyansiwa na chiipa, kunkhala na wowa, kufunishisha kulapa, kunkhala olipeleka komasoti kuwamya vophoniyeka. Mwawonesha kuti nimwe atuŵa* mu mbali zonse pa nkhani yamene iyi.
12 Olo kuti nikulembelani, niliye chite vamene ivo chifukwa cha munthu wamene uyo ephoniya olo ephoniyelewa yayi, koma kuti viziŵike pamenso pa Mulungu kuti mufunishisha kumvwila mawu ŵasu.
13 N’chifukwa chake tatang’ishiwa.
Koma olo n’tetyo kuyangijila pa kutang’ishiwa tikondwelasoti ngako petiwona kuti Tito osangalala, chifukwa mwewo monse mwemutang’isha.
14 Nilaŵila mokumekelani kuli yove ndipo muliye nichitishe nsoni. Koma vetilaŵila momekela kuli Tito ni vachendi, monga ni mwavilili vinthu vonse vetikuujani.
15 Komasoti yove okukondani ngako mwewo monse akakumbukila kumvwila kwanu, komasoti vemwichita pomulondela mwaulemu ngako.
16 Nusangalala ngako chifukwa chakuti munitang’isha pa vinthu vonse vamuchita.
