Yachiŵili yoluta kuli Akolinto 8:1-24
8 Lomba akwasu, tufuna tikuziŵisheni za kuwama ntima kukulu kwawawonesha Mulungu ku mipingo yaku Makedoniya.
2 Ove penzekumana na mayeselo akulu chifukwa cha mavuto, enzesangalala ngako komasoti ewonesha kuti ni opasa olo kuti enze osauka ngako.
3 Ove echita mokatijana na vangakwanishe, komasoti nuŵachitila umboni kuti echita vopambana pamene apo,
4 ndipo eyamba ŵeka kutisenga kufumila pansi pa ntima kuti tiŵapaseko mwayi wopeleka mphaso zachifundo kuti achiteko utumiki woyavya atuŵa.
5 Ndipo aliyechite tyala vetenze yembekezela, koma poyamba eyeja-yeja na ntima wonse kutumikila Ambuye ndipo etiyavya mokatijana na vakufuna Mulungu.
6 Tetyo tilimbikisa Tito kuti, pakuti yove niye eyambisha ntchito younganija vopeleka vanu, asilijesoti ni yove kuunganija mphaso zanu zachifundo.
7 Mwewo muchita luweme pa chilichonse. Chikhulupililo chanu ni chotang’a, muli na luso yolaŵila, muziŵa vinyinji, muchita vinthu vonse mwakhama komasoti mukonda ayakine monga ni mwatukukondelani sewo. Tetyo pitilijanisoti kunkhala na ntima wofuna kupeleka.
8 Nukulamulanilini, koma nulaŵila vamene ivi kuti muziŵe vachita ayakine mwakhama komasoti kuti niwone keno chikondi chanu ni chachendi.
9 Chifukwa muziŵa kuwama ntima kukulu kwa Ambuye wasu Yesu Khilisitu, kuti olo kuti enze wolemela, enkhala wosauka chifukwa cha mwewo, kuti mwewo mulemele kupitila mu kusauka kwake kwamene uko.
10 Nilaŵileko maganizo ŵangu pamene apa. Mungachite luweme kusilija ntchito yamene iyo ya vopeleka, chifukwa mweiyamba chaka chasila komasoti mwiwonesha ntima wofunishisha kuchita vamene ivi.
11 Lomba silijani ntchito yemwiyamba. Pakuti mwenzefunishisha kuchita vamene ivi, musilijesoti kuvichita mokatijana na vamuli navo.
12 Mphaso yofumila pansi pa ntima niye yakukondwela nayo Mulungu chifukwa Mulungu ofuna kuti munthu apeleke vangakwanishe, osati vangalekekwanisha.
13 Nufunalini kuti kuli ayakine vinkhale vosavuta, koma kuli mwewo vinkhale vovuta.
14 Koma nufuna kuti vinthu vinyinji vamuli navo viyavye pa valiye ove, ndipo vinyinji vali navo ove viyavye pa vamuliye mwewo, kuti pankhale kulingana.
15 Mokatijana na vakunena Malemba kuti: “Munthu wamene enze na vinyinji enzelini na vopitilila malile, ndipo munthu wamene enze na vitontho enzelini na vosakwanila.”
16 Tutembeja Mulungu chifukwa choyavya Tito kuti akokudelani nkhaŵa monga ni mwatuchitila sewo.
17 Yove wamvwila chendi vetimulimbikisa kuti achite, ndipo pakuti ofunishisha kuyavya, akuza kwamene uko mwakufuna kwake.
18 Komasoti tumutumija pamozi na nkwasu muyakine wamene otamandiwa m’mipingo yonse chifukwa cha vakuchita vokhuza uthenga uweme.
19 Ni vamene ivolini veka, koma esankhiwasoti na mipingo kuti akoyenda nase patuleta mphaso zamene izi zachifundo. Tupeleka mphaso zamene izi kuti Ambuye alondele ulemelelo komasoti kuti tiwoneshe kuti tufunishisha kuyavya ayakine.
20 Tetyo tufunalini kuti munthu aliyense atipezele chifukwa pa mwatupelekela vopeleka vamene ivi vaufulu.
21 Chifukwa ‘tusamalila vinthu vonse mwachilungamo, osati pamenso pa Yehova tyala, koma pamensosoti pa ŵanthu.’
22 Akwasu amene aŵa tuŵatumijasoti pamozi na nkwasu wamene tamuyesa moweleja-weleja ndipo tawona kuti ni wakhama pa vinthu vinyinji. Palipano wawoneshasoti kuti ni wakhama ngako chifukwa okukhulupililani ngako.
23 Koma keno pali vilivonse vamukaikila vokhuza Tito, nufuna nikuujeni kuti yove ni muyangu komasoti nukata naye ntchito pamozi pokuyavyani. Olo keno mungakaikile vilivonse vokhuza akwasu amene aŵa, ove ni nthumi za mipingo ndipo oleta ulemelelo kwa Khilisitu.
24 Tetyo awonesheni kuti muŵakonda komasoti muwoneshe mipingo chifukwa chuchitisha kuti tikokumekelani.
