Yachiŵili yoluta kuli Akolinto 9:1-15
9 Ponena za utumiki woyavya atuŵa, n’posafunika kuti nichite kukulembelani.
2 Chifukwa nuziŵa kuti muli na ntima wofunishisha ndipo nulaŵila vamene ivi momekela kuli ŵanthu aku Makedoniya. Nuŵauja kuti akwasu aku Akaya ankhala okonzeka kwa chaka chimozi lomba ndipo kulipeleka kwanu kwatang’isha akwasu anyinji kwamene uko.
3 Koma nutumija akwasu kuti osati tikokumekelani patyala pa nkhani yamene iyi, koma kuti munkhale chendi okonzeka mokatijana na vanaŵauja.
4 Chifukwa nikazafwika kwamene uko na ŵanthu aku Makedoniya nofwana kuti muliye konzekele, sewo pamozi na mwewo, tonse tizachite nsoni chifukwa tenzekhulupilila kuti mukonzekele.
5 Tetyo nawona kuti vili luweme kuti niuje akwasu kuti awele kwamene uko sewo tikaliye wela, na cholinga chakuti azakuyavyeni kukonzekelelatu mphaso yemwilonjeza kuti muzapeleke na ntima wonse. Vikachitika tetyo, vizankhale kuti mphaso yamene iyi ikonzelewatu kale ndipo vizawonekeletu kuti muipeleka na ntima wonse osati mokakamijiwa.
6 Pa nkhani yamene iyi, wokomola mbewu zitontho azaweje vitontho koma wokomola mbewu zinyinji azaweje vinyinji.
7 Aliyense achite mokatijana na mwawasimikijila mu ntima mwake, osati mokwinyilila olo mokakamijika, chifukwa Mulungu okonda munthu wamene opeleka mosangalala.
8 Komasoti Mulungu angakuwonesheni ngako kuwama ntima kwake kukulu kuti osati musoŵe vinthu vamufunikila pa moyo komasoti kuti munkhale na vinthu vinyinji vamene vingakuyavyeni kukata ntchito iliyonse iweme.
9 (Mokatijana na vakunena Malemba kuti: “Yove wayaŵa na ntima wonse. Wapeleka kuli ŵanthu osauka, ndipo chilungamo chake chizankhalepo kosasila.”
10 Tetyo Mulungu wamene opeleka na ntima wonse mbewu kuli okomola komasoti chakulya kuti ŵanthu alye, azakupaseni na ntima wonse mbewu zakuti mukomole. Azayangijilesoti vinthu vamukuti muzaweje chifukwa cha chilungamo chanu.)
11 Mulungu okudalisani pa chilichonse kuti mukwanishe kupeleka na ntima wonse mu njila zosiyana-siyana ndipo ŵanthu otembeja Mulungu wamene uyo chifukwa cha mphaso zanu zatupeleka sewo kuli ŵanthu ayakine.
12 Chifukwa utumiki wamene uyu woyavya ŵanthu uyavyalini tyala atuŵa kuti afwane vakufunikila, koma uchitishasoti kuti ŵanthu anyinji akotembeja Mulungu mmapemphelo ŵawo.
13 Chifukwa cha umboni waupeleka utumiki wamene uyu, ove olemekeza Mulungu. Ochita tetyo chifukwa mwewo mwagonjela uthenga uweme unena za Khilisitu wamulengeza patuŵa komasoti mwapeleka na ntima wonse kuli ove na kuli ŵanthu onse.
14 Ove okupemphelelani mopapatila kwa Mulungu ndipo owonesha kuti okukondani chifukwa cha kuwama ntima kukulu kwawakuwoneshani Mulungu.
15 Tutembeja Mulungu chifukwa cha mphaso yake yamahala, yamene tingakwanishelini kuifotokoza.