Yachiŵili yoluta kuli Atesalonika 3:1-18
3 Posilijila akwasu, pitilijani kutipemphelela kuti mawu a Yehova apitilije kufalikila mokulumija komasoti kulemekezewa monga ni mwakuchitila pakati panu.
2 Mukotipemphelelasoti kuti tipulumushiwe kuli ŵanthu aipa ngako, chifukwa ni ŵanthulini onse amene ali na chikhulupililo.
3 Koma Ambuye ni wokhulupilika ndipo azakutang’isheni nokutetezani kwa Satana.
4 Komasoti monga ŵanthu okonkheja Ambuye tili na chikhulupililo muli mwewo kuti mukonkheja malangizo ŵetikupasani ndipo mupitilija kuŵakonkheja.
5 Ambuye apitilije kusogolela mitima yanu kuti mukokonda Mulungu komasoti kuti mukopilila potumikila Khilisitu.
6 Lomba akwasu tukupasani malangizo mu zina ya Ambuye Yesu Khilisitu, kuti mukopewa nkwasu aliyense wamene ochita vinthu vatyala-tyala komasoti wamene ochita vinthu vamene vukatijanalini na malangizo* ŵetikupasani.*
7 Ndipo mwewo muziŵa vamufunikila kuchita potikonkheja, chifukwa tiliye chite vinthu vatyala-tyala pakati panu,
8 olo kulya chakulya chamahala* cha munthu aliyense. Mmalo mwake, tikata ntchito mwakhama komasoti na mphamvu zasu zonse usiku na nzuŵa kuti aliyense wa mwewo osati atilipilile kanthu kalikonse pofuna kutiyavya.
9 Sikuti tichita vamene ivi chifukwa chakuti tiliye ulamulilo wokusengani kuti mutiyavye, koma tenzefuna kuti tikupaseni chisanzo chakuti mukokonkheja.
10 Ndipo petenze namwe pamozi, tenzekupasani lamulo yakuti: “Keno muyakine ofunalini kukata ntchito, osati alye.”
11 Chifukwa tikumvwa kuti ayakine ochita vatyala-tyala pakati panu, ofunalini nokata ntchito kumo, koma oloŵelela nkhani zamene zuŵakhuzalini.
12 Ŵanthu otetyo tuŵalamula noŵapapatila mwa Ambuye Yesu Khilisitu kuti akokata ntchito mwakhama paliye kuloŵelela nkhani za ŵanthu ayakine ndipo akokulya chakulya chamene ove achikatila ntchito.
13 Koma mwewo akwasu, osati muleke kuchita viweme.
14 Koma keno muyakine omvwilalini mawu ŵasu amene ali mu kalata yamene iyi, muikeni chizindikilo ndipo muleke kuchita naye vinthu pamozi kuti achite nsoni.
15 Koma olo n’tetyo osati mukomuwona monga ni mdani, koma pitilijani kumulangiza monga nkwasu.
16 Lomba Ambuye wantendele akupaseni ntendele nthawe zonse mu njila iliyonse. Ambuye ankhale namwe mwewo monse.
17 Londelani moni wangu, wanalemba newo Paulo na kwanja yangu. Nthawe zonse nulemba teti mmakalata ŵangu onse, kuti muziŵe kuti ninewo nalemba. Mwamene umu niye mwanulembela.
18 Kuwama ntima kukulu kwa Ambuye wasu Yesu Khilisitu kunkhale namwe mwewo monse.
Malizu a m'nyansi
^ Olo kuti, “mwambo.”
^ Mabaibolo ayakine onena kuti, “ŵetiŵapasa.”
^ Olo kuti, “osalipila.”
