Yachiŵili ya Petulo 1:1-21
1 Newo Simoni Petulo, kapolo komasoti ntumwi wa Yesu Khilisitu. Nulembela ŵanthu amene afwana chikhulupililo chantengo wapatali cholingana na chasu kupitila mu chilungamo cha Mulungu wasu komasoti cha Mpulumusi wasu Yesu Khilisitu.
2 Kuwama ntima kukulu kwa Mulungu na ntendele wake viyangijilike kuli mwewo. Kuti vamene ivi vikwanishike, mufunikila kumuziŵa luweme Mulungu komasoti Yesu Ambuye wasu.
3 Pokatishila ntchito mphamvu zake, Mulungu watipasa mwamahala vonse vatufunikila kuti tinkhale na moyo komasoti kuti tinkhale olipeleka kuli yove. Vamene ivi vakwanishika chifukwa choziŵa luweme vokhuza Mulungu wamene etiita kupitila mu ulemelelo na ubwino wake.
4 Kupitila mu vinthu vamene ivi, yove watilonjeza vinthu vantengo wapatali komasoti vikulu ngako, kuti mokatijana na malonjezo amene aŵa munkhale na ulemelelo wali nawo Mulungu. Wachita vamene ivi chifukwa tileka kuchita minkhalidwe iipa ya muli ichi chalo yamene yuyamba chifukwa chokumbwila vinthu viipa.
5 Chifukwa cha vamene ivi, yeja-yejani mwakhama kuyangijila minkhalidwe iweme pa chikhulupililo chanu, pa minkhalidwe yanu iweme muyangijilepo kuziŵa vinthu,
6 pa kuziŵa vinthu kulilesha, pa kulilesha, kupilila, pa kupilila kulipeleka kwa Mulungu,
7 pa kulipeleka kwa Mulungu kukonda akwasu, pa kukonda akwasu, chikondi.
8 Keno muchita vinthu vonse vamene ivi komasoti keno muwonesha ngako minkhalidwe yamene iyi, muzakatishile ntchito vinthu vamuziŵa luweme vokhuza Ambuye wasu Yesu Khilisitu ndipo vamene ivi vizakuyavyeni kuti osati tyala mukokuŵa nkhale olo kukangiwa kutwala vitwazi.
9 Munthu wamene aliye minkhalidwe yamene iyi ololeshalini, wasunzumila menso ŵake kuti osati awone kungweleŵela ndipo waluŵa kuti etuŵishiwa ku machimo ŵenzechita kale-kale.
10 Tetyo akwasu chitani chilichonse chamungakwanishe kuti munkhale mphela okhulupilika, na cholinga chakuti mupitilije mphela kunkhala pakati pa ŵanthu amene Mulungu eŵaita komasoti kuŵasankha. Mukapitilija kuchita vamene ivi, muzakangiwelini olo patontho.
11 Ndipo muzadalisiwe ngako mwakuti muzaloŵe mwaulemelelo mu Ufumu wosasila wa Ambuye komasoti Mpulumusi wasu Yesu Khilisitu.
12 Pa chifukwa chamene ichi, nufuna kuti nikokukumbushani vinthu vamene ivi nthawe zonse, olo kuti muviziŵa kale ndipo nimwe otang’a mu choonadi chamene mwechiphunzila.
13 Tetyo nuwona kuti vili luweme kuti nikokunyang’anyishani pokukumbushani vamene ivi panikali na muŵili wangu wamene uyu, wamene uli monga ni nsasa.*
14 Nuwona tetyo chifukwa nuziŵa kuti nasala patontho kufuma mu nsasa wangu wamene uyu, mokatijana na mwechiniujila Ambuye wasu Yesu Khilisitu.
15 Nthawe zonse nikoyeja-yeja kukukumbushani kuti nikazafumapo muzakwanishe kukumbukila mweka vinthu vamene ivi.
16 Petenzekuziŵishani vokhuza mphamvu za Ambuye wasu Yesu Khilisitu komasoti vokhuza kunkhalapo* kwake, tiliye tolele nkhani za wenye zenzekonza ŵanthu mochenjela. Koma tikuujani vinthu vokhuza ulemelelo wake vamene tichita kuviwona na menso ŵasu.
17 Chifukwa Khilisitu elondela ulemu na ulemelelo kufumila kwa Mulungu, Atata ŵasu, pechimvwika mawu kuli yove kufumila mu ulemelelo ukulu kuti: “Uyu ni Mwana wangu wanukonda, wamene onikondwelesha ngako.”
18 Tichimvwa mawu amene aŵa kufumila kululu petenze naye pamozi mulupili ituŵa.
19 N’chifukwa chake tukaikilalini olo patontho kuti mawu aulosi amene aŵa azakwanilishiwe ndipo muchita luweme kuŵaganizila ngako. Mawu amene aŵa akoyaka mmitima yanu monga ni laiti yamene yuyaka mu mfinzi. Pitilijani kuchita vamene ivi mpaka mmatemwakucha, nthanda* ikafuma.
20 Mwewo muziŵa mfundo yofunika yakuti, paliye ulosi wa m’Malemba wamene ufumila mmaganizo a munthu.
21 Chifukwa ulosi uliye fumile ku ŵanthu, koma ŵanthu amene awo elaŵila mawu ofumila kwa Mulungu mosogolelewa* na mzimu utuŵa.
Malizu a m'nyansi
^ Mawu amene aŵa otanthauza malo ŵakunkhala munthu mongoyembekezela ndipo Petulo eŵakatishila ntchito ponena za muŵili wake.
^ Onani matanthauzo a mawu ayakine.
^ “Nthanda” ni nyenyezi yusilijila kufuma yamene yuwonekela zuŵa ikasala patontho kufuma.
^ Mu Chigiliki, “motolewa; mokankhiwa.”
