Yachiŵili ya Petulo 3:1-18
3 Akwasu apantima, iyi lomba ni kalata yachiŵili yanukulembelani, ndipo molingana na yala yoyamba, nukulimbikisani kuti mukokatishila ntchito luweme mphamvu zanu zoganiza pokukumbushani pa vinthu vamuziŵa kale.
2 Nuchita vamene ivi kuti mukumbukile mawu ŵechinena kale-kale aneneli atuŵa komasoti lamulo yechipeleka Ambuye na Mpulumusi wasu kupitila muli atumwi.*
3 Choyamba ziŵani kuti mmasiku osilijila kuzankhale ŵanthu amene akuti azalaŵile vinthu vonyoza. Pokonkheja vinthu vakukumbwila,
4 azalaŵile kuti: “Kansi kunkhalapo* kwake kwala kwilonjezewa kuli kuni? Onani, paliye chachinja kufumila pa nsiku yechimwalila makolo ŵasu. Vinthu vonse vupitilija kuchitika molingana na mwevenzechitikila kufumila pachiyambi pa chilengedwe.”
5 Ŵanthu amene aŵa onyalanyaza mwalona mfundo yakuti kale-kale penze kululu na chalo chamene chifuma mmanzi nonkhala palulu pa manzi amene awo chifukwa cha mawu a Mulungu.
6 Ndipo kupitila mu vinthu vamene ivi, chalo cha mu nthawe yamene iyo chiwonongewa mwakumbila mmanzi a chigumula.
7 Koma na mawu a Mulungu amene awo, kululu na chalo vamene vilipo pali pano avisungila mulilo ndipo ovisunga mphela mpaka pa nsiku yakuti azaweluze komasoti kuwononga ŵanthu asayopa Mulungu.
8 Tetyo akwasu apantima, osati mukangiwe kuziŵa mfundo yakuti, kwa Yehova nsiku imozi ili monga ni vyaka 1.000, ndipo vyaka 1.000 vili monga ni nsiku imozi.
9 Yehova ochelwalini kukwanilisha vechilonjeza monga ni mwakuwonela ŵanthu ayakine kuti ochelwa. Koma okulezelani ntima chifukwa ofunalini kuti munthu aliyense azawonongewe, koma ofuna kuti ŵanthu onse alape.
10 Koma nsiku ya Yehova izafwike monga ni kawalala, pamene kululu kuzafume na mulilimo ukulu. Ndipo vinthu vupanga kululu na chalo vizapye ngako nosambuluka mwakuti chalo na ntchito zake vizawonekele patuŵa.
11 Pakuti vinthu vonse vamene ivi vizasambuluke teti, ganizilani za ntundu wa ŵanthu wamufunikila kunkhala. Mufunikila kunkhala ŵanthu a nkhalidwe ituŵa ndipo mukochita ntchito zuwonesha kuti nimwe olipeleka kwa Mulungu.
12 Mukochita vamene ivi pamuyembekezela komasoti kukumbukila nthawe zonse* kuwela kwa nsiku ya Yehova. Pa nsiku yamene iyi kululu kuzapye na mulilo nowonongekelatu ndipo vinthu vupanga kululu na chalo vizapye ngako nosambuluka.
13 Koma pali kululu kwa nyowani na chalo cha nyowani vatuyembekezela sewo mokatijana na lonjezo yake, ndipo mwamene umo muzankhale chilungamo.
14 Tetyo akwasu apantima, pakuti muyembekezela vinthu vamene ivi, yeja-yejani kuchita vonse vamungakwanishe kuti Mulungu azakufwaneni muli atuŵa, muliye chophoniya komasoti muli mu ntendele.
15 Kuyangijila pamene apa, mukowona kuti kuleza ntima kwa Ambuye wasu ni chipulumuso, mongasoti ni mwechikulembelani nkwasu wapantima Paulo mokatijana na nzelu zechipasiwa.
16 Yove efotokoza vamene ivi monga ni mwakuchitila mmakalata ŵake onse. Koma olo n’tetyo, mmakalata ŵake amene awo, muli vinthu viyakine vovuta kuvimvwisha, vamene ŵanthu osaphunzisika komasoti achikhulupililo chosatang’a ovichinja. Ochita vamene ivi monga ni mwakuchitilasoti na Malemba ayakine onse, vamene vizaŵachitishe kuti azawonongewe.
17 Tetyo mwewo akwasu apantima, pakuti mwaziŵilatu vamene ivi, chenjelani kuti ŵanthu ofwaya malamulo amene awo osati akuluŵilisheni na vochita vawo viipa nochitisha kuti mupone chifukwa chokangiwa kunkhala otang’a.
18 Osati muchite tetyo yayi, koma mukochita vinthu vamene vingakuyavyeni kuti mupitilije kulondela kuwama ntima kukulu kwa Ambuye na Mpulumusi wasu Yesu Khilisitu, komasoti kuti mumuziŵe luweme ngako. Kuli yove kunkhale ulemelelo, kufumila palipano mpaka kale-kale. Ame.
Malizu a m'nyansi
^ Mu Chigiliki, “atumwi ŵanu.”
^ Onani matanthauzo a mawu ayakine.
^ Olo kuti, “komasoti kufunishisha.”
