Yachiŵili yoluta kuli Timoteyo 3:1-17
3 Koma ziŵa kuti masiku osilija azankhale nthawe yapadela komasoti yovuta.
2 Ŵanthu azankhale olikonda, okonda ndalama, olitumba, olikuja, onyoza, asamvwila makolo, asatembeja, asakhulupilika,
3 asakonda enekwawo, asafuna kukatijana na ayakine, olaŵilila ayawo viipa, asalilesha, oyofya, asakonda viweme,
4 ochitila ayawo viipa, asamvwa vayakine, olitumba chifukwa cha kumeka, okonda vosangulusha mmalo mokonda Mulungu,
5 komasoti owoneka monga ni olipeleka kwa Mulungu koma okana kuti mphamvu ya kulipeleka kwamene uko iŵachinje. Ŵanthu amene aŵa ukoŵapewa.
6 Ayakine mwa ŵanthu amene aŵa oloŵelela mojeŵa mmabanja nochitisha anakazi ayakine kuti ankhale akapolo ŵawo. Anakazi amene aŵa onkhala ofoka chifukwa cha machimo ŵawo komasoti okopeka na vilakolako vosiyana-siyana.
7 Nthawe zonse ophunzila, koma okwanishalini kuziŵa luweme choonadi.
8 Molingana na Yane na Yambule, amene eshusha Mose, ŵanthu amene aŵasoti opitilija kushusha choonadi. Ove ali na maganizo obenda ngako, ndipo oyenelelalini chikhulupililo chamene ichi.
9 Koma angalutelini patali, chifukwa kupusa kwawo kuwonekele luweme kuli ŵanthu onse, monga ni mwevinkhalila na ŵanthu ŵala aŵili.
10 Koma wewo wayeja-yeja kukonkheja vanuphunzisa, moyo wangu, cholinga changu, chikhulupililo changu, kuleza ntima kwangu, chikondi changu na kupilila kwangu.
11 Uziŵasoti mwenitamanila komasoti masauso ŵenikumana nawo ku Antiyokeya, ku Ikoniyo na ku Lusitala. Koma olo n’tetyo nipilila ndipo Ambuye enipulumusha ku vinthu vonse vamene ivo.
12 Pala onse ofuna kunkhala na moyo wolipeleka kwa Mulungu mokatijana na Khilisitu Yesu, nawosoti azatamanishiwe.
13 Koma ŵanthu aipa komasoti achinyengo azapitilije kuipila-ipila. Ove azaluŵilishe ayakine ndipo nawosoti azaluŵilishiwe.
14 Koma wewo, pitilija kukonkheja vewiphunzila na vewikhulupilila pavuli pakuti wakhutila navo, chifukwa uziŵa ekuphunzisa.
15 Kufumila pewenze lucheche, waziŵa malemba atuŵa amene angakupase nzelu zokuyavya kuti uzapulumuke chifukwa chokhulupilila Khilisitu Yesu.
16 Malemba onse eujiliwa na Mulungu, ndipo ni oyavya pophunzisa, kuzuzula, kuwamya vinthu na kulangiza mwachilungamo,
17 kuti munthu wa Mulungu ankhale woyenelela ngako na wokonzeka mokwanila kukata ntchito iliyonse iweme.
