Yachiŵili yoluta kuli Timoteyo 4:1-22
4 Pamenso pa Mulungu na Khilisitu Yesu, wamene akuti azaweluze amoyo na akufwa, akazawonekela komasoti akazawela mu Ufumu wake, nukulamula mwamphamvu kuti:
2 Lalikila mawu. Ukolalikila molipeleka pa nthawe iweme na pa nthawe yovuta. Zuzula, shusha, dandaulila, ndipo ukochita vamene ivi na luso yophunzisa komasoti moleza ntima ngako.
3 Chifukwa izafwike nthawe yamene ŵanthu azafunelinisoti kuphunzisiwa vinthu vachilungamo, koma mokatijana na vakufunishisha azafwane aphunzisi amene akuti akoŵauja vinthu vuŵawamila mmatu mwawo.
4 Ove azaleke kumvwishila choonadi noyamba kumvwishila nkhani zawenye.
5 Koma wewo unkhale mphela woganiza luweme pa vinthu vonse, ukopilila mavuto, ukokata ntchito ya mulaliki,* komasoti ukokwanilisha mbali zonse za utumiki wako.
6 Nili monga ni nsembe ya chakumwa yamene yutiliwa pa guwa ya nsembe, ndipo nthawe yakuti nimasuke yasala patontho.
7 Naniyata nkhondo iweme. Nautuka pa mpikishano wamene uyu mpaka pamapeto. Nankhala mphela na chikhulupililo.
8 Palipano anisungila chisote chachifumu cha olungama. Ambuye, woweluza wachilungamo, azanipase mphoto yamene iyi pa nsiku yamene iyo. Sikuti azapase newo neka koma azapasesoti onse amene ankhala oyembekezela kuti yove azawonekele.
9 Yeja-yeja kuti uwele kwalombapano.
10 Dema kuno wanisiya chifukwa chokonda vinthu va muli ichi chalo* ndipo waluta ku Tesalonika. Kelesike waluta ku Galantiya ndipo Tito waluta ku Dalimatiya.
11 Luka tyala niye wasala. Uwelesoti na Maliko chifukwa oniyavya pa utumiki wangu.
12 Koma Tukiko namutuma ku Ifenso.
13 Powela uniletelekosoti chovwala cha mphepo chenisiya ku Tolowa kwa Kalipo komasoti mipukutu maka-maka yala ya vikumba.
14 Alekizanda wala wamene ofula vinthu vakopa, enichitila vinthu viipa ngako. Yehova azamuwejele mokatijana na ntchito zake.
15 Nawesoti uchenjele naye, chifukwa eshusha uthenga wasu mwamphamvu.
16 Pa nthawe yenenzeliteteza pa ulwendo woyamba pa mulandu wangu paliye enze kumbali yangu, mwakuti onse enisiya. Koma olo n’tetyo osati ankhale na mulandu.
17 Koma Ambuye epanama pafupi na newo nonipasa mphamvu. Echita vamene ivi kuti kupitila muli newo, ntchito yolalikila ichitike mokwanila, komasoti kuti mitundu yonse ya ŵanthu imvwe uthenga wamene uyo. Komasoti nipulumushiwa nkamwa mwa mphondolo.
18 Ambuye azanipulumushe ku chinthu chilichonse chiipa ndipo azanisunge kuti nikankhale mu Ufumu wake wakululu. Yove apasiwe ulemelelo mpaka kale-kale. Ame.
19 Unipelekele moni kwa Pulisika na Akula komasoti banja ya Onesifolo.
20 Elasito esala ku Kolinto, koma Telofimo nemusiya kuti olwala ku Mileto.
21 Uyeje-yeje kuti ufwike kuno nthawe yozizila ikaliye yamba.
Ebulo, Pude, Lino, Kalaudiya komasoti akwasu onse opeleka moni.
22 Ambuye ankhale nawe chifukwa cha mzimu wauwonesha. Kuwama ntima kwake kukulu kunkhale namwe.
Malizu a m'nyansi
^ Olo kuti, “yolalikila uthenga uweme.”
^ Olo kuti, “va mu nthawe ino.” Onani matanthauzo a mawu ayakine.