Kuli Afilipi 4:1-23
4 Tetyo mwewo akwasu amene nukukondani ndipo nufunishisha kukuwonani, nimwe chisangalalo changu na chisote changu cha ulemelelo. Apantima pangu, nukulimbikisani kuti mupitilije kunkhala okhulupilika kwa Ambuye.
2 Nudandaulila Eodiya komasoti Suntuke kuti akambilane nosilija kuphoniyana maganizo kwawo monga ophunzila ŵa Ambuye.*
3 Nusengasoti wewo wantchito muyangu ngaye-ngaye,* kuti upitilije kuŵayavya anakazi amene aŵa. Ove ayeja-yeja mwakhama kukata ntchito yolalikila uthenga uweme pamozi na newo. Achita vamene ivi pamozisoti na Kilementi komasoti antchito ayangu ayakine onse amene mazina ŵawo ali m’buku ya moyo.
4 Nthawe zonse mukosangalala chifukwa cha Ambuye. Nuwelejasoti kunena kuti mukosangalala!
5 Ŵanthu onse aziŵe kuti nimwe ololela. Ambuye ali pafupi.
6 Osati mukodela nkhaŵa na chinthu chilichonse. Mmalo mwake, nthawe zonse mukopemphela kwa Mulungu, mukomupapatila kuti akokusogolelani pa chilichonse ndipo nthawe zonse mukomutembeja.
7 Mukachita tetyo, ntendele wa Mulungu wamene ŵanthu angakwanishelini kuumvwisha, uzateteze mitima yanu na maganizo ŵanu pamukonkheja Khilisitu Yesu.
8 Posilijila akwasu, pitilijani kuganizila* vinthu vilivonse vachendi, vilivonse vofunika ngako, vilivonse volungama, vilivonse vituŵa, vilivonse volimbikisa chikondi, vilivonse vakutembeja ŵanthu, nkhalidwe iweme iliyonse komasoti chilichonse chotamandika.
9 Vinthu vemwiphunzila vamene mwivivomekeja, vemwichimvwa kuli newo komasoti vemwiwona nuvichita, mukochita vamene ivo ndipo Mulungu wa ntendele ankhale namwe.
10 Newo nusangalala ngako mwa Ambuye kuti lomba mwayambasoti kuniganizila. Nuziŵa kuti mwankhala muniganizila nthawe yonse yamene iyi, koma tyala mwenzesoŵa mpata wowonesha vamene ivi.
11 Nulaŵilalini vamene ivi chifukwa chakuti nusoŵa kanthu, chifukwa naphunzila kunkhala wokhutila na vanili navo osaganizila mwavilili vinthu pa moyo wangu.
12 Nuziŵa mwavunkhalila ukankhala na vinthu vitontho komasoti mwausangalalila ukankhala na vinyinji. Pa chilichonse komasoti pa vochitika vosiyana-siyana, naphunzila chisinsi chonkhala wokuta na chonkhala wanjala. Naphunzilasoti chisinsi chonkhala na vinyinji komasoti chonkhala uliye kalikonse.
13 Pa vinthu vonse, nufwana mphamvu kufumila kwa Mulungu wamene onipasa mphamvu zanufunikila.
14 Koma olo n’tetyo, mwichita luweme kuniyavya pa mavuto ŵangu.
15 Ndipo mwewo Afilipi, muziŵasoti kuti penenzefuma ku Makedoniya, pemwichingokumvwa kwalombapano uthenga uweme, paliye mpingo olo umozi wamene winiyavya pa nkhani yopasa na kulondela, kupatulapo mwewo mweka.
16 Chifukwa penenze ku Tesalonika, mwewo mwinitumijila kanthu kayakine kuti kaniyavye pa venenzefunikila ndipo muliyechite vamene ivi kamozi tyala, koma kaŵili konse.
17 Nutanthauzalini kuti nufuna munipase mphaso, koma nufunishisha kuti mukochita vinthu viweme vamene vingakupindulileni ngako.
18 Koma olo n’tetyo, newo nili na vonse vanufunikila ndipo vupambana pa vanufunikila. Nusoŵalini kanthu chifukwa Epafulodito wanipasa vinthu vamwanitumijila. Vinthu vamene ivi vili monga ni vinthu vonunkhila luweme komasoti vili monga ni nsembe yovomelejeka yamene ni yokondwelesha kwa Mulungu.
19 Chifukwa cha vamene ivi, Mulungu wangu azakupaseni vonse vamufunikila mokatijana na kupaka kwa chuma chake cha ulemelelo, kupitila mwa Khilisitu Yesu.
20 Lomba Mulungu wamene ni Atata ŵasu alondele ulemelelo mpaka kale-kale. Ame.
21 Munipelekele moni kuli ntuŵa aliyense wamene ni wophunzila wa Khilisitu Yesu. Akwasu amene ali nane pamozi okupasani moni.
22 Atuŵa onse opeleka moni, koma maka-maka a m’ng’anda ya Kaisala.
23 Kuwama ntima kukulu kwa Ambuye Yesu Khilisitu kunkhale namwe, chifukwa muli na maganizo aweme.
Malizu a m'nyansi
^ Olo kuti, “kuti ankhale na maganizo amozi pakutumikila Ambuye.”
^ Mu Chigiliki, “muyangu ngaye-ngaye wanutakula naye pamozi djoko.”
^ Olo kuti, “kuganizila ngako.”