Kuli Agalantiya 1:1-24
1 Newo Paulo, nine ntumwi, osati wofumila kuli ŵanthu olo woikiwa kupitila muli munthu, koma kupitila mwa Yesu Khilisitu komasoti kupitila mwa Mulungu Atata amene emuusha kwa akufwa.
2 Newo pamozi na akwasu amene ali nane pamozi tupeleka moni ku mipingo yaku Galantiya:
3 Kuwama ntima kukulu na ntendele vofumila kwa Mulungu Atata ŵasu na Ambuye Yesu Khilisitu, vinkhale namwe.
4 Yove elipeleka chifukwa cha machimo ŵasu, kuti atipulumushe ku chalo ichi chiipa, mokatijana na chifunilo cha Mulungu wamene ni Atata ŵasu.
5 Ulemelelo unkhale kwa Mulungu wamene uyo mpaka kale-kale. Ame.
6 Newo nudabwa kuti mwapatuka mokulumija kufuma kwa Mulungu wamene ekuitani kupitila mu kuwama ntima kukulu kwa Khilisitu ndipo mwayamba kumvwishila uthenga uweme wa ntundu uyakine.
7 Koma wamene uyo ni uthengalini uweme, kungoti tyala pali ŵanthu ayakine amene okusokonezani ndipo ofuna kusokoneza uthenga uweme unena za Khilisitu.
8 Koma lomba, keno sewo olo mngelo wofumila kululu angalalikile nkhani iyakine kuli mwewo nonena kuti olalikila uthenga uweme, koma nkhani yamene iyo nonkhala yosiyana na uthenga uweme wetilalikila kuli mwewo, wamene uyo ankhale wotembelelewa.
9 Monga ni mwatanenela kale, nunenasoti kuti: Aliyense wamene olalikila nkhani iyakine kuli mwewo nonena kuti ni uthenga uweme, koma yusiyana na yemwilondela, wamene uyo ankhale wotembelelewa.
10 Lomba kansi palipano nufuna kuti nikokondewa na ŵanthu olo Mulungu? Olo kansi nufuna tyala kukondwelesha ŵanthu? Kuti nukondwelesha mphela ŵanthu, sembe niliyenkhale kapolo wa Khilisitu.
11 Chifukwa nufuna kuti muziŵe akwasu, kuti uthenga uweme wenilalikila kuli mwewo uliyefumile kuli ŵanthu.
12 Uthenga wamene uyu niliye ulondele kuli munthu ndipo niliyechite phunzisiwa, koma Yesu Khilisitu niye eniululila uthenga wamene uyu.
13 Shuwa mwechimvwa venenzechita penenze mu Chiyuda, kuti nenzetamanisha ngako mpingo wa Mulungu ndipo nipitilija kuuwononga.
14 Nenzechita luweme ngako m’chipembezo cha Chiyuda kupambana ayangu anyinji a m’banja yangu, amene enze asaizi yangu, chifukwa nenze wolipeleka ngako pa miyambo ya makolo ŵangu.
15 Koma Mulungu wamene enichitisha kuti nivyalike komasoti kuniita kupitila mu kuwama ntima kwake kukulu pechiwona kuti n’viweme kuti
16 aulule za Mwana wake kupitila muli newo, na cholinga chakuti nilalikile kuli ŵanthu amitundu iyakine uthenga uweme unena za yove, niliyelute kuyakambilana na munthu aliyense nthawe yamene iyo.
17 Niliye lutesoti ku Yelusalemu kuli amene enkhala atumwi newo nikaliyenkhala, koma niluta ku Alabiya pavuli pake nijokelasoti ku Damasiko.
18 Lomba pavuli pa vyaka vitatu, niluta ku Yelusalemu kuyatandala kwa Kefa ndipo ninkhala naye pamozi kwa masiku 15.
19 Koma atumwi ayakine onse niliye ŵawone kupatulapo Yakobo, nkwawo wa Ambuye.
20 Nukusimikijilani pamenso pa Mulungu kuti vamene ivi vanukulembelani nutalalini wenye.
21 Pavuli pake niloŵa mmadela a Siliya na Kilikiya.
22 Koma ŵanthu a mmipingo yaku Yudeya yamene yenze yokatijana na Khilisitu, enzeniziŵalini luweme.
23 Ove enzekumvwa tyala kuti: “Munthu wala wamene kale enzetitamanisha komasoti kuwononga mipingo olalikila uthenga uweme lomba.”
24 Tetyo ŵanthu amene awo eyamba kulemekeza Mulungu chifukwa cha newo.
