Kuli Agalantiya 3:1-29
-
Ntchito za Chilamulo komasoti chikhulupililo (1-14)
-
Wolungama azankhale na moyo chifukwa cha chikhulupililo (11)
-
-
Lonjezo ya Abulahamu yenzedalilalini Chilamulo (15-18)
-
Khilisitu, ni mbadwa ya Abulahamu (16)
-
-
Kwechifumila Chilamulo komasoti cholinga chake (19-25)
-
Nimwe ŵana a Mulungu chifukwa cha chikhulupililo (26-29)
-
Ophunzila a Khilisitu, ni mbadwa za Abulahamu (29)
-
3 Agalantiya opusa mwewo! Kansi niŵani ekusemphani, mwewo amene mwinkhala monga mwawona Yesu Khilisitu ali khomelelewe pachimuti?
2 Nufuna nikukonsheni* chinthu chimozi: Kansi mwilondela mzimu chifukwa cha ntchito za chilamulo olo chifukwa chokhulupilila vemwichimvwa?
3 Kansi nimwe opusa teti? Mwiyamba na kudalila mzimu, kansi lomba mufuna kusilija na kudalila nzelu za ŵanthu amene aliye ungwilo?
4 Kansi kuvutika konse kwala kwichingopita patyala? Nukhulupilila kuti kuliye pite patyala.
5 Lomba kansi wamene okupasani mzimu nochita vinthu vamphamvu pakati panu, ochita vamene ivi chifukwa chakuti mwewo muchita ntchito za chilamulo olo chifukwa chakuti mukhulupilila uthenga uweme wemwichimvwa?
6 Ganizilani za Abulahamu. Yove “ekhulupilila vechimuuja Yehova ndipo enzewonewa kuti ni wolungama.”
7 Kulaŵila chendi muziŵa kuti amene onkhala mphela na chikhulupililo niye ŵana ŵa Abulahamu.
8 Kale-kale malemba enenelatu kuti Mulungu azawone ŵanthu amitundu iyakine kuti ni olungama chifukwa cha chikhulupililo. Tetyo elalikililatu uthenga uweme kwa Abulahamu wakuti: “Kupitila muli wewo, mitundu yonse izadalisiwe.”
9 Tetyo wamene ali na chikhulupililo champhamvu odalisiwa pamozi na Abulahamu, wamene enze na chikhulupililo.
10 Onse amene odalila ntchito za chilamulo ni otembelelewa, chifukwa Malemba onena kuti: “Munthu aliyense wamene opitilijalini kukonkheja vinthu vonse vamene vilembewa mu mpukutu wa Chilamulo ni wotembelelewa.”
11 Komasoti ni voziŵikilatu kuti paliye munthu wamene angawonewe kuti ni wolungama na Mulungu chifukwa cha chilamulo, pakuti “wolungama azankhale na moyo chifukwa cha chikhulupililo chake.”
12 Lomba Chilamulo chudalilalini chikhulupililo. Koma “aliyense wamene ochita va m’Chilamulo azankhale na moyo chifukwa cha chilamulo chamene icho.”
13 Khilisitu etigula notimasula ku tembelelo ya Chilamulo. Echita vamene ivi ponkhala tembelelo mmalo mwa sewo, chifukwa Malemba onena kuti: “Munthu aliyense wopanyikiwa pachimuti ni wotembelelewa.”
14 Cholinga chake chenze chakuti, kupitila mwa Khilisitu Yesu, mitundu ya ŵanthu ifwane madaliso ŵechilonjezewa Abulahamu, kuti tizalondele mzimu wamene uyo wolonjezewa chifukwa cha chikhulupililo chasu.
15 Akwasu, nipeleke fanizo mokatijana na vuchitika pakati pa ŵanthu: Pangano ikankhazikishiwa olo kuti ni pangano ya ŵanthu, paliye angaisilije olo kuyangijilapo mfundo ziyakine.
16 Tetyo malonjezo epelekewa kwa Abulahamu na kuli mbadwa yake.* Malemba onenalini kuti: “Kuli mbadwa zako,”* monga kuti mbadwa zamene izo ni zinyinji. Koma onena kuti, “kuli mbadwa yako,”* kutanthauza kuti ni imozi, wamene ni Khilisitu.
17 Komasoti newo nunena kuti: Choyamba, Mulungu echita pangano na Abulahamu ndipo papita vyaka 430 epeleka Chilamulo kuli ŵanthu ŵake. Koma Chilamulo chamene icho chiliye silije pangano na lonjezo yechichita Mulungu na Abulahamu, kuti lonjezo yamene iyo osati ikatesoti ntchito.
18 Chifukwa keno Mulungu epeleka chuma kupitila m’chilamulo niye kuti chudalilalinisoti lonjezo. Koma mowama ntima Mulungu wachipeleka kwa Abulahamu kupitila mu lonjezo.
19 Lomba ndaŵa yanji Chilamulo chipelekewa? Etipasa Chilamulo chamene ichi kuti machimo awonekele, mpaka kufwika kwa mbadwa* yamene iyo ipasiwa lonjezo. Angelo epeleka chilamulo chamene icho kupitila mmanja mwa mnkhalapakati.
20 Keno pangano yukhuza munthu mmozi ponkhalalini mnkhalapakati. Niyesoti mwevenzele na Mulungu, enze yeka penzepeleka lonjezo yamene iyi.
21 Lomba kansi Chilamulo chushusha malonjezo a Mulungu? Yayi shuwa. Chifukwa sembe kuti penze pipelekewa lamulo yopasa moyo, sembe tuwonewa kuti nise olungama chifukwa chokonkheja chilamulo.
22 Koma Malemba owonesha kuti ŵanthu olamuliliwa na uchimo, kuti lonjezo yamene yunkhalapo chifukwa chokhulupilila Yesu Khilisitu, ipelekewe kuli ŵanthu amene omukhulupilila.
23 Koma olo n’tetyo, chikhulupililo chamene icho chikaliyefwika, chilamulo niye chenzetilolela ndipo chitiika mu ukapolo. Pa nthawe yamene iyo, tenzeyembekezela chikhulupililo chamene chenze chisala patontho kuwonekela.
24 Tetyo Chilamulo chinkhala wotilolela wamene etisogolela kuli Khilisitu, kuti tiwonewe kuti nise ŵanthu olungama chifukwa cha chikhulupililo.
25 Koma pakuti chikhulupililo chamene icho chafwika lomba, tililinisoti pansi pa wotilolela wamene uyo.*
26 Ndipo mwewo monse nimwe ŵana a Mulungu chifukwa mukhulupilila Khilisitu Yesu.
27 Chifukwa mwewo monse amene mwibatiziwa ndipo nimwe okatijana na Khilisitu mwankhala na minkhalidwe monga ni ya Khilisitu.
28 Paliye Muyuda olo Mugiliki, paliye kapolo olo womasuka, paliyesoti mwanalume olo mwanakazi chifukwa monse nimwe amozi mwa Khilisitu Yesu.
29 Komasoti keno nimwe ophunzila a Khilisitu, nimwe chendi mbadwa* za Abulahamu, olondela chuma mokatijana na lonjezo yamene iyo.
Malizu a m'nyansi
^ Mu Chigiliki, “muniuje.”
^ Mu Chigiliki, “mbewu yake.”
^ Mu Chigiliki, “mbewu zako.”
^ Mu Chigiliki, “mbewu yako.”
^ Olo kuti, “mbewu.”
^ Olo kuti, “wotisogolela wamene uyo.”
^ Mu Chigiliki, “mbewu.”