Kuli Agalantiya 4:1-31
4 Lomba nunena kuti, olondela chuma akaŵa mwana ntontho, yove osiyanalini na kapolo, olo kuti ni munecho wa vinthu vonse.
2 Koma onkhala mphela pansi pa analume ololela ŵana komasoti ŵanthu ololela vinthu va abwana ŵawo, mpaka nsiku yechiikilatu atata ŵake.
3 N’chimozi-mozisoti na sewo. Petenze ŵana tenze akapolo chifukwa tenzekonkheja mfundo zakukonkheja ŵanthu ali muli ichi chalo.*
4 Koma nthawe peikwana, Mulungu etumija Mwana wake, wamene evyalika kupitila mwa mwanakazi ndipo enkhala pansi pa chilamulo.
5 Echita vamene ivi kuti apeleke malipilo omasulila ŵanthu amene enze pansi pa chilamulo na cholinga chakuti Mulungu atitole nonkhala ŵana ŵake.
6 Lomba pakuti nimwe ŵana ŵake, Mulungu wamene uyo, watumija mzimu wa Mwana wake mmitima yasu ndipo mzimu wamene uyo uŵilikija kuti: “Abba,* Atata!”
7 Tetyo aliyense wa mwewo ni kapololini, koma mwana. Ndipo keno niwe mwana, niye kuti niwewosoti ukuti uzalondele chuma chati azakupase Mulungu.
8 Olo kuti vili tetyo, pemwenzelekaziŵa Mulungu, mwenze akapolo a vinthu vamene ngako-ngako ni milungulini.
9 Koma palipano mwaziŵa Mulungu, olo tinene kuti lomba Mulungu wakuziŵani. Lomba mujokela tyanisoti ku mfundo zakukonkheja ŵanthu ali muli ichi chalo zamene ni zosayavya komasoti zatyala-tyala, nofuna kunkhalasoti akapolo ŵake?
10 Muchita vikondwelelo pa masiku, myezi, nyengo na vyaka vamuganiza kuti ni vapadela.
11 Nudela nkhaŵa kuti payakine ntchito yenikata pokuyavyani yangopita pa tyala.
12 Nukusengani enekwangu kuti munkhale monga ni newo chifukwa nanesoti poyamba nenze monga ni mwewo, muliye niphoniyele yayi.
13 Koma muziŵa kuti nifwana mwayi wolalikila uthenga uweme koyamba kuli mwewo chifukwa chakuti nenzelwala.
14 Ndipo olo kuti matenda ŵangu enze mayeselo kuli mwewo, muliye nyansiwe olo kuniwona kuipa. Koma mwinilondela monga mngelo wa Mulungu olo monga Khilisitu Yesu.
15 Lomba kansi chisangalalo chala chemwenze nacho poyamba chili kuni? Chifukwa nusimikijila kuti, sembe kuti venze vokwanishika, mwewo sembe mwichosa menso ŵanu nonipasa.
16 Kansi lomba nankhala mdani wanu chifukwa nakuujani vachendi?
17 Ŵanthu ayakine oyeja-yeja ngako kuti akukopeni na cholinga chakuti mukoŵakonkhelela. Ove ochitalini vamene ivi na cholinga chiweme, koma ofuna kuti akuchoseni kuli newo, kuti mwewo mukoŵakonkhelela.
18 Vili luweme keno munthu okuwoneshani chidwi ngako na volinga viweme, osati tyala panili pamozi na mwewo, koma nthawe zonse.
19 Mwewo ŵana ŵangu, nayambasoti kumvwa kuŵaŵa chifukwa cha mwewo monga ni mwanakazi wamene wasala patontho kuvyala. Nipitilije kumvwa kuŵaŵa kwamene uku mpaka muzayambe kuwonesha minkhalidwe ya Khilisitu.
20 Palipano sembe nakonda kunkhala namwe pamozi kuti nilaŵile namwe mwa njila iyakine, chifukwa mwanisilija nzelu.
21 Niujeni mwewo amene mufuna kuti mukokonkheja chilamulo. Kansi mukumvwalini vachunena Chilamulo chamene icho?
22 Mwachisanzo, Malemba onena kuti Abulahamu evyala ŵana analume aŵili, muyakine kuli kapolo mwanakazi ndipo muyakine kuli mwanakazi wamene enze womasuka.
23 Koma mwana wamene evyalika kuli kapolo wala mwanakazi evyalika monga ni mwakuvyalikila ŵana onse, pamene mwana muyakine wamene uyo wamene evyalika kuli mwanakazi wamene enze womasuka, evyalika kupitila mu lonjezo.
24 Vinthu vamene ivi vili na tanthauzo yophiphilisila, chifukwa anakazi aŵili amene aŵa opanamila mapangano aŵili. Yoyamba ni pangano ya palupili ya Sinayi, yamene yuvyala ŵana amene akuti akankhale akapolo. Pangano yamene iyo ni wala Hagala.
25 Lomba, Hagala wamene uyu otanthauza Sinayi, lupili yamene ili ku Alabiya, ndipo masiku ŵano olingana na Yelusalemu, chifukwa ali mu ukapolo pamozi na ŵana ŵake.
26 Koma Yelusalemu wam’mululu ni womasuka ndipo ni amayi ŵasu.
27 Chifukwa Malemba onena kuti: “Sangalala wewo mwanakazi chumba wamene ukaliyevyalapo mwana. Ŵilikija mokondwela, wewo mwanakazi wamene ukaliye mvwapo ululu povyala, chifukwa ŵana a mwanakazi wamene elekewa ni anyinji kupambana ŵana a mwanakazi wamene ali na mwanalume.”
28 Lomba mwewo akwasu, nimwe ŵana amene mwivyalika chifukwa cha lonjezo ya Mulungu molingana na Isaki.
29 Koma molingana na mwevenzele pa nthawe yamene iyo, kuti amene evyalika monga ni mwakuvyalikila ŵana onse eyamba kutamanisha wamene evyalika kupitila mwa mzimu, niyesoti mwavilili masiku ŵano.
30 Olo kuti vili tetyo, kansi Malemba onena kuti tyani? “Pitikishani kapolo mwanakazi wamene uyu pamozi na mwana wake pano, chifukwa mwana wa kapolo wamene uyu azankhalelini wolondela chuma pamozi na mwana wa mwanakazi wamene ni womasuka.”
31 Tetyo akwasu, sewo nise ŵana a mwanakazi wamene ni womasuka, osati a kapolo mwanakazi.
Malizu a m'nyansi
^ Mu Chigiliki, “chifukwa tenze akapolo a vinthu vamasoŵela va muli ichi chalo.”
^ Amene aŵa ni mawu a Chihebeli olo kuti Chialamu amene otanthauza kuti, “Mwewo Atata ŵangu!”
