Kuli Agalantiya 5:1-26
5 Khilisitu etimasula kuti tinkhale na ufulu wamene uyu. Tetyo nkhalani otang’a ndipo osati mulole kuti mumangiwesoti mu goli yaukapolo.
2 Mvwani! Newo Paulo, nukuujani kuti mukachitiwa mdulidwe vechichita Khilisitu vizankhale viliye pindu kuli mwewo.
3 Kachiŵilisoti nukumbusha munthu aliyense wamene ochitiwa mdulidwe, kuti ofunikasoti kukonkheja vonse va m’Chilamulo.
4 Mwewo amene mufuna kuti mukowonewa kuti nimwe olungama chifukwa chokonkheja chilamulo, mwalilekanisha na Khilisitu. Ndipo mwachitisha kuti osati muzalondelesoti kuwama ntima kwake kukulu.
5 Koma kupitila mwa mzimu, sewo tuyembekezela mwachidwi vikuti vizatichitikile chifukwa chowonewa kuti nise olungama, chifukwa cha chikhulupililo.
6 Chifukwa keno munthu ni wokatijana na Khilisitu Yesu, kuchitiwa mdulidwe olo kusachitiwa mdulidwe kunkhala kuliye pindu. Koma chofunika ngako ni kunkhala na chikhulupililo chamene chuwonekela powonesha chikondi.
7 Mwenzeutuka luweme. Ekusokonezani niŵani kuti osati mupitilije kumvwila choonadi?
8 Vechikuphunzisani ŵanthu amene awo ekusokonezani viliyefumile kwa Mulungu wamene ekuitani.
9 Vofufumisha vitontho vufufumisha ntanda wonse.
10 Nukhulupilila kuti mwewo amene nimwe okatijana na Ambuye, muzachinjelini maganizo. Koma munthu wamene uyo okuvutishani keno angankhale ŵani, azalondele chiweluzo chomuyenelela.
11 Ponena za newo akwasu, keno nulalikila mphela kuti ŵanthu akochitiwa mdulidwe ndaŵa yanji nutamanishiwa mphela? Kuti vili tetyo, niye kuti vanuphunzisa vokhuza imfwa ya Yesu pa chimuti chotamanilapo,* sembe viliye khumudwishesoti ŵanthu.
12 Sembe nakonda kuti ŵanthu amene awo ofuna kukusokonezani maganizo, alithene ŵeka.*
13 Akwasu, mweitiwa kuti munkhale pa ufulu. Koma osati mukatishile ntchito ufulu wamene uyu monga mwayi wakuti mukochita vinthu vaukumbwa muŵili wamene uliye ungwilo. Mmalo mwake mukolola kuti chikondi chikokulimbikisani kutumikilana.
14 Chifukwa Chilamulo chonse chayona* pa lamulo imozi yakuti: “Ukokonda muyako monga ni mwaulikondela weka.”
15 Koma mukapitilija kulumana komasoti kulyana mweka-mweka, samalani kuti osati muwonongane.
16 Mmalo mwake nunena kuti, Pitilijani kuyenda mosogolelewa na mzimu, ndipo muzachitelini vinthu vaukumbwa muŵili wamene uliye ungwilo olo patontho.
17 Chifukwa vaukumbwa muŵili vulimbana na mzimu ndipo nawosoti mzimu ulimbana na muŵili. Vinthu viŵili vamene ivi vushushana kuti osati muchite vamufuna kuchita.
18 Komasoti keno musogolelewa na mzimu, mulilini pansi pa chilamulo.
19 Lomba ntchito za muŵili wamene uyu wochimwa zuwonekela mosavuta. Ntchito zake zamene izi ni chiwelewele,* nkhalidwe yamene yuipisha munthu, nkhalidwe iliye nsoni,*
20 kulambila mafano, kukhulupilila mizimu,* kuzondana, ndewo, nsanje, kupya ntima, kukangana, kuyaŵanika, magulu ampatuko,
21 njilu, kumwa mwauchakolwa,* maphwando aipa,* na viyakine. Akwasu, mokatijana na venikuchenjejani navo kale, nukuchenjejanisoti kuti ŵanthu amene ochita vamene ivi azaloŵelini mu Ufumu wa Mulungu.
22 Koma minkhalidwe yakunkhala nayo ŵanthu moyavyiwa na mzimu utuŵa* ni chikondi, chisangalalo, ntendele, kuleza ntima, kuwama ntima, ubwino, chikhulupililo,
23 kufasa na kulilesha. Paliye lamulo yulesha minkhalidwe yamene iyi.
24 Komasoti ŵanthu amene ni ophunzila a Khilisitu Yesu, ekhomelela pa chimuti muŵili wawo pamozi na vaufuna komasoti kukumbwila.
25 Keno tusogolelewa na mzimu pa moyo wasu, tiyeni tipitilije kuchita vinthu mokatijana na mzimu wamene uyo.
26 Osati tinkhale olikuja, osati tikoyambisha mpikishano pakati pasu komasoti osati tikochitilana njilu.
Malizu a m'nyansi
^ Onani matanthauzo a mawu ayakine.
^ Vamene ivi sembe vichitisha kuti ankhale osayenelela kuchita vechenzenena chilamulo chamene icho chenzelimbikisa.
^ Olo kuti, “chakwanilishiwa.”
^ Mu Chigiliki por·nei′a. Onani matanthauzo a mawu ayakine.
^ Mu Chigiliki a·sel′gei·a. Onani matanthauzo a mawu ayakine.
^ Olo kuti, “kuchita vamasenga.”
^ Mawu a Chigiliki amene omasuliliwa kuti “kumwa mwauchakolwa” otanthauza kumwa ngako walwa komasoti mosalilesha na cholinga chofuna kukolwa.
^ Olo kuti, “maphwando a chongo.”
^ Mu Chigiliki, “Koma chitwazi cha nzimu.”