Kuli Ahebeli 1:1-14
1 Kale, Mulungu enzelaŵila na makolo ŵasu kupitila muli aneneli. Echita vamene ivi kwa maulwendo anyinji komasoti mu njila zosiyana-siyana.
2 Kumapeto kwa masiku ŵano, yove walaŵila na sewo kupitila mwa Mwana wake, wamene emusankha kuti ankhale wolondela vinthu vonse monga chuma. Komasoti kupitila muli yove, Mulungu echitisha kuti pankhale nthawe* zosiyana-siyana.
3 Yove owonesha luweme ulemelelo wa Mulungu ndipo ni chifanizilo ngacho-ngacho cha Mulungu wamene uyo. Komasoti mawu ŵake amphamvu oyavya kuti vinthu vinkhalepo mphela. Ndipo pechitituŵisha potichosela machimo ŵasu, enkhala ku kwanja ngayo ya Wolemekezeka kululu.
4 Tetyo yove wankhala wopambana angelo, mwakuti zina yawalondela monga chuma, ni yapalulu ngako kupambana yawo.
5 Mwachisanzo, kansi Mulungu eujapo mngelo wotyani kuti: “Wewo niwe mwana wangu. Lelo newo nankhala atata ŵako”? Komasoti kuti: “Newo nizankhale atata ŵake ndipo yove azankhale mwana wangu”?
6 Koma ponena za nthawe yakuti azatumijesoti Mwana wake wamene uyo woyamba kuvyalika pano pa chalo, yove onena kuti: “Angelo onse a Mulungu amugwadile.”
7 Komasoti ponena za angelo, yove onena kuti: “Ochitisha kuti angelo ŵake ankhale amphamvu* ndipo ochitisha atumiki ŵake kunkhala monga ni kuyaka kwa mulilo.”
8 Koma ponena za Mwana wake, yove onena kuti: “Mulungu ni mpando wako wachifumu mpaka kale-kale ndipo ndodo ya Ufumu wako, ni ndodo yachilungamo.
9 Wenzekonda chilungamo ndipo wenzezondana na kusamvwila malamulo. N’chifukwa chake Mulungu, Mulungu wako, ekuzoza na mafuta achisangalalo chikulu kupambana mafumu ayako.”
10 Yove onenasoti kuti: “Ambuye, pachiyambi pamene apo mwinkhazikisha fandeshoni ya chalo, ndipo kululu ni ntchito ya manja ŵanu.
11 Vinthu vamene ivi vizasile, koma mwewo muzankhalepo mphela. Molingana na chovwala, vonse vamene ivi vizasile.
12 Muzapeteke-peteke vinthu vamene ivi monga ni mkhanjo komasoti monga ni chovwala ndipo vizachinjiwe. Koma mwewo muzachinjelini, ndipo muzankhalepo mpaka kale-kale.”
13 Koma kansi ni mngelo wotyani wamene emuujapo kuti: “Nkhala ku kwanja yangu ngayo, mpaka niike adani ŵako kuti ankhale chokandapo mendo ŵako”?
14 Angelo onse ni mizimu yotumikila ayakine.* Mulungu oŵatumija kuti akatumikile ŵala ŵakufuna yove kuti azaŵapulumushe.
Malizu a m'nyansi
^ Onani matanthauzo a mawu ayakine.
^ Mu Chigiliki, “Opanga angelo ŵake kunkhala mizimu.”
^ Olo kuti, “mizimu yochita utumiki wopatulika.”
